Nakapagtala ng karagdagang dalawang kaso ng Monkeypox ang Pilipinas.
Ayon kay DOH Officer-In-Charge Maria Rosario Vergeire, ang mga bagong kaso ay nasa edad 34 at 29 na may travel history sa mga bansang may kumpirmadong kaso ng Monkeypox.
Aniya, nagpositibo ang mga ito kahapon at ngayong araw.
Dagdag ni Vergeire, nagsasagawa na ang kagawaran ng contact tracing.
Matatandaang, inanunsiyo ang unang kaso noong July 29 kung saan nakita ito sa isang Pinoy na umuwi ng bansa.
Magkakaroon na ng pagbagsak-presyo sa kada kilo ng asukal sa mga supermarket.
Ito ay matapos makipag-usap si Executive Secretary Victor Rodriguez sa mga may-ari ng malalaking mall at mga kilala ring mga supermarket
Mula sa 90 hanggang 110 sa kada kilo, pumayag ang malalaking supermarket na ibaba ito sa 70 pesos kada kilo.
Ang mga supermarket na pumayag ay ang Robinson’s supermarket, SM Supermarket, Puregold supermarket, at SNR membership shopping.
Kaugnay nito ay pinuri naman ng Malakanyang o ni President Ferdinand “Bongbong” Marcos Jr., ang sakripisyo ng mga negosyante na isinasantabi na muna ang kanilang kita alang-ala sa publiko.
May basbas na ni Pangulong Bongbong Marcos ang pag-a-angkat ng 150,000 metric tons ng asukal.
Ito ang kinumpirma ni Press Secretary Trixie Cruz-Angeles makaraan ang pulong sa malakanyang ni Pangulong Marcos kasama si Senate President Juan Miguel Zubiri at mga nasa sugar industry.
Ayon kay Cruz-Angeles, mismong malalaking business owner na gumagamit ng asukal sa kanilang produkto ang nakausap ni PBBM noong Miyerkules.
Gayunman, wala pa anyang itinakdang panahon kung kailan mag-i-import ng asukal.
Dalawang warehouse ng asukal ang sinalakay ng Bureau of Customs katuwang ang iba pang government agency sa mga lungsod ng San Fernando, Pampanga at San Jose Del Monte, Bulacan.
Alinsunod ito sa utos ni Pangulong Bongbong Marcos na ipatupad ang “visitorial powers” sa lahat ng mga bodega o customs bonded warehouse upang masiyasat ang imbentaryo, partikular ang mga imported agricultural products at mabatid kung may nagaganap na “hoarding”.
Tinatayang 44,000 sacks o katumbas ng P220 million ang halaga ng mga nakumpiskang mga nakaimbak na asukal na hinihinalang inimport mula Thailand, bukod pa sa mga nadatnang mga sako ng corn starch, harina flour, plastic products at mga plastic barrel ng mantika.
Pinasok ng mga otoridad ang bodega na matatagpuan sa New Public Market, barangay Del Pilar, San Fernando at natiyempuhan ang Chinese-Filipino warehouse keeper na si Jimmy.
Sinalakay din ang dalawang warehouse na pag-aari ng isang Victor Chua sa San Jose Del Monte City.
Batay sa natanggap na impormasyon ng BOC, ginagawa umanong imbakan ng mga hino-hoard na asukal ang mga nasabing bodega upang pataasin ang presyo sa merkado.
Humirit na si Pangulong Bongbong Marcos, Jr sa mga trader na ibaba hanggang P70 ang kada kilo ng presyo ng asukal.
Ayon kay Pangulong Marcos, nakikipag-negosasyon na ang gobyerno sa mga negosyante na nag-alok ng P80 kada kilo pero kanyang hihilingin na ibaba pa hanggang P70.
Naaawa anya ang punong ehekutibo sa mga mamamayan at umaasang mapagbibigyan ng mga negosyante ang kanyang hirit na tapyasan ang presyo ng asukal.
Iginiit naman ng pangulo na may supply pa ang bansa kaya’t hindi pa kailangang mag-import sa ngayon.
Namemeligro na ring magmahal ang mga matatamis na sitsirya dahil sa pagtaas ng presyo ng asukal.
