HOT STORIES OF THE WEEK

Umabot na sa mahigit 141 million pesos cash assistance ang naipamahagi ng Department of Social Welfare and Development (DSWD) para sa mga mahihirap na estudyante kasunod ng muling pagbubukas ng klase bukas.

Batay sa datos na ipinakita ni DSWD Undersecretary Jerico Javier sa kaniyang Facebook account,  kabuuang 141,049,500 pesos educational aid ang naibigay sa 48,033 na mga benepisyaryo ngayong araw.

Karamihan sa tulong-pinansyal na nagkakahalagang 20,760,000 ay naipamahagi sa 5,144 benepisyaryo sa Western Visayas.

Sinundan ito ng Ilocos Region na may 20,422,000 pesos para sa 5,715 benepisyaryo, CALABARZON na may 14,292,000 pesos para sa 5,019 benepisyaryo at Cagayan Valley na may 10,563,000 pesos para sa 4,360 benepisyaryo.

4,191,000 pesos educational aid naman ang naipaabot sa 1,594 benepisyaryo sa National Capital Region (NCR).

Nakikipag-ugnayan naman ang kagawaran sa Department of the Interior and Local Government (DILG) para sa distribusyon ng naturang cash aid sa pamamagitan ng Local Government Units (LGUs) matapos hindi makaabot sa cut-off ang ilang benepisyaryo dahil sa pagdagsa ng mga tao sa kanilang mga tanggapan.

Inilunsad ni Food and Drug Administration (FDA) Director general Dr. Samuel Zacate ang isang taskforce na magbibigay-daan upang gawing komersyal ang mga bakuna kontra COVID-19.

Ang taskforce Edward na ipinangalan sa isang British physician na si Dr. Edward Jenner na kilala sa kaniyang kontribusyon sa immunization ay naglalayon na gawing mas madali sa mga pilipino na makuha ang ligtas at epektibong bakuna sa COVID-19.

Sa ilalim ng nasabing task force, ang mga bakunang maaaprubahan matapos ang evaluation ay bibigyan ng Certificate of Product Registration(CPR) at magiging available sa FDA-licensed drug establishments.

Nabatid na una nang naglabas ang gobyerno ng Emergency Use Authorizations o EUA sa mga bakuna at gamot sa COVID-19 na napapailalim sa ilang kondisyon.

Nagkasundo na sina DSWD secretary Erwin Tulfo at Interior Secretary Benhur Abalos para sa mas maayos na pamamahagi ng educational assistance sa bansa.

Kasunod ito ng paghingi ng tulong ni Tulfo sa mga LGUs matapos dumugin ng tao ang pamamahagi ng ayuda kahapon.

Sa panayam ng DWIZ, sinabi ni Tulfo na ang mismong LGUs na ang maghahanap ng venue kung saan magtutungo ang mga kukuha ng ayuda.

Halimbawa rito ang mga malls, covered court, gymnasium na isasapubliko sa Huwebes o Biyernes.

This time… ang gagawin natin, ang DSWD ang mag iinterview at ang magpapayout lamang, ang mga tauhan ng city hall sila magbibigay, pero kami ang magiinterview sa frontline, so, sa likod naming… ay ang mga social worker namin ay ang payout na, so ganun ang mangyayari, kami ang magi-interview…. Hindi yung tiga city hall.. taga munisipyo..”

Sa datos ng DSWD kahapon, aabot sa P141 million na halaga ng educational assistance ang naipamahagi ng DSWD sa 48, 000 mag-aaral.

Posible pa sanang mapataas ang bilang pero sinuspinde ito ng DSWD sa ilang bahagi ng bansa.

Tiniyak naman ni Tulfo na babawi siya sa susunod na linggo para mas marami ang makakuha ng tulong.

