Nagpaalala ang Land Transportation Office (LTO) sa mga accredited vehicle dealer na mahigpit na sundin ang itinakdang processing period sa pagpaparehistro ng mga bagong sasakyan upang maiwasan ang pagkaantala sa paglalabas ng mga dokumento para sa mga motorista.
Bahagi ito ng 7-Point Reform Agenda ni LTO Chief Assistant Secretary Markus V. Lacanilao na naglalayong palakasin ang pagpapatupad ng mga regulasyon sa mga dealer at tiyaking mabilis at maayos ang proseso ng vehicle registration.
Ayon sa LTO, ang isang bagong sasakyan ay dapat na mairehistro sa loob ng pitong (7) araw mula sa petsa ng Sales Invoice. Pagsapit naman ng ika-11 araw, dapat nang maibigay ng dealer sa may-ari ang mga accountable item gaya ng Official Receipt (OR), Certificate of Registration (CR), at plaka.
Nagbabala ang ahensya na ang mga dealer na hindi susunod sa itinakdang proseso ay papatawan ng kaukulang parusa.
Para sa mga motorsiklo:
• Unang paglabag – ₱20,000 multa at pag-deactivate ng accreditation sa LTO IT System hanggang mabayaran ang multa.
• Ikalawang paglabag – ₱30,000 multa at suspensyon ng accreditation nang hindi hihigit sa isang buwan.
• Ikatlong paglabag – ₱40,000 multa at suspensyon ng accreditation nang hanggang tatlong buwan.
• Ikaapat na paglabag – ₱50,000 multa at Kanselasyon ng Certificate of Accreditation at blacklisting.
Para sa mga motor vehicle:
• Unang paglabag – ₱100,000 multa.
• Ikalawang paglabag – ₱500,000 multa.
• Ikatlong paglabag – ₱1,000,000 multa at suspensyon ng Certificate of Accreditation nang hindi hihigit sa anim (6) na buwan.
•Ikaapat na paglabag – Kanselasyon ng Certificate of Accreditation at blacklisting sa loob ng isang (1) taon mula sa pinal na kautusan ng kanselasyon.
Nagbabala rin ang LTO sa mga dealer na magsusumite ng peke o maling stock at sales reports o magbibigay ng hindi totoong impormasyon sa kanilang aplikasyon.
Sa unang paglabag, maaaring patawan ang mga ito ng hanggang anim (6) na buwang suspensyon, ₱500,000 multa, at kanselasyon ng kanilang Certificate of Stock Reported (CSR), sales report, at registration ng mga sasakyang sangkot sa paglabag.
Kapag naulit naman ang paglabag, maaari nang tuluyang kanselahin ang kanilang accreditation at isailalim sa isang taong blacklisting, kasama ang pagkansela sa mga kaugnay na CSR, sales report, at registration ng mga apektadong sasakyan.
Hinikayat ng LTO ang publiko na maging pamilyar sa itinakdang panahon ng pagpaparehistro ng mga bagong sasakyan at agad iulat sa ahensya ang anumang hindi makatwirang pagkaantala sa paglabas ng Official Receipt (OR), Certificate of Registration (CR), at plaka.
