HOT STORIES OF THE WEEK

Nasa 375,000 hanggang 400,000 mag-aaral sa buong bansa ang makikinabang sa educational cash aid mula sa Department of Social Welfare and Development.

Ito ang tiniyak ni DSWD Secretary Erwin Tulfo makaraang lagdaan nila ni Interior Secretary Benhur Abalos ang memorandum of agreement para sa maayos na distribusyon ng cash aid.

Ipamamahagi ang cash aid sa mga mahirap na estudyante mula elementarya hanggang college level, tuwing Sabado hanggang September 24.

Tinukoy sa kasunduan ang mga tungkulin ng dalawang ahensya kasabay ng kanilang kolaborasyon upang maiwasang maulit ang magulong distribusyon noong August 20.

Tiniyak ng Administrasyong Marcos na tututukan ang online sexual exploitation sa mga kabataan sa bansa.

Ito ay matapos mapag-alaman ng ilang miyembro ng gabinete na nangunguna ang Pilipinas pagdating sa child pornography maging sa child trafficking sa buong mundo.

Nabatid na halos lahat ng probinsya sa bansa ay nakitaan ng video ng panghahalay sa mga kabataan o menor de edad para pagkakitaan.

Ayon kay Department of Justice (DOJ) Secretary Jesus Crispin “Boying” Remulla, ang naturang mga video ay ibinibenta umano sa mga dayuhan kung saan, simula taong 2016 hanggang ngayong taon, pumalo na sa mahigit isangdaang kaso ng child pornography na naitala ng Department of the Interior and Local Government (DILG).

Sa pahayag ng DILG, sa nasabing bilang, 67 ang naisampang kaso; 2 ang tumangging magsampa ng kaso; 33 ang patuloy na iniimbestigahan; habang tatlo naman ang case closed o naisara.

Samantala, kumpiyansa naman si DSWD Secretary Erwin Tulfo na nangunguna sa mga dahilan kung bakit dumadami ang kaso ng child pornography sa bansa ay dahil narin mismo sa kanilang mga magulang na kumukuha ng video sa kanilang mga anak para kumita ng malaking halaga ng pera.

Naniniwala naman ang mga opisyal na mas lumala pa ang naturang mga kaso nang magsimula ang lockdown sa bansa dahil sa covid-19 pandemic.

Aabot sa P287.95 million pesos ang halaga ng pondong inilaan ng Department of Social Welfare and Development (DSWD) para sa livelihood grants at modified shelter assistance ng mga dating rebelde na nagbalik loob sa pamahalaan.

Ayon kay DSWD Under Secretary for Inclusive and Sustainable Peace Alan Tanjusay, ang naturang programa ay isa lamang sa mga pangako ng kanilang ahensya  sa pagtupad ng “no one is left behind” o walang maiiwanan sa pamumuno ng administrasyong Marcos.

Bukod pa dito, inilaan din ang naturang pondo para sa cash-for-work programs para rin sa mga dating kasapi ng New People Army (NPA), at mga decommissioned combatant na mga muslim rebel.

Layunin ng inilaan na pondo na makapagtayo ng 150 shelters sa mga barangay sa labing tatlong rehiyon partikular na sa Zamboanga Peninsula.

Sinibak ang anim na opisyal ng Bureau of Customs (BOC) sa Port of Subic.

Kabilang sa mga sinibak sina District Collector Maritess Theodossis Martin, Deputy Collector for Assessment Maita Sering Acevedo, Deputy Collector for Operations Giovannie Ferdinand Aguillon Leynes.

Bukod pa ito kina Belinda Fernando Lim – Chief, Assessment Division, Vincent Mark Solamin Malasmas – Commander ng Enforcement Security Service at Justice Roman Silvoza Geli – Ciis Supervisor.

Ayon kay acting Customs Commissioner Yogi Filemon Ruiz, ang mga nasabing opisyal ay pansamantalang inilipat sa Office of the Commissioner habang iniimbestigahan pa ang umano’y smuggling ng asukal mula sa Thailand.

Una nang lumabas sa imbestigasyon ng BOC – Customs Intelligence and Investigation Service na ang imported sugar ay gumamit ng recycled permit o import permit na nagamit na sa mga nakalipas na inangkat na asukal.

Magugunitang ibinabala ni Press Secretary Trixie Cruz-Angeles na mananagot ang sinuman sa customs kapag napatunayang nakipagsabwatan ang mga tauhan at opisyal ng BOC sa smugglers gamit ang recycled sugar import permits.

Umabot na sa mahigit 1,300 pamilya o nasa 4,000 katao na ang apektado ng Bagyong Florita sa Northern Luzon.

Ito ang kinumpirma ng National Disaster Risk Reduction and Management Council (NDRRMC) matapos lumabas ng Philippine Area of Responsibility ang bagyo, kanina.

Ayon kay NDRRMC spokesman Mark Timbal, karamihan sa mga naapektuhan ay mula sa Ilocos, Cagayan Valley at Cordillera Administrative Regions.

Nagdulot din anya ng landslides at flashfloods ang malakas na pag-ulan sa mga nasabing rehiyon, maging sa Bicol.

Samantala, inaalam pa ng NDRRMC ang halaga ng mga napinsalang imprastraktura at agrikultura.

