HOT STORIES OF THE WEEK

Inihayag ng Philippine National Police (PNP) na handa silang magdeploy ng mga bus para sa Libreng Sakay Program ng Pamahalaan sa gitna ng face-to-face classes ng mga mag-aaral kung kinakailangan.

Ayon kay PNP chief Pol. Gen. Rodolfo Azurin Jr., may posibilidad na magkaroon ng kakulangan sa mga pampublikong sasakyan dahil mas dumami na ngayon ang bilang ng mga pasaherong sumasakay sa pampublikong transportasyon dahil sa pagbabalik-eskwela.

Sinabi ni Azurin, na ipauubaya na ng kanilang ahensya sa Department of Transportation (DOTr) at Department of Education (DepEd) ang desisyon kung kakailanganin ang mga karagdagang bus mula sa PNP.

Nilinaw naman ni Azurin na nakahanda ang kanilang tanggapan anomang oras para alalayan ang pangangailangan ng mga pasaherong bumibiyahe araw-araw.

Binalaan ni Interior secretary Benhur Abalos ang mga personnel ng Bureau of Jail Management and Penology na nasasangkot sa ilegal na droga at iba pang ilegal na aktibidad.

Sa kanyang pahayag sa 31st Anniversary ng Bureau of Jail Management and Penology, iginiit ni Abalos na kailangang linisin ang mga personnel ng BJMP upang mailayo ang mga preso sa ilegal na droga, pagpasok ng electronic communication gaya ng cellphone, pagpasok ng baril, patalim at iba pang kontrabando sa mga piitan.

Ayon sa Kalihim, patuloy ang isinasagawang programa ng BJMP upang mapigilan at masawata ang pagpasok ng COVID-19 sa mga bilangguan at ang rehabilitasyon sa mga Persons Deprived of Liberty (PDL).

Iminungkahi rin ni Abalos ang pagsasagawa ng drug test sa mga PDL sa buong bansa upang matukoy kung gumagamit ng ilegal na droga ang mga ito.

Para naman anya maisagawa ang rehabilitasyon ng mga PDL ay kailangang maresolba ang siksikan sa mga kulungan.

Nakapagtala na ng ika-4 na kaso ng monkeypox virus sa bansa.

Kinumpirma ng Department of Health na isang 25-anyos na Filipino ang naka-isolate pero walang travel history sa anumang bansa na may mga kaso ng monkeypox.

Napag-alamang positibo sa naturang virus ang Pinoy matapos ang Real Time Polymerase Chain Reaction (PCR) test ng DOH Research Institute for Tropical Medicine at inilabas ang resulta noong August 19.

Nagpapatuloy ang Intensive Case Investigation at Contact Tracing at sa ngayon ay mayroon ng 14 na close contact ang natukoy.

Nilinaw naman ni DOH Officer-In-Charge, Undersecretary Maria Rosario Vergeire na hindi magkakaugnay ang apat na kaso ng monkeypox sa bansa.

Inusisa ni Pangulong Ferdinand “Bongbong” Marcos Jr., ang pagdagsa ng mga tao sa tanggapan ng Department of Social Welfare and Development (DSWD) na nagresulta ng stampede at pagkasugat ng mga kwalipikado para sa educational assistance.

Sa pahayag ni DSWD secretary Erwin Tulfo, nito lamang Sabado ng umaga ay nakatanggap siya ng tawag mula sa Punong Ehekutibo upang tanungin at alamin ang dahilan ng pagdami at paghaba ng pila ng mga tao sa labas ng DSWD office.

Nilinaw ni Tulfo sa Pangulo na ang dahilan ng pagdagsa ng mga tao sa labas ng kanilang ahensya ay dahil binuksan umano nila sa lahat ang pagbibigay ng ayudang pang-edukasyon para sa mga estudyante na nasa in crisis situation.

Ayon kay Tulfo, naiintindihan naman daw ng Pangulo ang kaniyang paliwanag kung saan, pinatutu-tukan ng Punong Ehekutibo  ang naturang sitwasyon.

Sa ngayon ay nakikipag-ugnayan na sila sa Department of the Interior and Local Government (DILG) para sa Memorandum of Agreement upang gawing pay out ang pamamahagi ng cash assistance na pangungunahan pa rin ng DSWD.

Unti-unti nang lumalapit sa Northern Luzon ang Bagyong Florita na kasalukuyang nasa East Philippine Sea.

Ayon kay PAGASA weather specialist Aldczar Aurelio, ang layo ng sentro ng bagyo ay nasa 310 kilometers East of Casiguran, Aurora.

Napanatili ng Bagyong Florita ang lakas ng hanging aabot sa 55 kilometers per hour na may pagbugsong aabot sa 70 kilometers per hour.

Patuloy na kumikilos ang bagyo pakanluran-timog-kanluran sa bilis na aabot sa 20 kilometers per hour.

Kasalukuyan paring hinahatak ng Bagyong Florita ang Southwest Monsoon o Hanging Habagat kung saan, naaapektuhan nito ang Southern Luzon at Visayas.

Sakaling hindi magbago ang pagkilos ng Bagyong Florita, asahan na maglalandfall ito pagsapit ng Martes ng hapon o gabi sa baybayin ng Cagayan o Northern Isabela.

Posible din magkaroon ng pangalawang landfall sa Babuyan Islands at dadaan sa West Philippine Sea at maaring maging severe tropical storm habang palabas ng Philippine Area of Responsibility (PAR) pagsapit ng Miyerkules ng gabi.

