Patuloy na umiiral ang Southwest Monsoon o Habagat na nakakaapekto sa hilaga at gitnang bahagi ng Pilipinas, ayon sa PAGASA.
Nagbabala ang weather bureau sa mga residente ng Zambales, Bataan, at Occidental Mindoro na asahan ang kalat-kalat na pag-ulan na maaaring maging katamtaman hanggang malakas at magdulot ng biglaang pagbaha at pagguho ng lupa, lalo na sa mabababang lugar at kabundukan.
Sa Metro Manila, iba pang bahagi ng Luzon, at Visayas, inaasahan ang maulap na kalangitan na may mga pag-ulan at pagkulog dahil sa Habagat.
Samantala, asahan ang bahagyang maulap hanggang maulap na kalangitan na may mga isolated rain showers o thunderstorms sa Mindanao. Bagama’t mas maganda ang panahon sa malaking bahagi ng isla, nagbabala ang ahensya na maaari pa ring magkaroon ng biglaang pagbaha o pagguho ng lupa kapag tumama ang malalakas na thunderstorm.
Samantala, patuloy na mino-monitor ng PAGASA ang isang Low Pressure Area (LPA 07a) sa labas ng Philippine Area of Responsibility (PAR), nasa layong humigit-kumulang 2,205 kilometro silangan ng Eastern Visayas, na may mababang posibilidad na maging isang tropical depression.
