Walang nakikitang banta ng destabilization ang Armed Forces of the Philippines kahit tumagal o magkaroon ng hindi inaasahang pangyayari sa impeachment trial ni Vice President Sara Duterte sa Senado.
Ayon kay AFP spokesman for the West Philippine Sea Rear Admiral Roy Vincent Trinidad, nirerespeto ng militar ang proseso ng pulitika at nananatiling nakatuon sa pagtupad ng mandato nito sa pambansang seguridad.
Ipunto ni Trinidad na maraming beses nang nakaranas ang bansa ng mga malalaking kilos-protesta, imbestigasyon, at iba pang sitwasyon nang hindi naaapektuhan ang katatagan ng Sandatahang Lakas ng Pilipinas.
Ang mga usapin, aniya, may kinalaman sa impeachment ay bahagi ng hiwalay na sangay ng pamahalaan na kanilang iginagalang at sinusuportahan.
Binigyang-diin ng AFP na patuloy nilang gagampanan ang kanilang tungkulin nang walang pakikialam sa prosesong pampulitika.—sa panulat ni Jordan Gutierrez
