HOT STORIES OF THE WEEK

Dapat may nakahandang back up plan sa sandaling hindi na gawing mandatory ang pagsusuot ng face mask at gawin na lamang itong boluntaryo.

Ito ang iginiit ng Press Secretary Atty. Trixie Cruz- Angeles kasunod ng naging rekomendasyon ng Inter-Agency Task Force (IATF) na maging optional na lamang ang pagsusuot ng face mask.

Dagdag pa nito na hindi basta-basta na magbago ng protocols ng walang nakahandang plan b.

Aniya, kasama sa naturang back up plan ang matiyak na nakapagpabakuna na ng booster shot ang publiko.

Samantala, binabalanse na aniya ng pangulo ang inirekomendang hakbang na may kinalaman sa ekonomiya at public health.

Balik-bansa na si Pangulong Bongbong Marcos matapos ang 4 na araw na state visit sa Indonesia at Singapore.

Alas diyes bente singko kagabi nang dumating si Pangulong Marcos sa Ninoy Aquino International Airport Terminal 2, sa Pasay City.

Sa kanyang arrival speech, ipinagmalaki ni PBBM na aabot sa P800 billion investment deal ang kanyang iniuwi mula Indonesia at Singapore.

Kabilang anya sa dalawampu’t dalawang letter of intent at memorandum of agreements na sinelyuhan ang mga investment para sa renewal energy, e-commerce, defense at agriculture sectors.

Binigyang-diin ng pangulo na makatutulong ang mga nasabing kasunduan sa economic recovery ng Pilipinas at makalilikha ng mas maraming trabaho para sa mga pinoy.

Posibleng pumalo hanggang P400 ang kada kilo ng baboy ngayong ‘ber’ months o habang papalapit ang holiday season.

Ito, ayon sa Pork Producers Federation of the Philippines (PROPORK), ay dahil sa bumababang supply dulot ng mga kaso ng african swine fever (ASF).

Batay sa price monitoring ng Department of Agriculture, tumaas sa P370 ang kada kilo ng baboy mula P355 kada kilo sa mga pamilihan sa Metro Manila, kumpara noong nakaraang linggo.

Inihayag ni PROPORK Vice President Nicanor Briones na marami ang tinamaan ng ASF sa northern Luzon at Mindanao habang mabilis ding ibinebenta ang mga baboy kahit kulang sa timbang.

Sa datos ng Bureau of Animal Industry, dumarami ang mga lugar sa bansa na isinasailalim sa red o infected zone simula noong Hunyo dahil sa nasabing sakit.

Muli namang nanawagan si Briones sa gobyerno na bilisan ang pamamahagi ng indemnification sa mga hog raiser na tinamaan ng ASFF upang mahikayat silang i-report kung tumama ang sakit sa kanilang lugar.

Nakatakda nang ilabas ngayong linggo ng gobyerno ang desisyon sa mandatory mask mandate, matapos paluwagin ng Cebu City ang polisiya sa trial period.

Ayon kay Interior secretary Benhur Abalos, nakausap na niya si Cebu City Mayor Michael Rama hinggil sa implementasyon ng Executive Order 5, kung saan umiiral ang trial at observation period sa non-obligatory wearing ng face masks hanggang sa katapusan ng taon.

Kung pamamarisan anya ng ibang Local chief Executive si Rama ay maaaring magkaroon ng kalituhan sa mga polisiya sa pagpapatupad ng face mask mandate, lalo’t hindi pa nawawala ang banta ng COVID-19.

Ipinunto ni Abalos na ang mahalaga ay mayroong proseso habang kanya na ring isinangguni ang issue sa Inter-Agency Task Force for the Management of Emerging Infectious Diseases.

Nilinaw naman ng Kalihim na nirerespeto nila ang otonomiya ng bawat Local Government Unit subalit mayroong National Law na dapat ding sundin.

Lunes nang maglabas si Mayor Rama ng Executive Order 6, na may probisyon sa naunang kautusan, gaya ng trial period sa non-obligatory masking mula September 1 hanggang December 31, 2022 at otomatikong pag-aalis sa polisiya.

Pag-aaralan ng mabuti ng Land Transportation Franchising and Regulatory Board (LTFRB) ang petisyong dagdag-pasahe ng mga jeepney driver at operator sa bansa.

Ayon kay LTFRB board member Atty. Mercy Jane Paras-Leynes, bubusisiin ng ahensya ang naturang adjustment upang makapaglabas ng magandang desisyon dahil na rin sa patuloy na pagtaas ng presyo ng produktong petrolyo.

Ngunit may tinitingnan pa aniya silang ibang factors gaya ng magiging epekto nitong pagtaas sa mga pasahero at sa overall na inflation ng bansa.

Samantala, nakuha na ng LTFRB ang position paper ng National Economic and Development Authority (NEDA) tungkol sa hirit na fare hike ng mga jeep, pero hinihintay pa rin nila ang pag-aaral tungkol sa panukalang dagdag-pasahe na rin ng mga bus, taxi at UV express.

