HOT STORIES OF THE WEEK

Nanguna ang National Capital Region, Western Visayas at Cagayan Valley sa mga rehiyon sa Pilipinas na nakapagtala ng pinakamaraming kaso ng leptospirosis.

Ayon sa Department of Health (DOH), kabuuang 1, 411 leptospirosis cases na ang mayroon ang bansa na naitala mula Enero hanggang Agosto ngayong taon.

Mas mataas ito ng 22% kumpara sa naitala noong 2021 na nasa 1, 157.

Sa nasabing bilang ng sakit, 19% o 263 ang naitala sa NCR, 12% o 171 sa Western Visayas at 12% o 169 sa Cagayan Valley.

Pumalo naman sa 188 ang mga nasawi sa bansa dahil sa leptospirosis.

Ang leptospirosis ay isang uri ng sakit na nakukuha sa baha na kontaminado ng ihi ng mga hayop partikular ang daga.

Tiniyak ni Pangulong Ferdinand “Bongbong” Marcos Jr. na mananatili ang pag-papairal ng press freedom sa bansa.

Ito ay matapos panumpain sa Malacañang ang mga bagong opisyal ng National Press Club.

Ayon kay Press Secretary Trixie Cruz-Angeles, ginagarantiya ng Pangulo ang kalayaan ng mga mamamahayag sa ilalim ng kanyang administrasyon pati na rin ang proteksyon sa karapatan ng mga ito.

Dagdag pa rito ay sinabi rin ng kalihim na ginagarantiya sa ilalim ng saligang batas ang kalayaan sa pamamahayag at ito ang iiral sa buong termino ni PBBM.

Pinabulaanan ng Land Transportation Office (LTO) na naglabas ito ng pahayag na huwag pumasok ng masyadong maaga ang mga mag-aaral sa paaralan.

Ayon sa ahensya “taken out of context” o naiba ang pakakahulugan sa tinukoy nitong obserbasyon sa unang araw ng pagbubukas ng klase noong Lunes, Agosto 22.

Paliwanag ng LTO, ibinahagi lamang nito ang naging sitwasyon sa ilang paaralan na kung saan may mga mag-aaral na panghapon ang maagang pumapasok dahil hindi pa alam ang kanilang class schedule.

Sinabi pa ng LTO na hindi nito minamasama ang desisyon ng mga magulang o mag-aaral sa pagpasok ng maaga sa paaralan.

Matatandaang umani ng batikos ang umano’y pahayag ng LTO na ikinadismaya ng maraming estudyante.

Walang nakikitang anggulo ng hoarding ang Samahan ng Industriya at Agrikultura (SINAG) sa gitna ng kakapusan ng puting sibuyas sa bansa.

Ito ang binigyang-diin ni SINAG President Rosendo So sa kabila ng mataas na presyo ng sibuyas.

Aniya, ang meron sa ngayon ay mga pulang sibuyas na tatagal ng hanggang Disyembre o Enero.

Dagdag pa niya na lumalabas sa kanilang pagpupulong kasama ang mga grupo ng magsasaka, importers, at mga retailers na pulang sibuyas lamang talaga ang may sapat na suplay ngayon.

Gayunman, kung mayroon aniyang dapat na i-angkat, ito ay ang puting sibuyas para magkaroon ng sapat na suplay nito sa bansa.

Hindi magkakaugnay ang serye ng mga kidnapping na naiuulat sa iba’t ibang bahagi ng bansa.

Ito ang sinabi ni Philippine National Police (PNP) Spokesperson Colonel Jean Fajardo dahil tila magkakaiba ang motibo ng mga suspek na kanilang nahuhuli sa kidnapping.

Aniya, nakatakda na rin silang magsumite kay Interior Secretary Benhur Abalos ng isang “comprehensive” report tungkol sa mga nasabing krimen.

Samantala, sinabi ni Fajardo na ipinag-utos na ni PNP Chief Rodolfo Azurin Jr. ang pagdedeploy ng mas maraming pulis sa kalsada.

Nangako ang Department of Education (DepEd) na di-disiplinahin nila ang gurong nag-viral matapos umanong murahin ang kanyang estudyante sa Camarines Norte.

Ayon sa tita ng grade 5 student, nakaranas ng trauma ang pamangkin matapos tawagin na ‘bobo’, ‘bruha’ at ‘hayop’ ng kaniyang guro sa unang araw pa lamang ng balik-eskwela.

Ang nasabing verbal abuse ay isinulat pa umano ng guro sa papel na iniabot sa estudyante na kalauna’y kinunan ng litrato at nag-viral sa social media.