Sa ngayon, nakataas ang Tropical Cyclone Wind Signal No. 1 sa Cagayan, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Ilocos Norte, Ilocos Sur at Northern Aurora.

Bigo pa rin ang Department of Health na maabot ang target na makapagbakuna ng 23 million COVID-19 vaccine booster sa ilalim ng “PinasLakas” vaccination drive.

Aminado si DOH Officer-In-Charge Maria Rosario Vergeire na 1, 729, 547 pa lamang ang nabigyan ng booster o 7% ang kanilang natuturukan mula sa kabuuang target hanggang October 8.

Ayon kay Vergeire, base sa pag-aaral ay maaari pang tumaas ang Admission sa mga ospital sa Setyembre o Oktubre kung hindi darami ang magpapaturok ng booster.

Dahil dito, muling nanawagan ang opisyal sa publiko na magpabakuna bilang proteksyon kontra COVID-19.

Hiniling ng National Parents-Teachers Association (NPTA) Philippines ang pagkakaroon ng tatlong class shift para sa ilang paaralan sa pagsisimula ng Academic Year 2022-2023 ngayong araw.

Ito, ayon kay NPTA Philippines president Willy Rodriguez, ay sa gitna pa rin ng presensya ng COVID-19 pandemic.

Maaari anyang magpatupad ng tatlong shift sa sandaling kulangin ang mga silid-aralan.

Tiniyak ni Rodriguez na handa ang mga magulang sa pagbubukas ng klase sa kabila ng mga hamon na kinakaharap, tulad ng kakulangan ng mga classroom dahil sa dumaraming mag-aaral kada taon.

Samantala, iminungkahi ng NPTA na dagdagan ang palapag ng mga school building at gawing 6 stories ang itatayong mga gusali sa halip na apat na palapag lamang upang makapag-accommodate ng mas maraming estudyante.

Ipinag-utos na ni Bureau of Customs Commissioner Yogi Filemon Ruiz ang pagsasagawa ng imbestigasyon sa apat na rice shipments na ibinagsak sa Port of Iloilo mula Vietnam.

Ito’y makaraang makatanggap si Ruiz ng mga ulat na mismong mga BOC official sa Iloilo ang nagbigay basbas upang i-diskarga ang nasa 38,400 metric tons ng bigas simula noong August 4 hanggang 13.

Nagkakahalaga ang nasabing kargamento ng P1 billion na lulan ng 20 cargo vessels.

Ayon kay Ruiz, nakikipag-ugnayan na ang Aduwana sa iba’t ibang stakeholders na nakatutok sa inspeksyon ng mga shipment, gaya ng Bureau of Plant Industry (BPI) ng Department of Agriculture.

Itinanggi naman ni BOC-Port of Iloilo District Collector Ciriaco Ugay ang alegasyon ng Rice Smuggling sa Iloilo Port dahil wala umanong “history” nang pagpupuslit ng bigas sa nasabing pantalan.

Nilinaw din ng BOC-Collection District 6 na mayroong mga clearance at permit ang kinukwestyong kargamento mula sa BPI alinsunod sa Rice Tariffication Law.

Good news para sa mga estudyante!

Magkakaroon ng libreng-sakay ang Philippine Coast Guard (pcg) sa Quezon City at Maynila sa unang araw ng klase bukas, Agosto 22.

Ito ang inihayag ni PCG commandant Artemio Abu na dalawa hanggang tatlong coast guard bus ang ide-deploy nila mula alas -6 ng umaga hanggang alas-9 ng umaga at mula alas-4 ng hapon hanggang alas-7 ng gabi.

Mula sa Quezon City hall, bibiyahe ang mga naturang bus para magsakay ng mga pasahero patungong University belt sa España, Maynila.

Bago naman bumalik sa Quezon City ang coast guard bus ay dadaan muna ito sa Luneta Park.

Samantala, ipinaalala ng PCG sa mga mag-aaral na sasakay sa nasabing bus na magsuot ng facemask at magdala ng alcohol.

Inihihirit ng dalawang ahensya ng gobyerno sa Metropolitan Manila Development Authority (MMDA) na pansamantalang suspendihin ang pagpapatupad ng “No Contact Apprehension Policy” sa mga pampublikong sasakyan para sa pagbubukas ng klase bukas.

Ayon sa Department of Transportation (DOTr) at Land Transportation Franchising and Regulatory Board (LTFRB), nag-request na sila sa MMDA kaugnay rito dahil sa mas maraming bilang ng pasahero na inaasahan sa Metro Manila bunsod ng pagbubukas ng klase.

Sinabi pa ng DOTr na nagsumite sila ng letter of request sa MMDA habang naglabas naman ang LTFRB ng dalawang memorandum circulars na nagpapahintulot sa 33 buses, 68 jeepneys at 32 UV express na ruta.

Tiniyak naman ng MMDA sa DOTr na walang mahuhuling mga PUV dahil hindi pa ito naglalabas ng Certifcate of Public Convenience (CPC) para sa mga rutang bubuksan bukas.

Nilinaw rin ng MMDA na exempted ang PUVs sa kanilang number coding scheme pero iginiit nito na hindi sila exempted sa paglabag sa batas-trapiko.

Muli namang nagpaalala ang LTFRB sa mga drayber at operator ng pampublikong sasakyan na sundin ang mga polisiya sa kanilang franchise at provisional authorities.