HOT STORIES OF THE WEEK

Wala pang eksaktong petsa na inilalabas ang Philippine National Police (PNP) para sa schedule ng assumption o araw ng pag-upo nito bilang bagong hepe.

Ito’y matapos ianunsyo kahapon ng Malakanyang na si Northern Luzon police area commander PLtGen. Rodolfo Azurin Jr. ang tatayong bagong PNP chief sa ilalim ng administrasyong Marcos.

Ayon kay PNP spokesperson PCol. Jean Fajardo, naka-depende ang schedule ng assumption sa schedule ni Pangulong Ferdinand “Bongbong” Marcos Jr.

Ang Pangulo kasi ang magiging guest of honor at mangunguna sa seremonya sa pagpapalit ng pinuno ng PNP.

Gayunman, pagdating sa paghahanda, sinabi ni Fajardo na “fine tuning” na lang ang kanilang gagawin dahil may programa na rito.

Oras na pormal na umupo, si Azurin ang magiging ika-28 PNP chief.—mula sa ulat ni Gilbert Perdez (Patrol 13)

Umakyat na sa 1.2 billion pesos ang halaga ng pinsala sa imprastraktura na iniwan ng magnitude 7 na lindol sa Northern Luzon.

Ayon sa National Disaster Risk Reduction and Management Council (NDRRMC), pumalo sa kabuuang P651,519,209 ang naiulat na halaga ng pinsala sa Ilocos Region; P32,029,162.81 sa Cagayan; at P568,740,000 sa Cordillera Administrative Region.

Aabot sa kabuuang 28,702 na kabahayan ang nawasak kung saan, 28,289 sa mga ito ang bahagyang napinsala habang 413 ang lubhang napinsala o totally damaged.

Samantala, nananatili naman sa 10 ang napaulat na nasawi sa lindol at 394 ang mga napaulat na nasugatan. —sa ulat ni Gilbert Perdez (Patrol 13)

Muling nanawagan si Pangulong Ferdinand “Bongbong” Marcos Jr., sa publiko na magpaturok na ng booster shot bilang karagdagang proteksyon laban sa COVID-19.

Binigyang diin ng punong ehekutibo na ang bakuna ang tanging panlaban sa nakahahawang sakit.

Nitong lunes ay dumalo si Pangulong Marcos sa paglulunsad ng programang ”Pinas Lakas” sa Pasig City, na layong mabigyan ng booster dose ang 23.8 million filipinos sa unang isangdaang araw ng Marcos administration.

”Kaya’t kayo na nandito na magpapa-booster na ay hikayatin ninyo ‘yung mga kasamahan ninyo, ‘yung pamilya ninyo lahat, sabihin ninyo lahat na magpa-booster na para hindi niyo na kailangan alalahanin itong COVID na ito para masasabi natin dito sa Pilipinas ay tapos na,’’ pahayag ni Pangulong Marcos.

Patuloy ang Department of Social Welfare and Development (DSWD) sa paghahatid ng tulong sa mga naapektuhan ng lindol sa Abra.

Sa panayam ng DWIZ, sinabi ni DSWD Secretary Erwin Tulfo na naipamahagi na nila ang unang round ng tulong at ikinakasa na ang ikalawang round nito para sa 27 munisipalidad ng Abra.

Tiniyak rin ng kalihim na mayroong nakalaang pondo para sa mga LGU na mangangailangan ng tulong.

“Nagre-ready na rin po kami, ah pipirmahan ko within the next few days yung quick reaction fund po namin sir. Para ibaba ulit para sa cash forward sir. Meron ho tayo, may pondo ho tayo Sir na ready ho diyan. Kung kailangan ng LGU nila ng tulong, e doon muna ho sila tutulong,” pahayag ni Tulfo sa panayam ng DWIZ.

Nagpaabot ng pasasalamat ang Department of Social Welfare and Development (DSWD) sa iba’t ibang ahensya na nakiisa at nagdonate para sa mga biktima ng magnitude 7 na lindol sa Northern Luzon.

Nangunguna rito ang Office of the Vice President (OVP) na nagbigay ng 76 units ng 1.5 at 8.5 kilo-volt-amperes generators at 60 portable rice mill machines para sa lalawigan ng Abra.

Habang nagpaabot naman ng mahigit 300,000 piso na halaga ng relief goods ang United Nations International Children’s Emergency Fund (UNICEF) at International Organization for Migration (IOM) na nagbigay naman nang 1,000 shelter tarpaulins na nagkakahalaga ng tatlong milyong piso.

Samantala, sinabi ng DSWD na pumalo na sa kabuuang 21.9 million pesos ang halaga ng naipamahagi nitong ayuda sa higit 100,000 pamilya o 389,046 na indibidwal na apektado ng naturang lindol.

Epektibo na ngayong araw ang ika-limang sunod na linggong bawas singil sa presyo ng produktong petrolyo.

