Patuloy na bumababa ang antas ng tubig sa Angat Dam sa kabila ng mga pag-ulan dulot ng Bagyong Inday at habagat.
Ayon sa Bulacan Disaster Risk Reduction and Management Office, nasa 156.7 meters na ang water level ng naturang dam kahapon, July 12, at nananatiling mas mababa sa kritikal na antas na 160 meters.
Dahil dito, binawasan na ng National Water Resources Board ang alokasyon ng tubig para sa Metro Manila at pansamantalang itinigil ang suplay ng patubig sa ilang sakahan sa Gitnang Luzon.
Samantala, ayon sa National Irrigation Administration, umabot na rin sa minimum operating level na 160 meters ang Magat Dam sa Isabela.
Ibinabala ng ahensya na maaaring maapektuhan ang suplay ng irigasyon, produksyon ng kuryente, at kabuhayan ng mga mangingisda dahil sa mababang lebel ng tubig sa naturang dam.
Naiulat na rin ang mga insidente ng fish kill sa ilang bahagi ng Ifugao, Nueva Vizcaya, at Isabela dahil sa patuloy na pag-atras ng tubig sa Magat Dam.
