HOT STORIES OF THE WEEK

Handa ang Department of Health (DOH) na sagutin ang mga pagkuwestiyon ukol sa Covid-19 vaccine deployment program.

Maliban dito, sinabi ni DOH officer-in-charge Maria Rosario Vergeire na bukas din sila sa anumang imbestigasyon kaugnay ng mga nasayang na bakuna.

Paliwanag ni Vergeire, mas mababa pa sa 10% threshold na itinakda ng World Health Organization ang vaccine wastage ng bansa.

Matatandaang nanawagan si Sen. Risa Hontiveros ng Senate investigation ukol sa mga na-expire at hindi nagamit na bakuna na tinatayang nagkakahalaga ng P5 billion hanggang P13 billion.

Nasa huling araw na ng isolation ang naitalang unang kaso ng monkeypox virus sa Pilipinas.

Ayon kay DOH Officer-In-Charge Maria Rosario Vergeire, maaari nang makalabas ng ospital ang 31- anyos na pasyente basta ay mayroong Go-signal ng doktor.

Sakaling payagan, maaari nang makisalamuha ng unang kaso sa kaniyang pamilya at kaibigan.

Patuloy namang binabantayan ng DOH ang close contact ng unang kaso, matapos silang i-require na sumailalim sa quaratine sa loob ng 21 araw.

Bukod sa nasabing kaso ng monkeypox virus, wala na ngayong ibang kaso ng sakit na nakikita ang DOH sa bansa.

Matatandaang noong July 28 nagpositibo ang pasyente sa monkeypox.

Noong July 23 naman idineklara ng World Health Organization (WHO) ang monkeypox outbreak kung saan aabot sa 72 bansa ang apektado.

Inihayag ng Malacañang na inaasahan na nila ang pagtaas ng inflation rate sa bansa.

Ito ang sinabi Press Scretary Trixie Cruz-Angeles matapos maitala ng Philippine Statistics Authority ang 6.4% na inflation rate nitong Hulyo.

Ayon kay Cruz-Angeles, malaki ang naging epekto sa bansa ng giyera sa pagitan ng Russia at Ukraine at maging nang nagpapatuloy na COVID-19 pandemic.

Matatandaang una rito, sinabi ni Pangulong Ferdinand Bongbong Marcos Jr., sa kaniyang State of the Nations Adress na hindi maiiwasan ang pagbilis ng inflation dahil sa mataas ng presyo ng langis at pangunahing mga bilihin.

Itinalaga ni Pangulong Ferdinand “Bongbong” Marcos Jr., si Atty. Monalisa Dimalanta bilang Chairperson ng Energy Regulatory Commission (ERC).

Ayon kay Press Secretary Trixie Cruz Angeles, si Dimalanta ay alumni ng University of the Philippines (UP) at dating Chief Legal Counsel at Compliance Officer ng Aboitiz Power Corporation.

Nagsilbi rin si Dimalanta bilang Chairperson ng National Renewable Energy Board (NREB).

Nakikipag-ugnayan na ang National Economic Development Authority (NEDA) sa Bangko Sentral ng Pilipinas (BSP) at Philippine Statistics Authority (PSA) para mapabilis ang pag-iimprenta at distribusyon ng National ID.

Ito ay bilang tugon sa direktiba ni Pangulong Ferdinand Marcos Jr. na pabilisin ang sistema ng PhilSys National ID.

Siniguro naman Socio-Economic Planning Secretary Arsenio Balisacan sa pulong kasama ang mga opisyal ng BSP at PSA na nananatiling on track ang naturang proyekto.

Aniya, pinaiigting na ng pamahalaan ang mga hakbang upang mapabilis ang usad ng implementasyon nito at mapakinabangan na ng mas maraming Pilipino.

Samantala, target ng gobyerno na makapag-isyu ng 50 milyong Phil IDs bago matapos ang taong 2022.

Maaari nang mag-avail ng Emergency Loan Program ang mga miyembro at pensioner ng Government Service Insurance System (GSIS) na naapektuhan ng magnitude 7 na lindol sa Abra.

