HOT STORIES OF THE WEEK

Naghain ng guilty plea ang kampo ni Gywneth Anne Chua, isang Filipina traveler na binansagang “Poblacion Girl” na lumabag sa mandatory quarantine protocol noong Disyembre ng nakaraang taon.

Humarap si Chua kay Judge Maureen Rubio-Marquez ng Makati City Metropolitan Trial Court Branch 128 kaninang umaga kasama ang kaniyang magulang at legal counsel.

Sinabi ni Assistant Prosecutor Rafael Rodrigo Esguerra na pinagmulta ng 20,000 piso si Chua dahil sa paglabag sa Republic Act 11332 o ang Mandatory Reporting of Notifiable Disease and Health Events of Public Health Concern Act makaraang tumakas sa Berjaya Hotel.

Napag-alaman ding nagpositibo sa COVID-19 si Poblacion Girl kung saan nakahawa ito ng 15 indibidwal.

Hindi kailangan mag-angkat ng maraming asukal ang Pilipinas.

Ito ang binigyang-diin ni United Sugar Producers Federation (UNIFED) President Manuel Lamata dahil nag-umpisa na ang sugar milling sa ilang bahagi ng bansa.

Paliwanag niya na mas mabuting mag-angkat lamang ng kahit kalahati o 150,000 metric tons mula sa pino-propose ni dating Sugar Regulatory Administration (SRA) Head Manuel Serafica na 300,000 metric tons.

Tiniyak naman ni Lamata sa publiko na aabot sa 100,000 tons ng raw sugar ang mapo-produce sa pagtatapos ng buwang ito.

Magpapatupad ng bawas-presyo sa mga produktong petrolyo ang ilang kumpanya ng langis epektibo simula bukas, Setyembre a-6.

Sa abiso ng Pilipinas Shell Petroleum Corp. and Seaoil Philippines Inc., magkakaroon ng tapyas-presyo na P2.60 sa kada litro ng gasolina, P1.55 sa diesel at P1.60 naman sa kerosene.

Ipatutupad din ng Cleanfuel ang kaparehong price adjustment maliban sa kerosene.

Epektibo ang bawas-presyo sa produktong petrolyo simula ala-6 ng umaga, maliban sa Cleanfuel na magpapatupad ng alas-12:01 ng hatinggabi.

Batay sa datos ng Department of Energy, ang year-to-date adjustments ay pumalo na sa kabuuang net increase na P19.55 sa kada litro ng gasolina; P37.80 sa kada litro para sa diesel, P33.20 sa kada litro ng kerosene hanggang nitong August 30, 2022.

Gagawin nang digitized ng Philippine Charity Sweepstakes Office (PCSO) ang lotto games para palakihin ang kita at pondo para sa charity works.

Ayon kay Mel Robles, General Manager ng PCSO, magiging App-based na ang pagtataya para mapadali ang pag-lalaro para sa mga mananaya.

Saad pa niya, malaking tulong ang pagtaas ng revenue collection mula sa lotto games na sinasabing hirap magpatuloy dahil sa buwis na ipinapataw sa kanila.

Naging balakid ang pagtaas ng buwis sa pagtulong ng PCSO sa mga indibidwal na naghahanap ng ayuda para sa kanilang pang medikal na gastusin.

Ang dating P9-B charity funds ay bumaba sa P900-M dahil sa buwis na ipinapataw sa kanila.

Bukod sa mandato na pondohan ang Universal Healthcare Law, nagbabayad din ang ahensya ng Documentary Stamp Tax (DST).

Nabatid pa ni Robles, umabot sa P5-B ang DST ng PCSO at isang bilyong piso naman para sa Malasakit Center Law implementation kaya’t maaari na lamang silang magbigay ng P30,000 para sa mga mahihirap.

Kaugnay nito, sinabi ni Robles na may mga pagkakataon na ang ayuda na ibinibigay sa mga mahihirap ay sumailalim sa buwis, ngunit tinutulan ng PCSO ang naturang hakbang.—sa panulat ni Hannah Oledan

Asahan na bukas ang tapyas-presyo sa kada litro ng langis matapos ang dalawang sunod na linggong taas-singil sa presyo ng kada litro ng produktong petrolyo.

Ayon sa ilang kumpaniya ng langis, maglalaro sa P3 hanggang P3. 30 centavos ang bawas-singil sa kada litro ng gasolina.

Papalo naman sa P1. 70 centavos hanggang P2 ang magiging tapyas-presyo sa kada litro ng diesel habang nasa P1.60 centavos hanggang P1.90 centavos naman ang magiging bawas-singil sa kada litro ng kerosene.