Dapat po mas mataas pa doon.. sa sir, unfortunately nagkagulo nga po…ayun nadisorganize, pero like I said po, babawi kami next week, dahil ang gagawin po namin ay nakipagugnayan na po kami sa DILG kahapon, at naggagawa po kami ng Memorandum of Agreement para bukas ibaba na po namin sa mga lungsod ng munisipyo, bayan ang pagbibigyan ng ayuda, so hindi na lalayo, yung mga kababayan natin, hahanapin ang DSWD offices kundi doon na mismo sa mga bayan nila o sa mga lungsod sila pupunta para kumuha ng kanilang educational assistance”. —DSWD secretary Erwin Tulfo sa panayam ng DWIZ

Dapat isama sa panukalang 2023 National Budget ang 25 billion pesos na pondo para sa pagtaas ng pensyon ng mga mahihirap na senior citizen.

Ito ang hiniling ni Surigao Del Sur Rep. Johnny Pimentel sa Malakanyang kasunod ng pagsasabatas ng Republic Act No. 11916 kung saan dinagdagan ng P500 ang kasalukuyang P1,000 na pensyon ng mahihirap na mga lolo at lola sa bansa.

Nakapaloob sa taunang budget ng Department of Social Welfare and Development (DSWD) ang pondo para sa social pension program for indigent senior citizens.

Aniya, hindi kasama sa DSWD budget ang salaping kakailanganin para sa pension hike ng 4.1 milyong indigent senior citizen sa bansa.

Giit pa nito na malaking tulong ang maibibigay ng pension increase para matugunan ang mga pangangailangan ng mga kapos-palad na senior citizen.

Kinumpirma ng Malakanyang na magsasagawa ng state visit si Pangulong Ferdinand “Bongbong” Marcos Jr. sa mga bansang Indonesia at Singapore sa susunod na buwan.

Ayon kay Press Secretary Trixie Cruz-Angeles, unang bibisitahin ni Pangulong Marcos ang Indonesia mula September 4 hanggang 6 at isusunod ang Singapore mula September 6 hanggang 7, 2022.

Aniya, tinanggap din ng Punong Ehekutibo ang imbitasyon ni US President Joe Biden para bisitahin ang Washington.

Samantala, wala pang eksaktong petsa ang nakatakda para sa pagbisita ng Pangulo sa Washington.

Nakaamba na namang tumaas ang presyo ng produktong petrolyo sa susunod na linggo.

Ito’y matapos ang 7 linggong sunod-sunod na rollback sa presyo ng langis.

Ayon sa Department of Energy (DOE) Oil Industry Management Bureau, tinatayang nasa higit 2 pesos ang posibleng dagdag sa presyo sa kada litro ng diesel at kerosene, habang nasa P0.25 naman ang dagdag-presyo sa kada litro ng gasolina.

Paliwanag ng ahensya, lumaki ang pagbaba sa imbentaryo ng krudo ng United States habang ramdam pa rin ang kakulangan sa suplay ng petrolyo dahil sa tensyon sa pagitan ng Russia at Ukraine.

Itinalaga si Benny Antiporda bilang bagong administrator ng NIA.

Hinalal si Antiporda sa katatapos na 984th National Irrigation Administration (NIA) regular board meeting

Bago ang kanyang bagong appointment, itinalaga noon ni dating Pangulong Rodrigo Duterte sa puwesto si Antiporda bilang senior deputy administrator ng NIA.

Unang naitalaga si Antiporda sa Department of Environment and Natural Resources (DENR), kung saan tinutukan niya ang paglilinis sa isla ng Boracay matapos sumailalim sa malawakang paglilinis at rehabilitasyon kasama ang magkasanib na pagsisikap ng Boracay Inter-Agency Task Force.

Maliban sa pagbuwag sa mga ilegal na istruktura at muling pag-aayos ng sistema ng dumi sa mga turista sa beach.

Mamamahagi ng P5,000 cash allowance ang Department of Education (DepEd) para sa lahat ng mga guro sa muling pagbubukas ng klase sa Agosto 22.

Ayon kay DepEd spokesperson Michael Poa, ito ay makatutulong para sa karagdagang gastos ng mga teacher.

Nilinaw rin niya na hindi magmumula sa Maintenance and Other Operating Expenses (MOOE) ng paaralan ang pondong gagamitin sa nasabing assistance.

Samantala, tiniyak ni Poa na lahat ng mga guro ay makatatanggap ng naturang ayuda.