HOT STORIES OF THE WEEK

Tiniyak ni Pangulong Ferdinand Marcos Jr., na mananatiling aktibo ang kanyang administrasyon sa pagsusulong ng mga programang tutugon sa mga pangangailangan ng mga beteranong nakipaglaban noong panahon ng digmaan.

Sinabi ng Punong Ehekutibo na magpapatayo ang pamahalaan ng mga ospital sa Visayas at Mindanao na ilalaan para sa mga beterano.

Kasabay nito, ipinaalala rin sa publiko ang kahalagahan ng pagsunod sa mga direktiba ng pamahalaan kaugnay sa usaping pangkalusugan.—mula sa ulat ni Jopel Pelenio (Patrol 17)

Nanindigan si Finance Secretary Benjamin Diokno na pagsasayang lamang ng pondo ng gobyerno ang pamumudmod ng financial assistance o ayuda kaugnay sa COVID-19 pandemic.

Ayon kay Diokno, dapat na itong itigil lalo’t limitado lamang ang fiscal space ng bansa.

Ipinunto ng kalihim na “fully recovered” na ang Pilipinas sa epekto ng pandemya kaya’t hindi na kailangang mamahagi ng karagdagang ayuda sa mga mahirap na pamilya.

Ang dapat anyang ipagpatuloy ay ang distribusyon ng iba pang financial assistance gaya ng social protection programs para sa senior citizens.

Sa katunayan, aminado si Diokno na pinag-iisipan na ng gobyerno na limitahan na ang bilang ng mga benepisyaryo ng ayuda sa mga mayroong national ID, bilang insentibo para sa mga kumuha nito.

Umaasa pa rin ang Philippine National Police na buhay pa ang 34 na sabungerong nawawala simula pa noong Enero.

Ito’y kahit wala pang natatanggap na anumang “proof of life” ng mga nawawalang sabungero.

Ayon kay PNP spokesperson, Col. Jean Fajardo, mayroon na silang mga impormasyon ng mga posibleng pinuntahan o pinagdalhan ng mga sabungero pero kailangan pa nila itong beripikahin.

Ipagpapatuloy anya nila ang imbestigasyon hanggang makita ang mga nawawala.

Una nang ibinunyag ng PNP-Criminal Investigation and Detection Group na may tumawag sa mga pamilya ng 34 na nawawalang sabungero at inalok ng tig-isang milyong piso.

Sa kondisyon ito na hindi na itutuloy ang paghahanap sa kanilang mga nawawalang kaanak.

Bumuo na ang Philippine National Police ng Special Investigation Task Group na tututok sa kaso ng 34-anyos na lalaking tatlong linggo nang nawawala matapos dukutin sa Lian, Batangas.

Ipinag-utos na rin ni PNP chief, Gen. Rodolfo Azurin Jr. sa Batangas Provincial Police ang pagsasagaw ang malalimang imbestigasyon sa insidente.

Agosto 5 nang dukutin ng mga armadong lalaking nakasakay sa sports utility vehicle si Rodrigo Catibog habang lulan ng motorsiklo kasama ang kanyang girlfriend sa barangay Bungahan.

Nakaligtas ang girlfriend ni Catibog na si alyas Gean habang dinala patungo sa direksyon ng barangay Poblacion ang nobyo.

Samantala, inatasan na rin ni azurin ang Police Regional Office-4A na paspasan na ang imbestigasyon sa insidente ng pagdukot naman sa delivery rider na si eugene del rosario sa bayan ng taal.

Magugunitang dinampot din ng mga armadong lalaki na nakasakay ng SUV si Del Rosario sa isang gasolinahan sa Taal pero kalauna’y natagpuang patay sa Sariaya, Quezon.

Posibleng ipatupad bukas ang limang pisong taas-singil sa presyo ng kada litro ng diesel.

Ayon sa ilang kumpaniya ng langis, nasa P5.40 centavos hanggang P5.70 centavos ang dagdag-singil sa presyo ng kada litro ng diesel habang maglalaro naman sa P1.30 centavos hanggang P1.60 centavos ang kada litro sa presyo ng gasolina.

Sa pahayag ni Department of Energy (DO)E-Oil Industry Management Bureau Dir. Rino Abad, ang paggalaw sa presyo ng langis ay dulot ng epekto sa pagmahal ng krudo sa world market at patuloy na bakbakan sa pagitan ng Russia at Ukraine.

