HOT STORIES OF THE WEEK

Nanindigan si National Security Adviser, Secretary Clarita Carlos sa ipinatupad na polisisya ng Duterte administration sa pagharap sa maritime dispute sa pagitan ng Pilipinas at China.

Ito’y matapos ang pagbisita ni US House Speaker Nancy Pelosi sa Taiwan na ikinagalit ng Tsina.

Gayunman, iginiit ni Carlos na ginawa lamang ni Dating Pangulong Rodrigo Duterte ang sa tingin nitong tama sa gitna ng tensyon sa pagitan ng Pilipinas at China sa West Philippine Sea.

Samantala, inihayag naman ng NSC Adviser na sakaling magkausap sila ni US State Secretary Antony Blinken na bibisita sa bansa ngayong linggo, ay kanya itong hihimuking maghinay-hinay ang Amerika sa Indo-Pacific dahil sa naka-aalarmang sigalot sa rehiyon.

Hindi anya dapat maging playground ng mga superpower nation ang Indo-Pacific Region dahil marami namang “levels of cooperation” na dapat talakayin gaya ng climate change sa halip na sigalot ang manaig.

Nakatakdang dumating bukas ng Pilipinas si Blinken at haharap kay Pangulong Bongbong Marcos para sa isang Bilateral Meeting.

Posibleng sa unang bahagi pa ng susunod na taon ipatupad ang pagtaas sa buwanang social pension ng indigent senior citizens.

Ayon kay National Commission of Senior Citizens (NCSC) Chairman  Franklin Quijano, malabong ipatupad ang dagdag-pensyon ngayong kalagitnaan ng taon, lalo’t kung wala pang budget.

Kung ilalabas naman anya ay dapat may budgetary process na aaprubahan ng kongreso.

Alinsunod sa batas, itataas na sa 1,000 pesos ang buwanang social pension ng mga mahihirap na senior citizen mula sa 500 pesos.

Nasa apat punto isang milyong mahihirap na lolo at lola ang makikinabang sa dagdag-pensyon.

Inihayag ng isang senador na hindi pa posible sa ngayon ang P20 sa kada kilo ng bigas.

Ito ang inihayag ni Senator Cynthia Villar, na ang presyo ng palay ay nasa P11.50 kada kilo na dodoble sa P30 kada kilo kapag natapos na itong gilingin.

Ipinaliwanag ni Villar na ang presyo ng giniling na bigas ay tumataas dahil sa gastos sa transportasyon, kita ng mga magsasaka, at kita ng rice traders kung ikukumpara ito sa ibang bansa gaya ng Vietnam, na nasa P6.00 lamang ang presyo sa kada isang kilo ng palay.

Samantala, umapela naman sa gobyerno ang senadora na turuan ang mga magsasaka kung paano gumawa ng sarili nilang fertilizer slots at bigyan sila ng composting machine upang mabawasan ang halaga ng mga produktong pang-agrikultura dahil sa mamahaling pataba na isa rin sa mga problema ng bawat magsasaka.

Matatandaan na noong may 2022 national elections, sinabi ni Pangulong Bongbong Marcos na nais niyang ibaba sa P20 ang kilo ng bigas.

Apektado narin ang mga supermarket sa patuloy na pagtaas ng mga pangunahing bilihin, at cost of operation sa Metro Manila sa kabila ng pagbubukas ng ekonomiya at pagdami ng foot traffic o bilang ng mga mamimiling pumapasok sa mga pamilihan sa bansa.

Sa pahayag ni Steven Cua, presidente ng Philippine Amalgamated Supermarkets Association (PAGASA), tumaas narin ang cost of power maging ang halaga ng pasahod, kaya napiilitan nalang magbawas ng mga tauhan ang ilan sa mga supermarket.

Ayon kay Cua, isa pa sa problema ng mga supermarket ay ang suggested retail price na hindi umano nakakatulong sa kanilang negosyo.

Sinabi ni Cua na ang supermarkets sa Pilipinas ay isa sa mga may smallest margins sa buong mundo kaya bumabawi na lamang sila sa mga item na wala sa listahan ng Department of Trade and Industry DTI.

Bukod pa diyan, napipilitan na rin silang maghanap ng ibang alternatibong produkto na mas mura at abot kayang halaga para sa mga mamimili.

Dapat maghanda na ng contingency plans ang Pilipinas sakaling lumala ang sigalot sa Indo-Pacific Region.

Inihayag ni National Security Council Deputy Director General Michael Eric Castillo na hindi malayong maipit ang Pilipinas sa namumurong sagupaan ng China at Taiwan.

Nilinaw ni Castillo na hindi pa naman kailangang maghanda ang Pilipinas sa digmaan, dahil nakasaad sa konstitusyon na iwinawaksi ng bansa ang giyera bilang instrumento ng pambansang polisiya.

Ang kailangan anyang tutukan ay ang preparasyon upang agarang magkaroon ng kapabilidad ang bansa na tumugon sa anumang hindi inaasahang mga kaganapan.

Kabilang sa tinukoy ni Castillo na posibleng pag-ugatan ng gulo sa rehiyon ang West Philippine Sea, Senkaku Islands sa Japan, Korean Peninsula at Taiwan.

Bukod pa ito sa pagbisita ni US House Speaker Nancy Pelosi sa taiwan na labis na ikinagalit ng China at itinuturing nilang paghahamon ng gulo.

Handa ang Pilipinas sa posibleng pagkalat ng Monkeypox cases.

