Aabot sa 121 flight ang kinansela habang 11 naman ang na-divert dahil sa epekto ng Bagyong Inday at pag-aalburoto ng Bulkang Kanlaon, ayon sa Civil Aviation Authority of the Philippines (CAAP).
Sa panayam sa programang Reporter’s Hour ni Raoul Esperas sinabi ni CAAP Spokesperson Eric Apolonio na mula Hulyo 9 hanggang Hulyo 11, umabot na sa 132 flights ang naapektuhan ng masamang panahon at volcanic ash.
Para naman bukas, Hulyo 12, isang domestic flight patungong Basco, Batanes pa lamang ang nakansela, habang wala pang naitatalang kanselasyon sa mga international flight.
Gayunman, sinabi ng CAAP na nakadepende pa rin sa lagay ng panahon ang operasyon ng mga biyahe, lalo na sa mga rutang patungong Taiwan at Japan na patuloy na nakararanas ng malalakas na hangin at ulan.
Tiniyak naman ng CAAP na nananatiling ligtas at ganap na operational ang mga paliparan sa bansa sa kabila ng pananalasa ng bagyo.