Ayon kay Education Spokesperson Michael Poa, inatasan na nila ang school head na magsumite ng incident report sa regional director sa loob ng tatlong araw.

Sasailalim din ang sangkot na guro sa administrative proceedings upang malaman ang parusang ipapataw dito.

Sa ngayon, pagtitiyak ng DepEd na hindi nila kukunsintihinang anumang uri ng pang-aabuso lalo na sa mga bata na matagal nang nasabik na pumasok sa paaralan.

Sinimulan nang talakayin ng House Committee on Legislative Franchises ang kwestiyunable umanong kasunduan ng ABS-CBN at TV5.

Kabilang sa mga dumalo si National Telecommunications Commission Chairman Gamaliel Cordoba at ipinuntong nakabinbin pa ang kaso ng ABS-CBN sa NTC kaugnay sa kabiguang kumuha ng permit para sa kanilang pay-per-views noong 2020.

Agad naman kinuwestiyon ni Sagip Party-List Rep. Rodante Marcoleta kung mayroon pang ibang kaso na kinakaharap ang ABS-CBN sa NTC, tulad ng hindi nito pagkakaroon ng permit sa digital broadcast sa Channel 11.

Gayunman, aminado si Cordova na hindi pa nila ito matiyak at titignan pa nila ang mga isyung binanggit.

Inihirit naman ni Marcoleta sa NTC na simulan na ang imbestigasyon dahil dalawang taon nang ibinasura ang prangkisa ng higanteng network.

Umabot na sa mahigit P3-milyong ang halaga ng pinsalang dulot ng bagyong florita sa sektor ng agrikultura.

Ayon sa DA, ang nasabing halaga ay katumbas ng total volume loss na 220 metric tons ng agricultural products, na naka-apekto sa tatlundaan at sampung magsasaka at 628 hectares ng agricultural land.

Pinaka-matinding nakaranas ng pinsala ang mga palayan na may total volume loss na 217 metric tons o P2.9 million sa Northern Luzon.

Damay din ang mga gulayan, partikular ang mga high-value crop maging ang fishing sector.

Tiniyak naman ng DA ang tulong sa mga apektadong magsasaka at mangingisda.

Matapos ibunyag sa DWIZ ni United Sugar Producers Federation President Manuel Lamata, tuluyan nang ni-raid ng Bureau of Customs ang tatlong bodega sa Bukidnon kung saan may naka-imbak na sako-sakong asukal.

Nasa 460,000 na sako ng asukal ang bumulaga sa mga BOC personnel nang salakayin ang mga warehouse ng Crystal Sugar Milling sa North Poblacion, sa bayan ng Maramag.

Alinsunod ito sa utos ni Pangulong Bongbong Marcos na mag-inspeksyon batay na rin sa mga natanggap na intelligence report na nag-ho-hoard umano ng asukal ang mga may-ari ng bodega.

Sa mga nadiskubre, nasa 264,000 sacks ang sinasabing naibenta na pero hindi pa kinukuha sa mga warehouse pero walang maipakitang dokumento ang warehouse manager na si Javier Sagarbarria kung otorisado ang mga naka-imbak na asukal.

Una nang nanawagan si Lamata sa mga otoridad na magsagawa ng inspeksyon sa mga nasabing bodega.

Sinelyuhan na kahapon ng Department of Social Welfare and Development at Interior and Local Government ang memorandum of agreement para sa mas organisadong pamamahagi ng educational cash assistance sa mga mahirap na estudyante.

Batay sa MOA, tutukuyin ng local government units ang mga venue para sa payout ng cash assistance para sa mga students-in-crisis na itinakda tuwing Sabado hanggang September 24.

Ayon kay DSWD Secretary Erwin Tulfo, ang nasabing kasunduan ay isang patunay ng pagnanais ng gobyerno na magkaroon ng nagkakaiisang aksyon at bayanihan.

Naging leksyon din anya ang nangyari noong August 20 at isang “eye opener” sa pangangailangan ng mga Filipino ng ayuda ngayong mayroong covid-19 pandemic.

Pina-alalahanan naman ng kagawaran ang mga claimant na magpa-rehistro muna bago pumunta sa payout sites, lalo’t hindi papayagan ang walk-in beneficiaries upang maiwasan ang siksikan.

Sa ilalim ng kasunduan, ang DILG at local government units ang magtatalaga ng venue ng payout pero ang listahan ng benepisyaryo ay magmumula sa DSWD.

Mula naman sa kalahating bilyong piso, itinaas na sa isa isa’t kalahating bilyong piso ang budget para sa nasabing programa.

Ang DILG at mga lgu rin ang magtatalaga ng additional manpower kung kailangan sa site habang magmumula sa DSWD ang cash aid.