HOT STORIES OF THE WEEK

Pinag-aaralan na ng Department of Education ang posibilidad na palitan ang “outdated” at mamahaling laptops para sa mga guro na binili sa pamamagitan ng Procurement Service ng Department of Budget and Management (PS-DBM) noong 2021.

Inihayag ni DepEd Spokesperson Atty. Michael Poa na may dalawa silang hakbang sa isyu ng P2.4 billion halaga ng mga laptop na binili sa gitna ng covid-19 pandemic.

Una anya ay internal na suriin ang laptop upang agad na magamit o magkasa ng legal remedies para rito.

Kabilang naman sa mga rekomendasyon ng Commission on Audit nang sitahin ang DepEd sa isyu ay i-evaluate ang concerns ng mga recipient sa kondisyon, performance at technical specifications ng mga laptop at makipag-ugnayan sa PS-DBM para sa tamang aksyon.

Sakaling hilingin ng DepEd ang warranty provisions ng laptop supplier, idinagdag ni Poa na susuriin nila kung mayroong magagawa hinggil sa mga laptop o kailangang agad palitan ang mga ito.

Ilan pang opisyal ng Department of Transportation at attached agency nitong Metro Rail Transit Line 3 ang itinalaga ni Pangulong Bongbong Marcos.

Ayon sa DOTr, opisyal nang umupo sa pwesto si Jorjette Aquino bilang Assistant Secretary for Railways ng kagawaran.

Nanumpa naman bilang MRT-3 General Manager si Federico Canar, Jr. at Engr. Oscar Bongon bilang bagong Director of Operations ng MRT-3.

Magugunitang itinalaga si Bongon bilang officer-in-charge ng MRT-3 noong Hulyo.

Pinangasiwaan naman ni DOTr Secretary Jaime Bautista ang oath-taking ceremony ng mga bagong talagang opisyal.

Isinasapinal na ng Department of National Defense (DND) ang termination sa pagbili ng Pilipinas ng helicopters mula sa Russia.

Ayon kay DND Spokesperson Director Arsenio Andolong, nakikipagnegosasyon na ang bansa sa ilalim ng bagong liderato ng DND para sa pagbili ng mga mi-17 heavy-lift helicopters para sa air force na nagkakahalaga ng P12.7 billion.

Nabatid na sinelyuhan ang kontrata sa pagitan ng Pilipinas at Russia sa panahon ni dating Defense Sec. Delfin Lorenzana, na siyang magsusuplay ng mga nabanggit na helicopter.

Sinabi ni Andolong na mayroon nang naibayad ang pamahalaan na downpayment na P1.9 billion sa kumpanyang Sovtechnoexport at bumuo narin sila ng DND contract termination and review committee, na siyang tututok sa proseso ng pag-terminate sa nasabing kontrata.

Kinumpirma ng Department of Education (DepEd) na pansamantala munang gagamit ng makeshift classrooms ang mga mag-aaral na naapektuhan ng lindol sa Northern Luzon sa pagbabalik ng klase sa Agosto a-22.

Kasunod ito ng ikinasang pagpupulong ng House Committee on North Luzon growth quadrangle kung saan, ipinakita ni DepEd Assistant Secretary Francis Cesar Bringas ang mga eskwelahang nasira makaraang tumama ang magnitude 7 na lindol.

Ayon kay Bringas, nasa 704 na eskwelahan ang nasira ng lindol sa Region 1, Region 2, Region 3 at Cordillera Administrative Region (CAR).

Nilinaw ni Bringas na ang mga school room na walang sira, open gymanasium, makeshift tent at social hall ang gagamitin bilang temporary learning spaces o makeshift rooms ng mga mag-aaral.

Ipinaalala ni Bringas na sa gitna ng pagsasagawa ng full-day in-person classes, dapat ay nasusunod parin ang health protocols partikular na ang pagsuot ng facemask, pagdisinfect, paghuhugas ng kamay at social distancing para masiguro ang kaligtasan ng bawat isa.

Sa ngayon, humiling narin ang kagawaran ng dagdag na mga tents sa Unicef para magamit bilang temporary classroom.

Nakatakdang ilabas ng Department of Trade and Industry (DTI) ang price range ng mga school supplies sa susunod na linggo.

Ito ay kaugnay sa nalalapit na pagbubukas ng klase sa Agosto 22.

Ayon kay DTI Undersecretary Ruth Castelo, kanilang ibabatay ang SRP sa quality ng item, volume at kung saan ito yari.

Halimbawa na lang aniya dito ang notebook partikular sa kung ilan ang pahina nito maging ang ruler na may mabibiling bakal, plastic at kahoy.