Nabatid na ito na ang ikalawang linggong taas singil sa presyo ng langis ngayong buwan, matapos ang sunod-sunod na rollback nito sa bansa.

Mangungutang muli ng P1.16 Trillion ang Pilipinas sa 2023.

Gagamitin ito upang mapunan ang kakulangan sa panukalang budget sa susunod na taon.

Ayon kay Department of Finance secretary Benjamin Diokno, nasa P3.6 Trillion lamang ang kabuuang revenue projections sa 2023, taliwas sa proposed budget na P5.268 Trillion.

Ang projected expenditures naman ay nasa P5.1 Trillion na may kakulangang P1.16 Trillion.

Sa halaga ng uutangin, 75% ay magmumula sa lokal habang 25% sa foreign sources.

Aminado naman si Diokno na hindi na gaanong mangungutang ang Pilipinas sa susunod na taon dahil aniya, wala ng isang pandemyang magaganap.

Pinaalalahanan ni Armed Forces of the Philippines (AFP) Chief of Staff Lt. General Bartolome Bacarro ang Philippine Navy na puspusang ipagtanggol ang karagatan at himpapawid ng bansa sa lahat ng dayuhang ‘intruders’.

Ang pahayag ay ginawa ng AFP Chief sa kanyang pagbisita sa Navy Headquarters sa Roxas Boulevard sa Maynila.

Si Bacarro ay malugod na tinanggap ni Navy Flag Officer in Command Vice Admiral Adeluis Bordado.

Sa kanyang mensahe, sinabi ni Bacarro na mahalaga ang walang-humpay na naval at maritime patrols ng sa misyon ng AFP na protektahan ang mga mamamayan at ang estado.

Magugunita na ang unang bilin ng Pangulong Ferdinand Marcos Jr. sa Sandatahang Lakas ay siguraduhing walang maisusuko na kahit ‘one square inch’ na teritoryo ng bansa sa mga dayuhang mananakop.

Palalakasin pa ng Department of Health (DOH) ang pagbabantay hinggil sa posibleng mutation ng Monkeypox  virus.

Ayon kay DOH Officer-In-Charge at Undersecretary Maria Rosario Vergeire, hindi isinasantabi ng pamahalaan ang nabanggit na posibilidad na base na rin sa pahayag ni Dr. Rontgene Solante na maaaring mag-mutate ang Monkeypox ng anim hanggang 12 strain dulot ng global outbreak.

Paliwanag ni Vergeire, normal sa virus ang mutations, pero ikinababahala niya na mas mabilis ito lalo kung ang mga tatamaan ay ang vulnerable sector at immunocompromized individuals.

Samantala, nakahanda aniya ang pamahalaan para mas paigtingin ang surveillance, quarantine at isolation upang tiyak na maiwasan ang pagkalat ng monkeypox virus sa bansa.

Pumalo na sa mahigit P44 million ang halaga ng pinsalang iniwan ng Bagyong Florita sa sektor ng agrikultura sa Cordillera.

Ayon kay Cameron Odsey, Regional Director ng Department of Agriculture-Cordillera Regional Disaster Risk Reduction and Management Operations Center, kabilang sa mga nasira ang mahigit P34.9 million na pananim ng palay, P7.2 million na mais at P1.78 million na prutas at upland at lowland vegetables.

Ang Kalinga na naging sentro ng bagyo ay nakapagtala ng P34.9 million na nasirang pananim ng palay at mais.

Sumunod dito ang Apayao na may P7.1 million na damage, Mountain Province na P1.7 million at Ifugao na may P142, 878 nasirang pananim.

Pinaghahanda ng Metropolitan Manila Development Authority (MMDA) ang mga motorista kaugnay sa lalo pang pagbigat ng daloy ng trapiko.

Kasabay ito ng pagbubukas ng marami pang paaralan kabilang ang private schools at paglabas ng mas maraming estudyante.

Ayon kay Traffic Discipline Office head Cris Saroca, dadagdagan nila ang bubuksang ruta na pinayagan ng LTFRB, na inaasahang makakaapekto sa bilang ng mga sasakyan sa lansangan.

Sa Lunes posibleng bumigat ang daloy ng trapiko lalo’t marami ang umuwi sa probinsya bilang paggunita ng National Heroes Day.