HOT STORIES OF THE WEEK

Aabot sa 581 personnel ng Metropolitan Manila Development Authority (MMDA) ang ipapakalat malapit sa mga paaralan para sa pagbabalik ng face-to-face classes.

Ayon kay MMDA Task Force Special Operations Chief Bong Nebrija, nakikipag-ugnayan na ang kanilang ahensya sa mga lokal na pamahalaan bilang paghahanda sa muling pagbubukas ng klase.

Bahagi rin aniya ng preparasyon ang pagsasagawa ng misting, fogging, at clearing operations sa paligid ng mga paaralan.

Una rito, sinabi ng MMDA na muli nitong ipatutupad ang “Number Coding Scheme” sa Metro Manila simula sa Agosto 15, mula ala-7:00 ng umaga hanggang alas-10:00 ng umaga, at ala-5:00 ng hapon hanggang alas-8:00 ng gabi bilang paghahanda sa face-to-face classes ng mga estudyante.

Iniimbestigahan na ng palasyo ang mga opisyal ng Sugar Regulatory Administration (SRA) matapos maglabas ng hindi otorisadong resolusyon para sa importasyon ng 300,000 metric tons ng asukal.

Ayon kay Press Secretary Trixie Cruz-Angeles, walang pahintulot ni Pangulong Bongbong Marcos, na tumatayong agriculture secretary at chairman ng Sugar Regulatory Board ang nilagdaang resolusyon ni Agriculture Undersecretary Leocadio Sebastian. 

Sensitibo anyang bagay ang importasyon lalo na ang mga agri-product kaya kailangan itong balansehin.

Nagpapatuloy naman ang imbestigasyon upang matukoy kung may gumawa ng sariling aksyon habang nakabatay sa pagsisiyasat kung ilang opisyal ang masisibak sa pwesto.

“Huwag ninyong niloloko ang ading ko!”

Ito ang banta ni Senador Imee Marcos makaraang manawagan na lansagin ang namamayagpag na sindikato ng mga kawatan sa Department of Agriculture.

Hindi nagustuhan ni Senator Marcos ang ulat na ginamit ang Office of the President upang palusutin ang binabalak na importasyon ng asukal.

Sa kabila nito, pinuri ng senador ang kapatid na si Pangulong Bongbong Marcos sa pagbasura sa planong importasyon ng 300,000 metric tons ng asukal.

Kasabay nito ay inihirit ng mambabatas sa pangulo na magsagawa ng balasahan sa matataas na opisyal ng DA Upang buwagin na ang mga sindikato sa gobyerno.

Una nang isinumbong ng local sugar producers sa tanggapan ni Marcos na lumampas na sa P100 ang kada kilo.

Ito’y dahil binabakuran o hinaharangan ng mga abusadong manufacturer ng sugared products ang mga imported na asukal kaya hindi na ito umaabot sa mga konsyumer.

Samantala, pinaiimbestigahan ng presidential sister Marcos si DA Undersecretary Leocadio Sebastian at iba pang mga opisyal ng ahensya kung bakit binawi ang pagharang sa importasyon ng mga processed animal protein o PAP mula Italy at iba pang bansa na kontaminado ng african swine fever.

Ibinunyag ng senador na si Sebastian ang pumirma sa memo noong August 5 na magpapalusot sa pag-angkat ng PAP sa Pilipinas kahit may a.s.f. sa Italy.

Inihayag ni Press Secretary Trixie Cruz-Angeles, na isa sa mga napag-usapan sa pulong nina Pangulong Ferdinand Marcos, Jr. at ng mga opisyal ng Department of Trade and Industry (DTI) noong Miyerkules ay ang pagtitiyak na magiging abot-kaya ang presyo ng fertilizer o abono para sa mga magsasaka.

Ayon kay Angeles, layunin ng pamahalaan na mapataas pa ang productivity ng mga magsasaka at maprotektahan ang lahat sa industriya ng agrikultura ng bansa.

Matatandaan na una nang sinabi ng pangulo na makakabili ng mas murang pataba ang bansa, sa ilalim ng government to government deals.

Sa ngayon, nakikipag-ugnayan na ang pamahalaan sa gobyerno ng China, Indonesia, United Arab of Emirates (UAE), Malaysia, at Russia para sa procurement ng fertilizers.

Muling nanawagan sa publiko ang Bangko Sentral ng Pilipinas (BSP) hinggil sa mga namemeke ng pera.

Kasunod ito ng pagkakadakip sa isang Cameroonian national matapos mahuli sa aktong nagbebenta ng pekeng 100 dollars banknote at pagkakaaresto rin ng isa pang nag-ngangalang Gonki Gregory Abueh.

Ayon sa mga otoridad, si Abueh ay naaresto ng pinagsanib puwersa ng mga tauhan ng Quezon City Police Anti-Cybercrime team at BSP’s payments and Currency Investigation Group (PCIG) makaraang ikasa ang entrapment operation sa lungsod ng Makati.