Tiniyak ito ni DOH Officer-In-Charge Maria Rosario Vergeire matapos ma-detect ang kauna-unahang kaso ng naturang sakit sa bansa noong isang linggo.

Ayon kay Vergeire, lahat ng close contacts ng unang Monkeypox case ay nananatiling asymptomatic.

Nilinaw naman ng opisyal na bukod sa virus, isa sa mga hamon sa nabanggit na sakit ang misinformation at diskriminasyon sa mga infected, dahil hindi naman sexually transmitted disease ang Monkeypox.

Samantala, plano ng Department of Transportation na makipagtulungan sa DOH sa pagbuo ng guidelines upang maiwasan ang hawaan, partikular sa public transportation.

Nanawagan ang Lawyers for Commuters Safety and Protection (LCSP) sa mga alkalde sa Metro Manila hinggil sa pagpapatupad ng no contact apprehension.

Sa panayam ng DWIZ, sinabi LCSP Head Atty. Ariel Inton, na dumarami ang mga local government units o lgus na nagpapatupad ng no contact apprehension o ang polisiya sa paggamit ng mga cctv, mga digital camera at iba pang gadget o teknolohiya para kumuha ng mga video at larawan sa paghuli ng mga sasakyang lumalabag sa mga batas trapiko, panuntunan at regulasyon.

Ayon kay Atty. Inton, walang magandang maidudulot ang nasabing batas lalo na kung hindi tama ang pagpapatupad ng polisiya.

Sinabi pa ni Atty. Inton na ang no contact apprehension ay isang traffic violation na maituturing na personal violation ng mga driver kung saan, lisensiya ang pinapairal o tinitiketan.

Iginiit ni Inton na sa no contact apprehension, posibleng mapawalang sala ang driver na nagpapatakbo ng sasakyan dahil ang mismong may-ari ng sasakyan ang pananagutin sa paglabag.

Sinimulan na kahapon ang karagdagang libreng sakay na inilunsad sa Parañaque Integrated Terminal Exchange (PITX).

Sa panayam ng DWIZ, sinabi ni PITX hHad Jason Salvador, na ang karagdagang libreng sakay ay handog ng Office of the Vice President sa pangunguna ni Vice President Sara Duterte-Carpio at sa pakikipagtulungan ng Department of Transaportation (DOTr) sailalim ng pamumuno ni Secretary Jaime Bautista.

Ayon kay Salvador, layunin ng pamahalaan na madagdagan ang mga ino-offer na libreng sakay sa bansa lalo na’t magsisimula na ang pagbabalik ng klase ng mga mag-aaral.

Sinabi ni Salvador na mabibigay din ang OVP ng dalawang bus na ilalagay sa Metro Manila para dagdagan at suportahan ang libreng sakay sa mga pasahero na magsisimula tuwing Lunes hanggang Sabado simula alas-4 ng umaga hanggang alas-10 ng umaga at alas-4 ng hapon hanggang alas-10 ng gabi.

Iginiit ni Salvador na prayoridad ng kanilang ahensya ang mga mag-aaral na magbabalik sa face-to-face classes sa Agosto a-22.

Isinulong ng isang mambabatas ang panukalang i-require ang pagkakaroon ng parking space o garahe, bago bumili at makapagparehistro ng sasakyan sa Land Transportation Office (LTO).

Sa House Bill 31 ni Marinduque Representative Lord Allan Velasco, tinukoy nito ang ilang lugar sa bansa na dapat ipatupad ang batas.

Kabilang dito ang Metro Manila, Angeles City, Cebu, Bacolod, Baguio, Batangas City, Cagayan de Oro, Dagupan City, Davao City, Iloilo City, Naga City at Olongapo City.

Ang mga nabanggit na lugar ay nakitaan ng traffic congestion o pagsikip ng daloy ng trapiko kaya napili ang mga ito na tutukan sa panukala.

Oras na maisabatas, obligado na ang LTO na beripikahin kung ang aplikante ay nakasunod sa requirement.

Sakaling bigong makasunod, sususpindihin ito ng tatlong buwan at kapag iligal na nakapagparehistro ay babawiin ang kaniyang lisensya at pagmumultahin ng 50,000 pesos. —sa ulat ni Tina Nolasco (Patrol 11)

Inalmahan ng iba’t ibang transport groups ang mabigat umanong multang nagpatong-patong dahil sa traffic violations resulta ng No – Contact Apprehension Policy (NCAP) sa iba’t ibang local government unit, lalo sa Metro Manila.

Ang ilang multa umaabot pa sa isang milyong piso, na para sa mga transport group ay masyado ng malaki at nakakalula at karamihan sa mga violation ay Obstruction of Pedestrian Lane at Disobedience to Traffic Control Signs.

Iginiit ng Liga ng Tranportasyon at Operators sa Pilipinas (LTOP) at Lawyers for Commuters’ Safety and Protection (LCSP) na dapat repasuhin at pag-aralan muli ang NCAP.

Nagbanta si LCSP President, Atty. Ariel Inton na kung babaliwalain ng gobyerno ang kanilang suhestyon, maaaring malagas ang mga bumibyaheng PUV sa mga kalsada.

Sa panayam naman ng DWIZ kay LTOP National President Orlando “Ka Lando” Marquez, inihayag nitong may problema sa pagpapatupad ng ncap, partikular ang magkaka-ibang halaga ng multa sa bawat lungsod.

Dapat anya ay magkaroon ng unified implementation ng No-Contact Apprehension Policy ang mga LGU sa Metro Manila at iba pang lungsod upang maiwasan ang perwisyo.