Ayon sa kumpaniyang Pilipinas Shell, Chevron Philippines o Caltex, Flying V, at Seaoil Philippines, kanilang ipatutupad ang P.75 centavos na dagdag-singil sa kada litro ng gasolina; P.60 centavos ang magiging tapyas singil sa kada litro ng diesel, at P.75 centavos naman ang magiging bawas singil sa kada litro ng kerosene.

Magpapatupad din ang Cleanfuel, Petro Gazz, Phoenix Petroleum Philippines, at PTT Philippines ng parehong presyo pero hindi kasama ang kerosene.

Nagsimula ang panibagong price adjustment kaninang alas-6 ng umaga maliban sa kumpaniyang Caltex na una nang nagpatupad alas-12 kaninang madaling araw habang magpapatupad naman mamayang alas-8 ng umaga ang kumpaniyang Cleanfuel.

Sa ngayon ang year-to-date adjustments sa kada litro ng gasolina ay pumalo na sa P18.90 centavos; P32.95 centavos naman sa kada litro ng diesel; habang P28.5 centavos naman sa kada litro ng kerosene.

Nagpasalamat naman si COMELEC Chairman George Garcia sa pagtitiwalang ibinigay sa kanya ni Pangulong Bongbong Marcos matapos ang kanyang muling pagkakatalaga sa poll body.

Inihayag ni Garcia na isang pribilehiyo na pamunuan ang komisyong nagbibigay-daan sa karapatang bumoto.

Sa ilalim anya ng kanyang pamumuno, layunin ng COMELEC na magpatupad ng makabuluhang mga reporma na reresolba sa mga isyung kinakaharap ng mga stakeholder at botante.

Kabilang dito ang mga structural reform na magpapalakas sa transparency at integridad ng poll body.

Samantala, tiniyak din ni Garcia na mananatili siyang walang kinikilingan at independyente bilang isang COMELEC Chairman.

Itinalaga ni Pangulong Bongbong Marcos si dating COMELEC Commissioner George Erwin Garcia bilang Chairman ng Commission on Elections.

Ayon kay Press Secretary, Atty. Trixie Cruz-Angeles, isinumite na ni Pangulong Marcos ang pangalan ni Garcia sa Commission on Appointments alinsunod sa batas.

Si Garcia, na naging COMELEC Commissioner bago magpalit ng administrasyon ay dating election lawyer ni PBBM.

Siya rin ang kumatawan kay Senador Grace Poe sa citizenship case nito sa Korte Suprema noong 2016 at naging abogado ni dating Manila Mayor Francisco “Isko Moreno” Domagoso.

Nagtalaga na si President Ferdinand “Bongbong” Marcos Jr., ng mga bagong pinuno ng Armed Forces of the Philippines (AFP), National Bureau of Investigation (NBI) at Philippine National Police (PNP).

Ito ang kinumpirma ni Press Secretary Atty. Trixie Cruz-Angeles ngayong araw.

Aniya, itinalaga ng Pangulo si Lt. Gen Bartolome Vicente O. Bacarro bilang Chief of Staff ng AFP at pormal na uupo sa Agosto a-8.

Batay sa RA 11709, si Bacarro ang magiging unang CS-AFP na mabibigyan ng tatlong taong termino.

Si Bacarro ay graduate ng Philippine Military Academy Maringal Class of 1988 at una ring nakatanggap ng Medal of Valor.

Itinalaga rin ng Pangulo si Dir. Medardo de Lemos para sa NBI.

Si de Lemos ay isang Abogado at Career officer na mahigit 30 taon nang nagsisilbi sa ahensya.

Habang si Lt. Gen. rodolfo Azurin, Jr. naman ang magiging pinuno ng Philippine National Police.

Si Azurin ay nakapagtapos sa Philippine Military Academy (PMA) Makatao Class of 1989 at kasalukuyang Commander ng Northern Luzon Police Area.

Magkakaroon ng dagdag-bawas sa presyo ng mga produktong petrolyo bukas, araw ng Martes.

Batay sa abiso ng Pilipinas Shell Petroleum Corp., P0.75 ang taas-singil sa kada litro ng gasolina habang P0.60 ang bawas-presyo sa kada litro ng diesel at P0.75 naman ang rollback sa kada litro ng kerosene.

Ipatutupad din ng Cleanfuel at Petro Gazz ang kaparehong price adjustments, maliban sa kerosene.

Epektibo ang price adjustment bukas ng ala-6 ng umaga, maliban sa Cleanfuel na magpapatupad ng alas-8:01 ng umaga.

Samantala, magpapatupad din ang mga kumpanya ng langis ng bawas-presyo sa Liquefied Petroleum Gas (LPG).

Ayon sa Petron Corporation, magkakaroon ng tapyas na P2.05 sa kada kilo ng LPG at P1.15 naman sa kada kilo ng Auto LPG na ipatutupad din sa Martes.

Nabatid na ito na ang ika-apat na sunod na buwang nagpatupad ng rollback sa LPG.