Sa pahayag ng BSP, ang pagkakaaresto sa mga namemeke ng pera ay magsilbi na sanang aral at paalala sa publiko para mas maging alerto ang bawat isa hinggil sa isyu.

Nagpaalala naman ang BSP na agad i-report sa kanilang tanggapan ang anumang impormasyon ng pamemeke ng pera.

Nakiisa ang ilang senador sa pagluluksa sa pagpanaw ng isang alamat na si Asia’s Sprint Queen na si Lydia De Vega-Mercado.

Nagpaabot ng pasasalamat at pagkilala si Senator Lito Lapid sa atletang nagbigay ng napakaraming karangalan sa ating bansa.

Nakakalungkot anya na nagkasakit si Lydia pero kahit kailan, hindi mabubura ang iniwan nyang alaala ng galing at husay ng pagiging isang atletang Pilipino.

Maging si Senator Robin Padilla ay nagsabing hindi natin malilimutan ang karangalang ibinigay niya sa ating mga Pilipino mula noong dekada otsenta.

Dahil anya kay Lydia naging kahanga-hanga ang Pilipinas sa ating mga karatig bansa.

Giit pa ni Padilla dapat nating pasalamatan ang inspirasyong ibinigay sa atin ni Lydia hindi lamang bilang atleta kung hindi bilang Pilipino. —sa ulat ni Cely Ortega-Bueno (Patrol 19)

Nagpasalamat si Pangulong Ferdinand ‘Bongbong’ Marcos Jr. sa malaking kontribusyon ng mga health researchers para labanan ang COVID-19 pandemic sa bansa.

Ginawa ni Marcos ang pahayag sa kanyang pagdalo sa 15th Philippine National Health Research System (PNHRS) week na idinaos sa Clark, Pampanga.

Sinabi ng pangulo na maituturing na frontliners ang mga health researchers kahit wala sa mga ospital ang mga ito.

Ito’y dahil sa kanilang mga kaalaman at datos mula sa kanilang pananaliksik upang malabanan ang naturang sakit.

Dagdag pa ng punong ehekutibo, malaking bagay ang mga ginagawa ng mga health researchers para makamit kung anuman ang mga napagtagumpayan ng bansa pati na ng buong mundo.

Tiniyak naman ng Pangulong Marcos na patuloy umanong nakasuporta ang kanyang administrasyon sa health research community. —sa ulat ni Jopel Pelenio (Patrol 17)

Pinaghahandaan na ng Office of the Press Secretary (OPS) ang accomplishment report para sa kanilang unang 100 araw sa ahensya.

Ito’y bahagi na rin ng direktiba ni Pangulong Ferdinand ‘Bongbong’ Marcos Jr.

Ayon kay Press Secretary Atty. Trixie Cruz-Angeles, kasama sa kanilang report ang ipinatutupad na single messaging policy kung saan sila ay nakikipag-ugnayan sa iba pang tanggapan ng pamahalaan para sa pangulo.

Maliban dito, isa rin sa naipatupad ng OPS ay ang mabigyang prayoridad ang nasa government media.

Ani Angeles, ito ang maituturing na stand-out policy ng ahensya kung saan mas nauuna ang government media sa paghahatid ng paunang anunsiyo at impormasyon sa publiko.

Tinutulan ni Pangulong Ferdinand ‘Bongbong’ Marcos Junior ang rekomendasyong mag-angkat ng karagdagang 300,000 metrikong toneladang asukal.

Kinumpirma ni Press Secretary Trixie Cruz-Angeles ang ulat sa kabila ng pagmahal at shortage ng asukal sa merkado.

Ayon kay Cruz-Angeles, walang kalakip na termino o kondisyon ang desisyon ni Pangulong Marcos.

Ang punong ehekutibo anya ang tumatayong kalihim ng Department of Agriculture (DA) at may hurisdiksyon sa Sugar Regulatory Adminstration (SRA).

Una nang inihayag ng SRA na ang 300,000 metric tons imported sugar ay sapat na upang mapunan ang local demand at mapigilan ang labis na pagtaas ng presyo ng nasabing produkto.

Nag-donate ang Taiwan ng $200,000 o mahigit P11 million sa Pilipinas bilang tulong sa disaster relief operations matapos ang malakas na lindol sa Northern Luzon.

Personal na ini-abot ni Taipei Economic and Cultural Office in the Philippines o TECO Representative Peiyung Hsu ang donasyon kay Manila Economic and Cultural Office Chairperson Silvestre Bello III.

Sinaksihan naman ang hand-over ceremony ni Abra Governor Dominic Valera.

Ayon kay Hsu, nakiki-simpatya ang taiwan sa mga biktima ng lindol at nakikiramay sa pamilya ng mga namatayan.

Tiniyak naman ng kinatawan ng TECO na patuloy na makikipag-ugnayan ang Taiwan sa Pilipinas para sa disaster prevention and climate resilience.