HOT STORIES OF THE WEEK

Tiniyak ng Department of Health (DOH) na may naitabing pondo ang pamahalaan, para sa pagbili ng bagong bakuna laban sa mga bagong variants ng COVID-19.

Ayon kay Health officer-in-charge Maria Rosario Vergeire, bago pa kumalat ang mga bagong sub-variants ng virus ay nakapag-plano na ang DOH na maglaan ng pondo.

Sa Oktubre inaasahang ilalabas ng mga manufacturers ang bagong batch ng bakuna.

Gayunman, aminado si Vergeire na matatagalan pa itong mapamahagi sa publiko dahil kailangan pang mabigyan ng gobyerno ng Emergency Use Authorization ang mga manufacturer.

Una nang ikinabahala ni Vaccine Expert Panel, chairperson Nina Gloriani ang pag-usbong ng mga bagong COVID-19 variants sa bansa, na papalit sa Omicron.

Pinagkokomento na ng Supreme Court ang Land Transportation Office, Metropolitan Manila Development Authority at 5 Local Government Units sa Metro Manila sa petisyon ng transport groups laban sa No-Contact Apprehension Policy (NCAP).

Ito ang kinumpirma ni SC spokesman, Atty. Brian Keith Hosaka makaraang talakayin kahapon ng mga mahistrado sa kanilang Regular En banc session ang petisyon ng mga transport group.

Sa En banc resolution, inatasan din ng SC ang LTO at mga LGU na magkomento kung bakit hindi dapat patawan ng Temporary Restraining Order ang NCAP.

Binigyan naman ng Korte Suprema ang mga respondent ng 10 araw para makapaghain ng kanilang komento.

Ang mga naghain ng petisyon ay ang grupong KAPIT, Pasang-Masda, ACTO at ALTODAP at bukod sa LTO at MMDA respondent din ang mga Local Government ng City of Manila, Quezon City, Valenzuela City, Parañaque City at Muntinlupa City.

Kinukuwestyon ng petitioners ang ligalidad ng implementasyon ng NCAP dahil wala umano itong basehan sa ilalim ng R.A. 7924 na enabling charter ng MMDA at RA 4136 na lumikha sa LTO.

Ipinatupad ng limang LGU ang NCAP alinsunod sa February 2016 resolution ng MMDA.

Gayunman, nakasaad sa argumento ng mga transport group na wala namang balidong batas o ordinasang ini-adopt ang mga Local City Councils na nagpapahintulot sa MMDA na palawakin ang Traffic Rules and Regulations.

Ipinunto pa ng petitioners na “Invalid” ang mga ordinansa ng mga LGU na nagbigay-daan sa NCAP dahil walang ipinasang batas ang kongreso na magpapahintulot sa implementasyon ng nasabing polisiya.

Suportado ni MMDA Task Force Special Operations chief Bong Nebrija ang Nationwide Implementation ng No-Contact Apprehension Policy (NCAP).

Ito’y sa kabila ng mga reklamo ng operators at motorista sa paniningil umano ng malaking multa ng mga Local Government Unit na nagpapatupad ng nasabing polisiya.

Ayon kay Nebrija, mas maiging magkaroon NCAP ang lahat ng lungsod upang magkaroon ng Universal Traffic Rule.

Bagaman nakatutulong sa Traffic Enforcers sa pagsita sa violators, aminado si Nebrija na kailangang talakayin sa stakeholders ang mga isyung bumabalot sa polisiya.

Kamakailan ay kinuwestyon ng ilang transport group sa Supreme Court ang ligalidad ng NCAP at ipinanawagan ang suspensyon nito dahil sa hindi na umano makatarungang paniningil ng multa.

Itinutulak ni Manila Teachers party-list Rep. Virgilio Lacson ang panukalang magtayo ng ospital para sa mga guro at estudyante.

Sa House 2809 o ang panukalang Philippine National Hospital for Teachers and Students Act, binigyang diin ni Lacson ang kahalagahan ng papel na ginagampanan ng mga guro sa lipunan.

Nakasaad sa naturang panukala ang paglalaan ng P20 bilyong inisyal na pondo para maprotektahan ang mga guro sa anumang estado.

Ayon kay Lacson, ang bawat ospital ay mayroong kakayahan na tumanggap ng 500 pasyente at may sariling isolation at quarantine facility na magagamit upang maiwasan ang pagkalat ng COVID-19 lalot nalalapit na ang pagbabalik ng face-to-face classes ng mga mag-aaral sa Agosto a-22.

Suportado ni Architect Felino “Jun” Palafox Jr., ang mungkahi ni senator Robinhood Padilla kaugnay sa paggamit ng cable cars upang mabawasan ang traffic, partikular sa Metro Manila.

Sa panayam ng DWIZ, sinabi ni Palafox na matagal na rin nila itong iminungkahi at mayroon na rin silang mga disenyo para dito.

Marami aniyang magandang maidudulot ang cable cars at environment-friendly rin ito.

Maliban dito, bumaba rin ang crime rate sa mga bansang gumagamit ng cable cars, gaya ng siyudad ng Medellin sa Columbia.

Cable cars are environment friendly, doesn’t pollute, it doesn’t require wide right of ways and yung mga towers non we can design them as iconic landmarks…and it gives chance for us para kang naka helicopter like a bird flying over the city and there will be panoramic views of the city…

Sinabi pa ni Palafox na kakayanin naman na maisakatuparan ang mungkahi ni senador Padilla.

