HOT STORIES OF THE WEEK

Pansamantalang sususpindihin ng Globe at Smart ang kanilang mobile services sa mga lugar na daraanan ng traslacion ng Itim na Nazareno, simula 5:00 ng madaling araw ngayong Martes, Enero 9.

Alinsunod ito sa kautusan ng National Telecommunications Commission (NTC) at hiling ng Philippine National Police (PNP).

Sa advisory ng Smart, suspendido ang kanilang mobile services sa Quiapo area maging sa mga lugar na dadaanan ng prusisyon sa Maynila.

Smart Advisory on The Black Nazarene Procession (09 January 2018) pic.twitter.com/axenQhnZkC

— SMART (@LiveSmart) January 8, 2018

Mawawalan din ang signal ng Globe sa mga lungsod ng Maynila, Quezon, Mandaluyong at Makati.

Maaari namang maapektuhan ang mga kustomer sa ibang bahagi ng Metro Manila at Cavite bunsod ng overlapping mobile signal mula sa cell sites sa mga karatig lugar.

READ: Advisory from Globe Telecom on the temporary loss of mobile signal as part of the security measures for the Feast of the Black Nazarene pic.twitter.com/LxkvXtWnWZ

— DWIZ Newscenter (@dwiz882) January 8, 2018

Magsisimula ang traslacion o taunang prusisyon sa Quirino Grandstand sa Rizal Park, 6:00 ng umaga ngayong Martes, Enero 9, habang ibabalik ang mobile service sa sandaling makabalik na sa simbahan ng Quiapo ang poong Itim na Nazareno.

(Ulat ni Patrol 5 Aya Yupangco)

Sinimulan nang linisin ng pamahalaan mula sa mga bulok at kakarag-karag na mga sasakyan ang mga lansangan sa Metro Manila ngayong araw.

Kasunod ito ng pag-arangkada ng “Tanggal Bulok, Tanggal Usok” campaign bilang bahagi ng transport modernization program ng pamahalaan.

Ayon kay Elmer Argano, pinuno ng i-ACT o ng Inter-Agency Council on Traffic, tatlong pangunahing kalsada ang magiging tutok ng kanilang operasyon partikular na ang EDSA, Commonwealth Avenue at Marcos Highway.

Giit ni Argano, magsisilbi itong babala sa mga nasa sektor ng transportasyon na hindi pa rin susunod sa naging kautusan ni Pangulong Rodrigo Duterte na tanggalin na sa kalsada ang mga luma at hindi na epektibong mga pampublikong sasakyan.

Kasabay nito, sa panayam ng DWIZ, tinayak ni Department of Transportation o DOTr Undersecretary for Road Tim Orbos na hindi naman mababalam ang serbisyo at biyahe ng mga tsuper sakaling makitaan ng problema ang kanilang mga jeepney.

Gayunman sinabi ni Orbos na kinakailangang tumugon ng driver sa ibibigay ng subpoena o summon ng mga awtoridad at kailangang agad na mag-report o magpakita sa Land Transportation Office o LTO.

“Ang operational guideline, bibigyan sila ng summon na kailangan nilang dalhin ang sasakyan nila sa LTO para makita kung ano pa ang violations nila at dapat ayusin nila ang kanilang mga sasakyan.” Ani Orbos

Bagamat aminado na magiging mabigat ang nasabing kampanya ay umaasa si Orbos na mababawasan nito ang problema partikular kaugnay sa road worthiness ng mga bumibiyaheng sasakyan.

