Iginiit ni Pangulong Ferdinand “Bongbong” Marcos Jr. na nananatiling mahalaga ang 2016 Arbitral Award bilang patunay na ang mga alitan sa pagitan ng mga bansa ay dapat maresolba sa pamamagitan ng rule of law at hindi sa pamamagitan ng puwersa o pananakot.
Ito ang pahayag ng Pangulo sa ginanap na diplomatic reception para sa ika-10 anibersaryo ng arbitral ruling sa Conrad Manila sa Pasay City, na dinaluhan ng mga miyembro ng diplomatic corps at mga opisyal ng pamahalaan.
Ayon kay Pangulong Marcos, ang batas ang nagsisilbing “pantay na batayan” ng mga bansa upang matiyak na hindi nakabatay sa lakas militar, lawak ng teritoryo, o kapangyarihang pang-ekonomiya ang pagkilala sa karapatan at katarungan.
Binigyang-diin ng Pangulo na ang arbitral award ay hindi lamang isang legal na tagumpay kundi may direktang epekto sa buhay ng mga mangingisda at mga komunidad sa baybayin na umaasa sa yamang-dagat sa loob ng exclusive maritime waters ng Pilipinas.
Muling iginiit ng Pangulo na ang West Philippine Sea ay hindi dapat maging lugar ng tunggalian, kundi isang karagatan ng kapayapaan, kooperasyon, kalakalan, koneksyon, at pangangalaga sa biodiversity.
Nagpasalamat din si Pangulong Marcos sa mga international partner ng Pilipinas na patuloy na sumusuporta sa pagtataguyod ng international law. Hinimok niya ang pandaigdigang komunidad na ipagpatuloy ang pagprotekta sa mga komunidad, karagatan, at pangmatagalang kapayapaan.
