HOT STORIES OF THE WEEK

Nagpaabot ng pakikiramay ang mag-amang sina dating Pangulong Rodrigo Duterte at Vice President Sara Duterte – Carpio sa pamilya ni yumaong dating Pangulong Fidel Ramos.

Ayon kay dating Pangulong Digong, labis niyang ikinalungkot ang pagpanaw ng kapwa niya dating punong ehekutibo.

Kasabay ng pagdadalamhati, ipinanawagan ng nakatatandang Duterte ang pagkilala sa mga pamana at mahalagang ambag sa bayan ni Ramos.

Tinawag naman ni VP Inday si FVR bilang isang tunay na “Makabayan” na humikayat sa mga unipormadong manggagawa na pahalagahan ang kanilang integridad bilang public servants.

Dapat anyang magsilbing inspirasyon ang buhay ni Ramos at ang napakalaki nitong pamana na kanyang itinatag bilang pagpapakita ng pagmamahal sa bayan at mga kapwa Filipino.

Taong 2016 nang suportahan ni FVR ang kandidatura ng nakatatandang Duterte sa presidential elections pero kalauna’y naging kritiko ng mga polisiya ng Duterte administration.

Naglabas na ng opisyal na pahayag ang pamilya ni dating Pangulong Fidel Ramos matapos ang pagpanaw nito sa edad na 94.

Ayon kay Freddie Jalasco, manugang ni FVR, labis na ikinalulungkot ng kanilang pamilya ang pagyao ng kanilang ama.

Nagpaabot din ng pasasalamat ang pamilya ni Ramos sa lahat ng nakikiramay kasabay ng panawagang privacy sa gitna ng kanilang pagdadalamhati.

Nakatakda anya nilang i-anunsyo ang detalye ng funeral arrangements ng dating pangulo.

Asahan na bukas ang ika-5 sunod na linggong bawas singil sa presyo ng produktong petrolyo.

Ayon sa ilang kumpaniya ng langis, maglalaro sa P1.00 hanggang P1. 20 centavos ang magiging bawas singil sa kada litro ng diesel; habang magpapatupad naman ng .50 centavos hanggang .70 centavos sa kada litro ng gasolina.

Inaasahan naman na posible pang magbago ang presyo ng langis sa bansa depende sa paggalaw ng kalakalan sa pagitan ng mga bumibili at nagbebenta ng mga produktong petrolyo.

Sa datos ng Department of Energy (DOE) nito lamang Hulyo a-26 hanggang a-28, ang year-to-date adjustment sa kada litro ng gasolina ay pumalo na sa P67. 40 centavos hanggang P77. 81 centavos habang P74. 5 centavos hanggang P77. 75 centavos naman ang kada litro ng diesel.

Isang sunog ang nagaganap sa opisina ng Commission on Elections sa Palacio del Gobernador sa Intramuros, Manila.

Batay sa report ng Bureau of Fire Protection-National Capital Region Public Information Office, nagsimula ang sunog sa ika-7 palapag ng gusali.

Itinaas sa unang alarma ang sunog bandang 6:53pm ng gabi kanina at umabot sa ikalawang alarma bandang 7:02pm.

Sinabi ng BFP na kontrolado na ang sunog dakong 8:05pm ngayong gabi, Hulyo 31, 2022.

Naglabas ng pahayag ang pamilya ng yumaong si dating Pangulong Fidel V. Ramos.
Anila, ikinalungkot ng kanilang pamilya pagkamatay ng dating pangulo.
Kaugnay nito, pinasalamatan din nila ang mga nagpahatid ng pakikiramay.
Iaanunsyo naman ng nasabing pamilya sa lalong madaling panahon ang detalye ng burol ng dating pangulo.

Naghahanda na ang Social Security System (SSS) para magpaabot ng kanilang Social Calamity Assistance sa mga biktima ng magnitude 7 na lindol na tumama sa Northern Luzon.

Ayon kay SSS spokesperson Fernan Nicolas naghahanda na ang SSS na maglabas ng cash calamity assistance, 3-month advance pension at Calamity House Improvement program.