Hanggang Setyembre 4 maaaring mag-apply ng loan ang tinatayang nasa 7,000 GSIS members at pensioners.

Ayon sa GSIS, 20,000 pesos ang maaaring i-avail ng mga wala pang emergency loan habang maaari namang manghiram nang hanggang 40,000 pesos ang mga miyembro at pensioner na may existing emergency loan, kung saan ibabawas sa kanilang loan proceeds ang natitirang balanse.

Direkta namang ihuhulog sa Unified Multi-Purpose Identification (UMID) card o temporary E-Card Plus account ang pera.

Babayaran ito sa loob ng tatlong taon na mayroong 6% interest rate. —sa ulat ni Aya Yupangco (Patrol 5)

Umakyat na sa 11 ang bilang ng mga naiulat na nasawi dahil sa magnitude 7 na lindol sa Abra.

Ayon sa National Disaster Risk Reduction and Management Council (NDRRMC), ang latest fatality ay mula sa Tubo, Abra.

Naitala naman ang 410 na napaulat na nasugatan matapos ang malakas na pagyanig.

Aabot sa kabuuang 448,990 indibidwal o 119,730 mga pamilya ang naapektuhan ng lindol mula sa 1,188 na mga barangay sa Ilocos Region, Cagayan Region, at Cordillera Administrative Region (CAR).

Nasa 30,285 na mga kabahayan ang nawasak kung saan 29,720 ang bahagyang napinsala habang 565 naman ang totally damaged sa nabanggit na mga rehiyon.

Iniulat ng Department of Agriculture na pumalo na sa P33,227,895 ang halaga ng pinsala sa agrikultura sa Cordillera habang iniulat ng National Irrigation Administration (NIA) ang 22.7 million pesos na pinsala sa Ilocos at Cordillera.

Pagdating sa imprastraktura, sinabi ng NDRRMC na tinatayang nasa P1,342,438,371 na ang halaga ng pinsalang  idinulot ng lindol sa Ilocos, Cagayan, at CAR.

Inihain na sa senado ni Senator Pia Cayetano ang panukalang patawan ng Value Added Tax (VAT) ang lahat na digital transaction.

Alinsunod sa Senate Bill 250 ni Cayetano, papatawan ng VAT ang lahat ng produkto at serbisyo na ginawa digitally o electronically o ginamitan ng internet.

Halimbawa nito ang mga binili sa online shop, mga online video game, online courses at webinars, online news papers at mga digital content, gaya ng pelikula at musika.

Nilinaw naman ni Cayetano na hindi ito paglikha ng bagong buwis bagkus nais niyang palakasin ang kapangyarihan ng Bureau of Internal Revenue (BIR) na kolektahin ang VAT ng lahat ng digital service provider sa loob at labas ng bansa.

Layunin din ng panukala na gawing pantay ang trato at pagpapataw ng buwis sa traditional at digital businesses.

Nangangahulugan anya ito na kung may VAT ang produktong aktuwal na binili sa department store, dapat may buwis din kapag bumili sa online platform at kailangang makolekta ito ng BIR mula sa digital service provider.

Batay sa international report, ang Pilipinas ang may pinakamabilis na internet economy sa Southeast Asia na nagkaroon 12 million na bagong digital consumers simula nang  magkaroon ng COVID-19 pandemic.

Isinusulong ni Senior Citizens Partylist Rep. Rodolfo “Ompong” Ordanes ang pagtanggal sa mandatory age sa pagreretiro ng mga manggagawang senior citizens sa private sector.

Sa kanyang House Bill 3220, nais i-repeal ni Ordanes ang compulsory age na 75 na itinatakda sa Labor Code of the Philippines.

Nakasaad sa kanyang panukala na dapat magkaroon ng “Choice” ang mga edad 75 kung magpapatrabaho pa basta’t kwalipikado na dapat namang patunayan ng employer.

Layunin anya ng panukala na magpatuloy sa pagtatrabaho ang mga senior citizen basta’t may kakayahan at malakas pa ang mga ito.

Kailangan lamang magpakita ng clearance galing sa mga doktor na nagsasaad na ‘fit to work’ pa rin ang mga lolo’t lola.