Tatlong magkakapatid ang nasawi matapos umanong makuryente sa loob ng kanilang inuupahang apartment sa Barangay Pinyahan, Quezon City.
Batay sa paunang imbestigasyon, unang nakuryente ang isang 15-anyos na dalagita habang nagsasampay ng damit sa bakal na sampayan sa balkonahe. Sinubukan umano siyang sagipin ng kaniyang 12-anyos na kapatid na babae at 19-anyos na kuya, ngunit kapwa rin sila nakuryente.
Humingi naman ng tulong ang bunso nilang kapatid sa mga kapitbahay at agad na naisugod sa East Avenue Medical Center ang tatlong biktima, ngunit idineklara silang dead on arrival.
Sa isinagawang inspeksiyon ng Meralco, lumabas na normal ang boltahe ng linya, ngunit natuklasang grounded ang circuit breaker na nakakabit sa air-conditioning compressor, na posibleng pinagmulan ng insidente.
Patuloy pang iniimbestigahan ng pulisya ang kaso.