“Ang unang hakbang, Metro Manila muna, pero mabilis din ang pag-expand nito sa mga probinsya, titignan muna natin ang proseso since dito sa Metro Manila ang may pinakamalaking problema. Sana pagbigyan tayo dito at magtiwala, ito na po talaga ang full proof na proseso.” Pahayag ni Orbos

TINGNAN: Ikinakasang ‘Tanggal Bulok, Tanggal Usok’ operation sa bahagi ng Robinson Mart, Marcos Highway | : @LTFRB pic.twitter.com/wzDp6ofsNw

— DWIZ Newscenter (@dwiz882) January 8, 2018

—Aiza Rendon / (Ratsada Balita Interview)

Maagang dinagsa ng mga deboto ng Poong Itim na Nazareno ang Quirino Grandstand sa Maynila para sa tradisyunal na ‘pahalik’ sa Poon.

Pinili na ng ilang mga deboto ang magpa-morningan sa nasabing lugar upang maka-una sa ‘pahalik’ subalit ganap na alas-8:00 na ito ngayong umaga nagsimula batay na rin sa abiso ng organizing committee.

Una rito ay binigyang-daan ang isang misa ganap na ika-anim kaninang umaga para naman sa lahat ng mga volunteers, pulis, bumbero at maging sa miyembro ng media na magbabantay sa okasyon.

Ayon kay Ginoong Alex Erasca, pinuno ng technical working committee ng traslacion, napagpasyahan nilang bigyan muna ng pagkakataon ang lahat ng mga volunteers na unang makahalik sa Poon bago ang kanilang gagawing pagbabantay sa okasyon.

Sa pinakahuling crowd estimate ng mga awtoridad umaabot na sa mahigit 10,000 deboto ang kasalukuyang nasa Quirino Grandstand para sa ‘pahalik’.

Sa pagitan na ng orange barriers ng MMDA nakatulog ang ilang deboto na matiyagang naghihintay ng tradisyunal na ‘pahalik’ sa Itim na Nazareno. | via @gilbertperdez pic.twitter.com/wgAi3wStPM

— DWIZ Newscenter (@dwiz882) January 7, 2018

Sitwasyon sa Quirino Grandstand kung saan maraming deboto na ang matiyagang naghihintay para sa tradisyunal na ‘pahalik’ sa Itim na Nazareno. |via @gilbertperdez pic.twitter.com/JHQfvlslpZ — DWIZ Newscenter (@dwiz882) January 7, 2018

Replica procession

Samantala, inabot ng  sampung oras ang prusisyon sa mga imahe ng replika ng Poong Itim na Nazareno kahapon na nagtapos dakong alas-12:50 kaninang hatinggabi.

Batay sa pagtaya ng Manila Police District o MPD, tumaas pa ang bilang ng mga nagsidalo sa 120,000 deboto ang nakiisa sa taunang tradisyon bago ang mismong traslacion bukas, Enero 9.

Inilibot ang mga replika ng Poong Itim na Nazareno sa mga kalye ng Claro M. Recto, Loyola, bilibId Viejo, Puyat, Guzman, Hidalgo, Barbosa, Globo de Oro, Palanca, Villalobos patungong Plaza Miranda.

(Ulat ni Gilbert Perdez)

Tinatayang aabot sa dalawang milyong deboto ng Poong Itim na Nazareno ang makikilahok sa taunang traslacion sa mahal na poon bukas, Enero 9.

Kasunod nito, walang tigil ang panawagan ng Manila Police District o MPD sa mga lalahok na iwasan na hangga’t maaari ang pagdadala ng mga mamahaling kagamitan sa okasyon.

Sa programang Pulis At Your Service sa DWIZ, sinabi ni Manila Police District o MPD Director Chief Superintendent Joel Coronel na hindi rin nila hinihimok ang mga deboto na magsama pa ng mga bata sa traslacion.

Hinikayat din nila ang mga magpupunta sa naturang okasyon na transparent sa halip na mga malalaking bag ang kanilang dalhin upang hindi na aniya maging pahirapan pa pagdating sa security inspections.