Dagdag pa ni Castelo, konsiderasyon din sa pagtatakda ng SRP na gagawin ng DTI kung saan ito maaaring mabili, kung ito ba ay sa Divisoria, sa bookstore o sa loob ng mall.

Magkakaiba aniya talaga ang presyo nito kaya’t lalagyan nila ng price range ang kanilang SRP.

Itinalaga ni Pangulong Ferdinand Marcos Jr., ang TV host-comedian na si Arnell Ignacio bilang bagong Overseas Workers Welfare Administration (OWWA) Administrator.

Si Ignacio ang papalit kay outgoing OWWA Administrator Hans Leo Cacdac, at sa ngayon ay wala pang inaanunsyo kung sino ang papalit kay Ignacio bilang OWWA Deputy Administrator.

Bago ito ay nagsilbi rin si Ignacio sa OWWA sa ilalim ng administrasyon ni dating Pangulong Rodrigo Duterte.

Nagpaalala ang Department of Education (DepEd) sa mga paaralan kasunod ng ulat na ilang guro ang nagso-solicit ng mga materyales na gagamitin sa Brigada Eskwela.

Ayon sa DepEd, hindi dapat tumanggap ng pera o mag-solicit ang Public school officials mula sa mga magulang at stakeholders, alinsunod sa DepEd Order 062.

Ang Brigada Eskwela anila ang tutugon sa mga learning resource gaps na gagawin sa pamamagitan nang pagpapalakas ng ugnayan sa mga local at national level.

Noong August 1 sinimulan ng DepEd ang nationwide Brigada Eskwela para sa School Year 2022-2023.

Sa ilalim nito gagawin ang paglilinis, pagpipintura at pagkukumpuni ng mga sirang gamit sa mga public schools, bilang bahagi ng preparasyon sa muling pagbubukas ng klase.

Walang Filipinong nasaktan o nasawi sa record-breaking na pag-ulan na nagdulot ng matinding pagbaha sa South Korea.

Tiniyak ng Department of Foreign Affairs na naka-monitor na ang Philippine Embassy sa SoKor sa sitwasyon, partikular sa kabisera na Seoul.

Ayon sa DFA, nakikipag-ugnayan na rin ang embahada sa Filipino communities.

Sa datos ng South Korean Interior at Safety Ministries, walo na ang patay habang pito ang nawawala makaraang malubog sa baha bunsod ng malakas na pag-ulan simula noong Lunes.

Ito na ang pinaka-malakas na pag-ulan sa South Korea sa nakalipas na walong dekada.

Tumaas sa 38.2% ang bilang ng mga manggagawang edad 65 pataas noong Hunyo.

Katumbas ito ng 2,538,000 workers na edad 65 noong Hunyo kumpara sa 34.9% o 2,304,000 noong Mayo.

Batay ito sa pinaka-bagong labor force survey ng Philippine Statistics Authority (PSA).

Ayon kay PSA Undersecretary Dennis Mapa, inaasahang maghahanap ng trabaho o karagdagang pagkakakitaan, gaya ng mga senior citizen upang mapunan ang pang-araw-araw nilang pangangailangan.

Sa ilalim ng labor code ng bansa, ang compulsory retirement age ay 65, pero dahil sa patuloy na pagtaas ng presyo ng mga bilihin, gaya ng pagkain, napipilitan kahit mga lolo’t lola na magpatuloy sa pagtatrabaho.

Magugunitang inihain sa kamara ni Senior Citizen Party-List Rep. Rodolfo “Ompong” Ordanes ang House Bill 3220 na layuning tanggalin ang retirement age.

Alinsunod sa panukalang batas, maaaring magpasya ang isang empleyadong edad animnapu’t lima kung magreretiro na o magpapatuloy sa pagta-trabaho basta’t malakas pa ang katawan at gusto ng kanyang employer.

Hindi rin pabor ang commuter group na Passenger Forum sa panawagan ng Land Transportation Office (LTO) sa mga local government unit na suspendihin ang No-Contact Apprehension Policy (NCAP).

Ayon kay Passenger Forum Convenor Primo Morillo, malaki ang naitulong ng NCAP halimbawa sa Quezon City kung saan nabawasan ng 30% ang traffic violations habang 80% sa Bataan.

Hindi anya napapanahon kung sususpendihin ang NCAP lalo’t malapit na ang pagbabalik-eskwela ng milyun-milyong estudyante.

Ipinunto ni Morillo na dahil sa NCAP ay matitiyak kahit paano ang kaligtasan ng mga pasahero, partikular ang mga bata sa kalsada.

Una nang inihayag ni LTO chief at Transportation Assistant Secretary Teofilo Guadiz III na umaaray na ang mga public utility vehicle operator sa pagbabayad ng multa para sa traffic violations ng kanilang drivers dahil sa NCAP.