”Sa ngayon po ay naghahanda ang Social Security System na maglabas ng calamity assistance package para po doon sa mga naapektuhan nitong nakaraang lindol nitong nakaraang linggo ang component po nito ay tatlo, number 1 po yung calamity loan, pangalawa para naman po doon sa ating mga pensioner 3-month advance pension, pangatlo sa ating mga miyembro na ang kanilang bahay ay nasira so mayroon po kaming Calamity House Improvement program.

- SSS spokesperson Fernan Nicolas sa panayam ng DWIZ

Dagdag pa ni Nicolas, para sa calamity loan nasa P20,000 ang maaaring maipahiram ng ahensya na nakabase sa kontribusyon ng mga miyembro

Habang ukol naman sa 3 month pension ay nakadepende sa laki ng pensyon na natatanggap ng pensioner at hanggang P1M naman ang pwedeng mapahiram ng Kagawaran para sa House Improvement  Program.

Ilan pang ahensiya ng pamahalaan ang nagpadala ng tulong sa mga lugar na naapektuhan ng magnitude 7 na lindol sa Abra.

Kabilang dito ang Department of Social Welfare and Development na nagpaabot ng P4.7 million na halaga ng food at non-food items sa Cordillera Administrative Region at Region 2.

Kahapon din naghatid ng ayuda sa Abra ang Quezon City na nagbitbit ng 250 partition tents, 500 hygiene kits, 500 first aid kits, 500 COVID kits, pagkain at kitchen supplies.

Kasama rin sa kanilang ipinadala ang mga health workers na magsasagawa ng Mental health at Psychosocial services gayundin ng Rapid damage assessment and needs analysis.

Samantala, maliban sa mga nabanggit ay inihayag rin ng TESDA ang kahandaan nilang tumulong sa mga nasalanta ng pagyanig sa pamamagitan ng TESDAMAYAN’ Program.

Asahan na ng mga motorista sa susunod na linggo ang ipatutupad na dagdag-bawas sa presyo sa mga produkto ng petrolyo.

Base sa oil trade monitoring sa nakalipas na apat na araw, ay maaaring mabawasan ng P1 hanggang P1.20 ang presyo kada litro ng diesel, habang tataas naman ng P0.50 hanggang P0.70 ang kada litro ng gasolina.

Nabatid na ang inaasahang dagdag-bawas sa presyo ng produktong diesel at gasolina ay maaari pa ring magbago depende sa paggalaw sa kalakalan.

Samantala, bunsod nito, ang Year-To-Date na kabuuang adjustments ay tumaas ang presyo sa kada litro ng gasolina ng P18.90, P32.95 sa kada litro ng diesel, habang P28.5 naman sa kada litro ng kerosene.

Inanunsiyo ng Department of Health (DOH) na tatagal ng 14-21 days ang quarantine period para sa mga taong na-exposed virus o sakit na monkeypox.

Ayon kay health undersecretary Dr. Beverly Ho, matagal bago makita ang sintomas ng monkeypox kaya hinabaan ang quarantine period para sa mga nagkaroon ng closed contact sa taong positibo sa nasabing sakit.

Aniya, hindi gaanong marami ang bakuna ng monkeypox sa bansa kaya kailangan pang bumili nito sa Amerika.

Samantala, pinayuhan din ng opisyal ang publiko na mag-ingat sa mga nakakasalamuha lalo na sa mga nakakatalik dahil sa posibilidad na mahawa ng monkeypox.

Maglalaan ng 20 milyong piso na support at assistance fund ang Department of Migrant Workers (DMW) para sa pamilya ng overseas Filipino workers na naapektuhan ng tumamang malakas na lindol sa Northern Luzon.

Sinabi ni DMW Secretary Susan “Toots” Ople na inisyal na alokasyon pa lamang ito upang matulungan ang mga pamilya ng OFWs.

Maliban dito, ipinag-utos na rin ng kalihim sa Overseas Workers Welfare Administration (OWWA) na maghatid ng iba pang assistance.

Sa ngayon, hinihintay pa ng DMW ang damage assessment report ng National Disaster Risk Reduction and Management Council (NDRRMC) para madetermina ang mga rehiyon na pinakaapektado upang maisaprayoridad ito.

Samantala, hinihikayat ng kalihim ang mga apektadong pamilya ng OFWs na mag-apply sa DMW financial assistance sa pinakamalapit na OWWA office sa kanilang rehiyon.