Ito ang inamin ni Philippine Confectionary Biscuit Snacks Association President Kissinger Sy sa gitna ng numinipis na supply ng refined sugar.
Magugunitang sumirit na sa mahigit P100 ang kada kilo ng refined sugar sa ilang pamilihan.
Ayon kay Sy, posibleng apektado na rin ng sugar price increase ang mga manufacturer ng mga matatamis na sitsirya.
Hindi na anya nakapagtataka kung may ilang maliit na negosyo na kulang sa pambili ng asukal ang magsara o magtipid.
Samantala, bukod sa tinapay ay nakatakda na ring itaas ng mga panadero ang presyo ng cake at iba pang pastry dahil sa mahal na asukal, mantika at iba pang cost input.
Inihayag ni Philbaking President Johnlu Koa na posibleng sa setyembre pa ipatupad ng adjustment sa presyo ng kanilang mga produkto depende sa magiging tugon ng Department of Trade and Industry sa kanilang hiling.
Ipinanawagan ni Infectious Disease Expert Dr. Rontgene Solante na kailangang magpatupad ng mandatory covid-19 vaccination para sa mga guro sa gitna ng lalargang face-to-face classes sa Lunes.
Layunin nitong magkaroon ng wall of immunity sa mga paaralan, lalo’t hindi pa nagwawakas ang covid-19 pandemic.
Ayon kay Solante, kahit malapit na ang pagbabalik-eskwela, marami pa ring mga guro ang hindi pa nagpapabakuna.
Kailangan anyang maging mabuting halimbawa ang mga teacher sa mga estudyante sa pagsunod sa vaccination.
Hinikayat naman ng health expert ang mga guro at estudyante na sumunod sa minimum public health standards gaya ng pagsusuot ng face masks, paghuhugas ng kamay at pagtitiyak na mayroong proper ventilation sa mga silid-aralan.
Maglulunsad si Pangulong Bongbong Marcos ng malawakang balasahan sa Sugar Regulatory Administration.
Ito’y sa gitna nang pagbibitiw sa tungkulin ng ilang mataas na opisyal ng ahensya dahil sa kontrobersiyal na sugar import resolution.
Inihayag ni Pangulong Marcos, na tumatayong kalihim ng Department of Agriculture, na layunin ng naka-umang na re-organisasyon sa SRA na i-promote ang paglago ng sugar industry ng bansa.
Maaari anyang matapos ngayong linggo ang isasagawang rigodon.
Bumuo na ang Commission on Audit (COA) ng task force upang imbestigahan ang umano’y overpriced laptops para sa public school teachers.
Ito, ayon kay Department of Education Spokesman Michael Poa, ay makaraang hilingin nila sa COA na magkasa ng fraud audit sa mga biniling laptop.
Ang mga nasabing electronic gadget ay binili ng Department of Budget and Management-Procurement Service para sa DepEd.
Dahil dito, inanunsyo naman ni Senate Blue Ribbon Committee Chairman Francis Tolentino na kasado na sa Agosto a – 25 ang imbestigasyon ng mataas na kapulungan ng Kongreso.
Kampante ang Kamara na maaaprubahan na sa ikatlo at huling pagbasa ang panukalang P5.2 Trillion peso National Budget para sa taong 2023 bago ang Setyembre a-30.
Ito ang inihayag nina House Majority Leader Manuel Jose Dalipe, Representatives Stella Quimbo at Margarita Ignacia Nograles matapos maagang ipasa sa Kamara ang panukalang pondo bago ang deadline sa Agosto 22.
Ayon kay Dalipe, maaga nilang ipinasa ang panukala upang magkaroon ng mahabang oras ang lahat na suriin itong mabuti.
Umaasa naman si Quimbo na sa Setyembre a-16 matatapos ng Committee on Appropriationsang pagdinig.
Ito’y upang mabigyan ng dalawang linggo ang plenaryo na magsagawa ng deliberasyon bago aprubahan sa final reading ang panukalang pondo.
Sa ngayon, naghahanda nang magsagawa ng pulong ang appropriations panel upang mapaghandaan ang deliberasyon sa 2023 budget.