“Kaya po pinapayo namin hindi pa nagsisimula ang procession sa lahat ng mga deboto at lalahok dito na huwag nang magsuot ng mga mamahaling alahas o mga bagay na maaaring makaakit sa ibang tao, mga gadgets, mga cellphones, nakiki-usap din po tayo na hangga’t maaari ay huwag nang isama ang mga bata, lalong-lalo na ang mga sanggol para sa kaligtasan nila at para hindi mawawala, pero again meron tayong mga command post along the way, kung sakaling may insidente ng snatching, pit pocket, at kung anuman na krimen na mangyayari handa nating tugunan yan, kasama na ang mga nawawalang bata, puwede natin doong i-turn over.” Pahayag ni Coronel

(Pulis At Your Service Interview)

Hindi uubra ang pinalulutang ni House Speaker Pantaleon Alvarez na ‘no-el’ scenario sa 2019 at term extension ng Pangulong Rodrigo Duterte.

Ayon kay Senate Minority Floorleader Franklin Drilon, unang-una ay kinontra ng Pangulo ang mga nasabing usapin at malinaw sa konstitusyon ang tamang termino sa mga mambabatas.

Kailangan aniyang baguhin o amiyendahan ang Saligang Batas para maisagawa ang no election.

Binigyang diin ni Drilon na tiwala siyang hindi sasang-ayon ang mga kapwa senador niya lalo na yung mga naka-dalawang termino na sa naturang ‘no-el’ scenario.

“Ang ‘no-el’ hindi pupuwedeng mangyari yan unless you amend the Constitution which must be ratified in a plebiscite, ito po ay dapat mangyari bago ang May 2019 at ako’y may tiwala sa aking mga kasamahan sa Senado na hindi sila papasok dito, conflicted sila dahil sila’y magbe-benefit kung ‘no-el’ hindi po ba?” Ani Drilon

Samantala, tinawag naman na ispekulasyon ni House Deputy Speaker Fredenil Castro ang posibilidad na no election scenario sa 2019 at term extension ng Pangulong Rodrigo Duterte.

Ayon kay Castro, walang makapagsasabi sa ‘no-el’ scenario sa susunod na taon hangga’t hindi na a amiyendahan ang 1987 Constitution.

Sinabi pa ni Castro, Vice Chair ng House Committee on Constitutional Amendments na tanging plebisito lamang ang paraan para hindi matuloy ang eleksyon dahil ang Kamara o Senado ay maaari lamang magsulong ng amyenda sa Saligang Batas.

Una nang inihayag ni House Speaker Pantaleon Alvarez na lahat ay posibleng mangyari maging ang ‘no-el’ scenario kapag naging matagumpay ang transition sa federal form of government na isinusulong noon pa ng Pangulong Duterte.

(Usapang Senado Interview)

Bukas sa pakikipag-diyalogo sa kasalukuyang administrasyon ang bagong Pangulo ng Catholic Bishops Conference of the Philippines (CBCP) na si Davao Archbishop Romulo Valles.

Ayon kay Valles, kahit kapwa nagpapalitan ng batikos ang gobyerno at Simbahang Katolika ay ipagpapatuloy nila ang kanilang pakikipag-usap sa administrasyon alinsunod sa turo ng ebanghelyo.

Sa nakalipas na liderato ng CBCP ay naging mainit ang banggaan ng administrasyong Duterte at simbahan sa ilang kritikal na isyu partikular ang war on drugs ng gobyerno.

Aminado naman ang Arsobispo na ‘medyo masuwerte’ siya lalo’t kapwa sila Davaoeño ni Pangulong Rodrigo Duterte bukod pa sa pagiging malapit na kaibigan ng arsobispo sa pamilya ng Punong Ehekutibo.

Pinalitan ni Valles si Lingayen Dagupan Archbishop Socrates Villegas matapos mahalal noong Hulyo 8.

Ang 66-taong gulang na arsobispo ay kasalukuyang archbishop ng Metropolitan Archdiocese ng Davao.

Si Valles ay inordinahan bilang pari sa edad na 24, naging bishop noong 46 taong gulang ito at makalipas ang siyam na taon ay naging archbishop ng Zamboanga noong 2006.