Sa ngayon, nasa 11 pesos pa rin ang minimum na pamasahe ng mga tradisyunal na jeepney.

Inaprubahan na ng Chinese drug regulators ang kauna-unahang inhalable COVID-19 vaccine.

Gawa ito ng Tianjin-based manufacturer na Cansino Biologics.

Ayon sa kumpanya, binigyan ng go-signal ng National Medical Products Administration ang Emergency Use ng naturang bakuna bilang booster.

Mas madaling anilang iimbak at i-administer ang naturang needle-free vaccine kumpara sa intramuscular jabs, na ibinibigay sa pamamagitan ng nebulizer.

Hindi naman nagbigay ng detalye ang Cansino Biologics kung kailan magiging available sa publiko ang adenovirus-vectored vaccine.

Sa ngayon ay wala pang inilalabas na datos kaugnay sa efficacy ng bagong bakuna.

Inihayag ng Department of Social Welfare and Development (DSWD) na mas maayos at mas mabilis na ang pamamahagi nila ng pinansyal na ayuda kumpara sa unang araw ng pamamahagi ng cash aid.

Sa panayam ng DWIZ, sinabi ni DSWD associate secretary Rommel Lopez na nahigitan nito ang kanilang target number of beneficiaries.

Ang ating pong target lamang na beneficiaries ay 80,000, sa atin pong tala umabot po ng 100,594 students po nu’n lamang araw na iyon hanggang kahapon ‘yung naabot natin ng educational assistance. Ito po ay nagkakahalaga ng 264.9 milyon na tulong sa ating mga indigent at in-crisis na students, sa kabuuan po, 285,000 po na mga kababayan natin ‘yung naabot na natin ng educational assistance mula po nu’ng tayo ay magsimula at 649.8 milyon na po ‘yung naipapamahagi natin na worth ng educational assistance.

Samantala, aminado ang kalihim na maraming problemang teknikal ang umusbong bunsod ng pagdami ng aplikante.

‘Yung aming daw pong website ‘yung aming mga QR code mahirap na pong pasukin, well inaamin po namin ‘yan pero ito po ay tino-troubleshoot na po ng DSWD. Ang nangyayari po kasi sa sobrang dami pong mga aplikante nasa dalawang milyon na po, talagang mahirap-hirap na po ang mag-reply nang agaran para sa kanila so humihingi po kami ng pang-unawa at paumanhin, pero ang amin naman pong assurance ay ginagawa naman naming batch-by-batch ‘yung pagre-reply sa atin mga kababayan sa inyo po na aming mga kliyente nang sa ganu’n po malapit na po ito sa mismong araw ng inyong payout.

Ang pahayag ni DSWD associate secretary Rommel Lopez, sa panayam ng DWIZ. — sa panulat ni Hannah Oledan

Nilinaw ni Erwin Garcia, Commission on Election (COMELEC) chairperson, na hindi luho ang pagpapatayo ng COMELEC building kung hindi isang “necessity.”

Ayon kay Garcia, ang siyam na palapag na gusali ng opisina ay makababawas sa gastusin ng komisyon at maglalaman ng kanilang mga kinakailangang pasilidad kabilang ang mga bodega para sa pag-iimbak ng kanilang mga kagamitan.

Dagdag pa niya, naiintindihan nila ang estado ng ekonomiya sa bansa kaya’t napagpasyahan nilang pahabain ang konstruksyon ng gusali sa loob ng tatlo hanggang limang taon, na magreresulta sa mas mababang alokasyon per annum sa budget pie ng pamahalaan.

Hinihiling din ng poll body sa Kongreso ang pagbibigay ng Multi-Year Contractual Allocation (MYCA) para mapadali ang tuloy-tuloy na bidding ng procurement para sa pagtatayo ng gusali.

Kasalukyang nagrerenta ang COMELEC ng iba’t ibang gusali at palapag sa Palacio Del Gobernador sa Intramuros na nasunog noong Hulyo. —sa panulat ni Hannah Oledan

Epektibo na ngayong araw ang bawas-singil sa presyo ng kada litro ng produktong petrolyo.

Ayon sa kumpaniyang Caltex, Cleanfuel, JETTI Petroleum, Petro Gazz, PTT Philippines, Seaoil, at Shell, nasa P2.60 centavos ang magiging tapyas presyo sa kada litro ng gasoline habang aabot naman sa P1.60 centavos ang magiging bawas sa kada litro ng diesel at kerosene.

Ayon sa Department of Energy (DOE), ang paggalaw sa presyo ng langis ay dahil sa pagbagsak ng presyo nito sa International market habang sinusubukan naring ayusin ng China ang problema hinggil sa kaso ng COVID-19 sa kanilang bansa.

Sa pagsisimula ng taon, ang kabuuang halaga ng gasolina sa bansa ay pumalo na sa P29.50 centavos kada litro; P45 sa kada litro ng diesel; habang P39.25 centavos naman sa kada litro ng kerosene.