Handang magbigay ng agarang tulong ang Department of Social Welfare and Development (DSWD) sa Region 2 na nakararanas ngayon ng matinding pananalasa ng Bagyo Florita.

Ayon kay DSWD secretary Erwin Tulfo, nakatutok ang kanilang ahensya partikular na ang DSWD Regions 1 at 2 maging sa Cordillera Administrative Region (CAR) sakaling lumala pa ang epekto ng bagyo.

Sinabi ni Tulfo, na nagsasagawa na ng clustering ang kanilang regional offices para alalayan ang mga rehiyon na kailangan ng reinforcement.

Nabatid na naglaan ang kanilang ahensya ng P20 million hanggang P25 million para sa Assistance to Individuals in Crisis Situation (AICS) sa bahagi ng Ilocos Region.

Bukod pa dito, nakaantabay narin ang Region 3 para tumulong sa paghahatid ng mga pagkain at iba pang pangangailangan sa mga apektadong lugar kung kinakailangan.

Naka-alerto narin ang kanilang National Response Operation Center Warehouse sa Pasay City para sa pamamahagi ng food packs sa mga rehiyong maaapektuhan ng bagyo.

Nasa labas na ng Philippine Area of Responsibility (PAR) ang Bagyong Florita at bahagyang bumilis habang patungong kanluran-hilagang-kanluran ng bansa.

Ayon sa PAGASA weather bureau, namataan ang sentro ng Severe Tropical Storm “Florita” sa layong 335 kilometers kanlurang bahagi ng Calayan, Cagayan sa labas ng PAR na may lakas ng hanging aabot sa 95 kilometers per hour at pagbugsong aabot sa 115 kilometers per hour.

Kumikilos ang bagyong Florita pakanluran-hilagang-kanluran sa bilis na 30 kilometers per hour.

Samantala, nakataas parin ang Signal no. 1 sa Batanes, Babuyan Islands, kanlurang bahagi ng Mainland Cagayan, Apayao, Abra, kanlurang bahagi ng Kalinga, kanlurang bahagi ng Mountain Province, hilagang-kanluran ng Benguet, Ilocos Norte, Ilocos Sur, at La Union.

Bineberipika na ng Department of Health (DOH) ang posibleng local tranmission ng monkeypox virus sa bansa.

Ayon kay DOH Officer in Charge (OIC) Usec. Maria Rosario Vergeire, tinutukoy na ng kanilang ahensya kung saan nakuha ng pang-apat na pasyente ang naturang sakit.

Sinabi pa ni Vergeire na naka-isolate narin ang 14 na close contact ng naturang pasyente.

Samantala, nilinaw naman ng DOH na walang nararanasang sintomas ang 17 close contacts ng ikatlong monkeypox case na naka-isolate kung saan, 13 sa kanila ay nasa medium-risk.

Sinuspinde ng Malakañang ang trabaho sa gobyerno at pasok sa mga paaralan sa ilang lugar simula kahapon hanggang ngayong araw.

Alinsunod ito sa utos ni Pangulong Bongbong Marcos bunsod ng masamang panahong dulot ng Bagyong Florita.

Saklaw ng suspensyon ang trabaho sa mga tanggapan ng gobyerno at klase sa mga pampublikong paaralan sa Metro Manila, Cavite, Rizal, Bulacan, Laguna, Zambales at Bataan.

Ayon kay Press secretary Trixie Cruz-Angeles, nasa diskresyon na ng mga may-ari o head ng mga pribadong paaralan at tanggapan kung magsususpinde ng trabaho at klase.

Gayunman, inirerekomenda anyang tumalima rin sa kahalintulad na hakbang ang mga nasa Private School at Office.

Una nang nagsuspinde ng klase sa lahat ng antas sa mga pribado at pampublikong paaralan sa Ilocos Sur, Ilocos Norte, Pangasinan, La Union, Cagayan, Pampanga at Nueva Ecija dahil sa bagyo.

Inihayag ni Budget Undersecretary Rosemarie Canda, na pumalo sa P115.6 Billion ang pinalalaan na pondo para sa Pantawid Pamilyang Pilipino Program (4Ps) sa ilalim ng panukalang 2023 National Budget.

Ayon kay Canda, mas mataas ito kung ikukumpara sa inilaang P107.6 Billion na pondo ngayong taon.

Nilinaw ng Kalihim na mayroong sinusunod na compliance rate ang kanilang ahensya kaya hindi maaaring basta babaan ang pondo para sa 4Ps.

Sinabi ni Canda na tumaas ang inilaang pondo para sa naturang programa, dahil pumalo na sa 97% ang compliance rate ngayong taon at sa kabila narin ng pag-lilinis sa listahan ng mga benepisyaryo sa ilalim ng Department of Social Welfare and Development (DSWD).

Nakapaloob naman sa Proposed 2023 national budget, ang 39.31% na inilaan para sa Social Services Sector, pangalawa ang Economic Services Sector na sinundan naman ng General Public Services Sector.

Sa ngayon, ang Department of Education pa rin ang ahensyang may pinakamaking pondo; sinundan ng Department of Public Works and Highways; Department of Health at Philippine Health Insurance Corporation.