Sa naging pahayag ni Department of Energy (DOE) oil Industry Management Bureau Dir. Rino Abad, posible pang magbago ang presyo ng langis dahil sa nagpapatuloy na lockdown sa China at pabago-bagong presyo nito sa International market bunsod narin ng bakbakan sa pagitan ng Russia at Ukraine.

Walang budget ang Office of the Press Secretary (OPS) upang labanan ang pagkalat ng maling impormasyon.

Ito ang sagot ni press secretary Attorney Trixie Cruz-Angeles sa tanong ni Albay Representative Edcel Lagman kung mayroong partikular na pondo ang opisina nito kaugnay sa pagkalat ng fake news at disinformation.

Ani Angeles, wala silang budget sa ilalim ng 2023 National Expenditure Program (NEP) pero nag-dodoble kayod aniya ang kanilang mga empleyado para bantayan ang mga social media platform.

Tinanong naman ni Lagman si Angeles kung susuportahan nito ang isang panukala na isama ang social literacy skills sa curriculum ng elementarya, high school at tertiary education.

Tugon ni Angeles na 100% na bahagi ng kanilang programa para sa digital media ang media literacy at fact-checking, kaya kung mayroon aniyang panukala si Lagman ay tutulong ang kanilang tanggapan.

Nanawagan si Senator Imee Marcos sa Department of Agriculture (DA) na bilisan ang paglalabas ng P8-B subsidiya ng gobyerno para sa mga magsasaka, lalo na sa panahon ng pagtatanim.

Sinabi ito ni Marcos matapos na magreklamo ang mga rice farmer sa kanyang tanggapan tungkol sa naantalang P5,000 ayuda.

Giit niya, huwag nang i-time deposit ang pondo dahil hindi naman ito para tumubo ng interes sa bangko.

Nagbabala naman ang senador na magdudulot ng mababang ani at food shortage kung hindi magagamit ng mga magsasaka ang subsidiya para bumili ng pataba at iba pang gamit sa sakahan.

Inihayag ni PNP Chief PGen. Rodolfo Azurin Jr. na ipinauubaya na nila sa Criminal Investigation and Detection Group (CIDG) ang imbestigasyon ukol sa pinekeng pirma ni Pangulong Ferdinand “Bongbong” Marcos Jr. sa appointment ng bagong Bureau of Immigration chief.

Ito ang sinabi ni Azurin makaraang matukoy ng CIDG ang limang indibidwal na maaari umanong makatulong sa kaso.

Sa ganitong paraan, ayon kay Azurin, ay hindi na magugulo pa ang imbestigasyon at maiwasan na rin na may maakusahan pang mga indibidwal na hindi pa tiyak kung may kaso o wala.

Una nang binanggit ni CIDG director Police Brigadier General Ronald Lee na pinadalhan na ng subpoena ang tatlo sa limang persons of interest upang magbigay-linaw sa usapin.

Simula sa susunod na linggo ay magtataas ng alert status ang Philippine National Police (PNP) sa bansa.

Ayon kay PNP Chief PGen. Rodolfo Azurin Jr., ito’y bilang bahagi ng pagpapaigting ng seguridad sa bansa sa pag-alis ni Pangulong Ferdinand “Bongbong” Marcos Jr. para sa kanyang kauna-unahang state visit.

Nakaalerto aniya ang buong hanay ng PNP sa panahon na wala si PBBM sa Pilipinas sa loob ng apat na araw.

Magkakaroon ng state visist si Marcos sa Indonesia mula September 4 hanggang September 6 at tutuloy naman ito ng Singapore mula September 6 hanggang 7.

Mahalagang magpatupad ng “safeguards” kung bubuhayin muli ang Reserve Officer Training Course (ROTC) upang hindi magkaroon ng hazing.

Ito ang pahayag ni PNP Chief Police Gen. Rodolfo Azurin bunsod ng exploratory talks sa pagitan ng Department of Education (DepEd) at Armed Forces of Philippines (AFP)` ukol sa panukalang buhayin ang ROTC.

Maganda aniya ang layunin ng pagbuhay dito dahil magkakaroon ng pagkakataon ang mga mag-aaral na maranasang maging bahagi ng isang samahan na humuhubog ng disiplina ng bawat Pilipino.

Gayunman, kailangan din aniya na may mekanismo para masiguro ang kaligtasan ng mga kadeteng sasabak sa training.

Matatandaan na ginawang “optional” ang ROTC dahil sa pagkamatay ng kadeteng si Mark Chua dulot ng hazing noong 2001.