HOT STORIES OF THE WEEK

Tiniyak ng Philippine National Police (PNP) na tinututukan nito ang mga insidente ng krimen laban sa mga estudyanteng babae.

Katunayan, sinabi ni PNP Chief Police Gen. Rodolfo Azurin Jr. na nakapagtala  na sila 149 na kaso ng krimen sa buong bansa mula Hulyo 1 hanggang Agosto 31, taong kasalukuyan.

Nabatid na pinakamarami ang mga naitalang kasong rape sa National Capital Region (NCR) habang ang iba naman ay Acts of Lasciviousness at paglabag sa Anti-Violence Against Women and Their Children Act.

Nagbabala naman si Azurin na hindi intensyon ng PNP na maalarma ang mga mag-aaral pero kailangan aniyang maging maingat ang mga ito.

Nakikipagtulungan din ang pulisya sa Department of Education (DepEd) para masiguro ang kaligtasan ng mga guro at estudyante.

Posibleng bumili ang gobyerno ng sarili nitong petroleum products.

Ito ang inihayag ni DOE asec. Mario Marasigan, kung saan nangunguna ang Philippine National Oil Company (PNOC) sa isinasagawang pag-aaral kung paano makatutulong ang pamahalaan sa pag-iimbak ng langis.

Ngunit nilinaw rin ng opisyal na hindi intensyon ng DOE sa hakbang na ito na makipagkompetensya sa mga oil company.

Sa halip, ito ay upang hindi maantala ang suplay ng langis sa bansa sakaling magkaroon ng problema sa suplay sa international market.

Patay ang isang magsasaka matapos ang landslide sa bayan ng Mayoyao, Ifugao.

Base sa imbestigasyon ng mga otoridad, hindi nakalabas ang biktima sa bahay ng kaniyang kapatid nang gumuho ang lupa dahil sa malakas na ulang dulot ng hanging Habagat na pinalakas ng Bagyong Henry.

Stranded naman ang ilang motorista sa Bontoc, Mountain Province habang baha at hindi na madaanan ang mga kalsada sa Barangay Samoki.

Nagkalat rin ang mga bato at putik sa mga daan sa Barangay Bontoc Ili dahil sa mudslide at rockslide.

Pumalo na sa mahigit 172.4 million pesos ang pinsalang idinulot ng Bagyong Florita sa sektor ng agrikultura sa Cordillera.

Ayon sa Department of Agriculture – Cordillera, kabilang sa mga nasira ngbagyo ang mga pananim ng palay, mais, high-value crops at mga halagang hayop.

Nakaapekto ito sa kabuuang 4,157 farmers at 4,972 hectares ng lupang pang-agrikultura.

Ang lalawigan ng Apayao ang pinakamaraming pinsala sa agrikultura na nasa halos 100 milyong piso.

Sa ngayon, tiniyak ng DA-Cordillera Disaster Risk Reduction and Management ang agarang tulong na ipapamahagi sa mga magsasaka sa Cordillera na naapektuhan ng bagyo.

Kinasuhan na ng rape with homicide ang dalawang suspek sa pagkamatay ni Jovelyn Galleno.

Ito ay matapos makumpirmang pagmamay-ari ng 22 anyos na dalaga ang nakitang bungo at buto sa Palawan sa pamamagitan ng DNA test.

Ayon kay Philippine National Police (PNP) Chief Police General Rodolfo Azurin Junior, kahapon ng umaga isinampa ang kaso kina Leobert Dasmariñas at Jovert Valdestamon.

Noong Agosto 5 nawala si Galleno matapos ang kaniyang shift sa isang boutique sa loob ng isang mall sa Puerto, Princesa City.

Nakikipagtulungan na ang Department of Agriculture (DA) sa Landbank of the Philippines para mapabilis ang pagproseso at pagpapalabas ng tulong pinansyal sa mga benepisyaryo ng Rice Farmers Financial Assistance (RFFA) Program.

Ayon kay Press Secretary Trixie Cruz-Angeles, aabot sa 5,000 piso ang halaga ng cash aid na matatanggap ng mga magsasakang kwalipikado bilang bahagi ng implementasyon ng Rice Tariffication Law sa bansa.

Siniguro ng Landbank of the Philippines ang ayudang ipapamahagi sa mga magsasakang benepisyaryo at para mapabilis ang disbursement ng kanilang mga subsidy.

Sisimulan ang pamamahagi ng ayuda sa Setyembre 7 bilang kompensasyon, sa mga magsasaka ng palay upang mabawasan ang pagkawala ng kita dahil sa pagbaba ng presyo ng palay.

Tatalima na rin ang Metro Manila Development Authority (MMDA), Manila Local Government at ang Quezon City Government, sa inilabas na Temporary Restraining Order ng supreme court na magpapahinto sa implementasyon ng No Contact Apprehension Program (NCAP).

Mahigit isang buwan ito matapos manindigan ang MMDA na hindi nito susundin ang anumang kautusan na magpapahinto sa NCAP.

Sa inilabas na pahayag ng MMDA, sinabi nito na hindi na nila ipapatupad ang NCAP bilang pagtalima sa sinabi ni Supreme Court spokesperson Brian Keith Hosaka na sakop ng tro ang MMDA.

Samantala, bagaman nirerespeto ng Lokal na Pamahalaan ng Quezon City ang kautusan, kumbinsido pa rin ito na nabawasan ng NCAP ang traffic violations sa ilang apektado nitong lugar.

Iniimbestigahan ng Department of Education ang alegasyong sexual harassment ng mga guro sa mga estudyante sa isang paaralan sa bacoor city, cavite.

Aminado si DepEd Spokesman Michael Poa na ang alegasyon ay labis na nakababahala pero kanyang tiniyak na sineseryoso ito ng ahensya.

Ayon kay Poa, nagsasagawa na ng imbestigasyon ang schools division office sa mga alegasyon ng sexual harassment ng anim na guro ng Bacoor National High School sa ilang estudyante.

Magugunitang nagsumbong ang mga mag-aaral hinggil sa malalasuwa umanong mensahe ng mga guro.

Ipinakita ito sa pamamagitan ng screenshots ng umano’y pag-uusap sa messenger na naglalaman ng “sexual advances” at “inappropriate comments” ng mga guro sa mga mag-aaral.

Dahil dito, hindi anya binigyan ng teaching load ang anim na guro habang nagsasagawa ng imbestigasyon.