Kung Dubai ito in 18 months kaya, kung mga desisyon sa Dubai ang bilis magdesisyon … baka wala,  baka 1 year kaya, kailangan talaga visionary leadership, strong political will with appreciation of  good urban planning   and urban transport planning good de..select architecture engineering and excellent management  ofcourse good citizenship also everytime may magpopost ng proposal, magpropose ng magagandang  rekomendasyon agad-agad ang daming kumokontra…

Ang pahayag ni Architect Felino “Jun” Palafox Jr., sa panayam ng DWIZ.

Isang linggo bago ang balik-eskwela, inaasahan na ng MMDA ang pagdagsa ng mga sasakyan, lalo sa mga panganuhing kalsada tulad ng EDSA.

Sa tantsa ni MMDA task force Special Operations chief Bong Nebrija, nasa 426, 000 hanggang 430, 000 vehicles per day ang inaasahan sa EDSA simula Agosto a – 22.

Kumpara ito sa 405, 000 na naitalang dami ng mga sasakyan sa EDSA sa pre-pandemic period noong 2019.

Inabisuhan naman ni Nebrija ang mga motorista na dumaan na lamang muna sa mga alternatibong ruta hangga’t maaari upang makaiwas sa inaasahang mabigat na daloy ng trapiko.

Magdedeploy anya ang MMDA ng 581 enforcers sa 146 na public schools sa Metro Manila upang matiyak ang maayos na daloy ng trapiko sa mga nasabing lugar.

Bukod pa ito sa ipinatutupad na No-Contact Apprehension Program para sa implementasyon ng Expanded Number Coding Scheme.

Sa ilalim ng Expanded number coding scheme, nilinaw ng MMDA na hindi na exempted ang mga senior citizen at persons with disabilities.

Tanging exempted ay mga Public Utility Vehicles, Motorsiklo, Transport Network Vehicle Services, Garbage at Fuel trucks, maging ang mga sasakyang mag-de-deliver ng essential goods.

Inilabas na ng Light Rail Transit Authority (LRTA) ang guidelines para sa libreng-sakay ng mga estudytante sa Agosto 22 na tatagal hanggang Nobyemre 5.

Ayon kay LRTA Administrator Attorney Hernando Cabrera, ang mga estudyante lamang mula sa elementarya hanggang kolehiyo ang sakop ng nasabing libreng-sakay sa LRT-2.

Aniya, hindi kasama rito ang mga kumukuha ng master’s degree at graduate students.

Kailangan namang magbayad ng pamasahe ng mga magulang o guardian na maghahatid sa estudyante sa paaralan na sasakay sa LRT-2.

Para sa mga mag-aaral na mag-a-avail ng libreng-sakay, pumunta lamang sa passenger assistant booth at ipakita ang school ID at enrollment form para mabigyan ng ticket.

Nagpasalamat ang Armed Forces of the Philippines (AFP) sa SM Foundation Incorporated (SMFI) Wellness Center dahil sa patuloy na pagtulong nito sa kanilang ahensiya sa larangang medikal.

Sa panayam ng DWIZ, sinabi ni Maj. Cenon Pancito, Group commander ng Media & Civil Affairs Group ng Civil Relations Service ng AFP na matagal nang tumutulong ang SMFI sa AFP sa pamamagitan ng pagtatayo ng mga pagamutan.

Lalo pa aniya itong naging matatag ngayon lalo na sa pagtugon sa mga nananawagan ng tulong sa gitna ng pandemya.

Noong nagkaroon po ng COVID kailangan din po namin makipag-ugnayan sa SM Foundation ay talaga naman mabilis lang din kausapin na there is in need. Ang pinupunto ko lang po dito kung ano po ang need ay ‘yung po nasa puso po lagi ni SM, kaya nga po kami wala talagang ibang masabi kundi salamat SM. Sa simula pa lang I just came in V Luna in 2016 pero ang dami na nilang nagawa and up to now ay talagang tumutulong pa rin sila sa amin

Maliban sa pagtulong sa AFP, bukas din ang SMFI sa iba pang mga serbisyo.

Ayon kay Roma Hierro, project supervisor ng SMFI health and medical programs, tumutulong din ang kanilang organisasyon sa pangangalaga sa Felicidad Sy wellness centers.

Ito po ay sa ilalim ng programa namin na “upkeep and maintenance”. Dito po sa programa naming ito binibisita po namin ang aming mga wellness center na nangangailangan ng atensyon at doon po chine-check namin ang mga pangangailangan nila. Tama po na sa upkeep maintenance sa nabangkit po ni doktora na repainting at saka ‘yung mga minor na civil works, also pinapalitan po natin ‘yung mga kagamitan ng kailangan nila na kailangan nang palitan. Ginagawa po ito ng SM Foundation dahil gusto namin masiguro na ang mga wellness centers na aming tinulungan ay patuloy na nagbibigay ng kalidad na serbisyong medikal sa ating mga kababayan.

Nagbabala sa publiko ang Philippine Postal Office (PHILPOST) kaugnay sa isang Scam Quiz Game na umiikot ngayon sa social media.

Ito ay isang Link kung saan may tanong na sasagutan at kung tumama, ay may tsansa nang manalo ng P7-K na makukuha kung  shinare ang link sa ibang tao.

Ayon sa PHILPOST, hindi totoo ang impormasyon na namimigay ng Financial Aid ang PHILPOST.

Habang hindi rin gawain ng ahensya na tumawag, mag-text, mag-email, at humingi ng personal na impormasyon para makapag-claim ng anumang package.

Tinitignang anggulo ng PHILPOST ang pagkakaroon ng access ng scammer sa mga personal na impormasyon na hihingin ng website sa oras na i-click ang link.