HOT STORIES OF THE WEEK

Ganap nang nakabalik sa simbahan ng Quiapo ang imahe ng Poong Itim na Nazareno makaraan ang halos sa dalawangpo’t dalawang (22) oras na traslacion.

3:01 kaninang madaling araw nang maipasok sa tarangkahan ng simbahan ang andas ng Nazareno sa kabila ng dagat ng tao na nagnanais na makalapit dito.

Una dito, bahagya munang nagkagulo sa harapan ng simbahan nang mabasag ng mga deboto ang barikadang ginawa ng mga pulis at sundalo para bigyang daan ang pagdating ng prusisyon.

Sa kabila ng mala-daluyong na dagat ng tao, naging mabilis pa rin ang usad ng andas nang makapasok na ito sa bahagi ng Plaza Miranda ganap na 2:30 kanina.

Pansamantala ding nanahimik ang mga deboto para mag-alay ng panalangin nang sumapit na sa Plaza Del Carmen ang andas partikular na sa harap ng Basilica ng San Sebastian dakong 11:30 naman kagabi.

Sa nasabing simbahan isinagawa ang tradisyunal na ‘dungaw’ o ang pagsilip ng imahe ng Nuestra Señora Del Carmen na isang pagsasadula ng pagsilip ng Inang Maria sa kanyang naghihirap na anak na si Hesus.

Magugunitang nagsimula ang traslacion sa Quirino Grandstand sa Luneta dakong 5:05 ng umaga kahapon.

‘Basura’

Samantala, tone-toneladang basura naman ang iniwan ngayon ng mga deboto ng Poong Itim na Nazareno matapos ang tradisyunal na traslascion kaninang madaling araw.

Dahil dito, puspusan na ang paglilinis ng mga tauhan ng Metro Manila Development Authority o MMDA sa mga kalsadang dinaanan ng prusisyon.

Nagsimula ang paglilinis ng mga tauhan ng MMDA sa Quirino Grandstand kung saan nagsimula ang traslacion at nagtuluy-tuloy ito hanggang sa mga kalsadang kasama sa ruta nito.

Una nang nanawagan ang mga environmental group sa mga deboto na iwasan ang pagkakalat at panatilihing malinis ang traslacion para na rin sa kapakanan ng mas nakararami.

Basurang iniwan ng mga deboto sa Quezon Blvd., Quiapo, Maynila matapos ang 22 oras na #Traslacion2018 | via @gilbertperdez pic.twitter.com/yHYpJRg5W4

— DWIZ Newscenter (@dwiz882) January 9, 2018

—-

Ahasang matatanggap na sa lalong madaling panahon ng mga pulis, sundalo at iba pang uniformed personnel ang kanilang mas mataas na suweldo makaraang lagdaan ni Pangulong Rodrigo Duterte ang Joint Resolution 1 ng Kongreso sa Base Pay Increase Schedule Modification.

Noong Disyembre pa inaprubahan ng kongreso ang resolusyon habang nito lamang Enero 1 pinirmahan ng Pangulo ang updated list ng base pay.

Sa ilalim ng Joint Resolution na epektibo noong Lunes, bagong taon, ang entry-level uniformed officer o police, fire, jail officer 1, private, apprentice seaman, seaman third class na may sahod na P14,834.00 kada buwan ay makatatanggap na ng P29,668.00 ngayong taon.

Nakasaad din sa resolusyon na magkakaroon ng two-tranche increase kung saan isa ngayong taon at isa sa taong 2019 habang mananatili ang base pay ng ilang ranggo sa implemetasyon ng modified pay schedule sa 2019.

Tataas naman sa P121,143.00 kada buwan simula ngayong taon ang base pay ng mga hepe ng Armed Forces of the Philippines (AFP) at Philippine National Police (PNP) at P149,785.00 naman sa susunod na taon.

Ipinaliwanag din sa resolusyon na kailangang itaas ang suweldo ng mga sundalo at iba pang uniformed personnel upang magampanan ng mga ito ng maayos ang kanilang mahalagang papel sa pagpapanatili ng national security at peace and order.

(Ulat ni Patrol 7 Jill Resontoc)

Batas na nagdodoble sa sweldo ng pulis, militar at iba pa pinirmahan na ni Pangulong Duterte | via @JILLRESONTOC pic.twitter.com/fH0qWs93jf

— DWIZ Newscenter (@dwiz882) January 9, 2018

Mas mabilis ang usad ng ‘traslacion’ ngayong taon kumpara sa mga nagdaang taon.

Ayon sa lokal na Disaster Risk Reduction Management Council ng Maynila, may mga inibang istratehiya ang organizers para mapabilis ang usad ng prusisyon.

Umalis ng Luneta Grandstand ang Andas dakong alas-5:00 ng madaling araw at bago mag-alas-10:00 ay nakadaan na ito sa Mehan Garden taliwas noong nakaraang taon na alas-2:00 na ng hapon nang marating ang parehong lugar.

Gayunman, sa kabila ng mabilis na usad, posible pa rin umanong abutin hanggang mamayang gabi ang traslacion dahil sa mga inilagay na prayer stations sa daraanan ng prusisyon.

‘Mga debotong nalapatan ng lunas’

Aabot sa isandaan at animnaput isang (161) deboto na ang nalapatan ng lunas ng Philippine Red Cross o PRC sa kasagsagan ng traslacion ng Itim na Nazareno.

Sa naturang bilang, 91 dito ang tumaas ang blood pressure habang 48 ang nagtamo ng minor injuries tulad ng galos, pagkahilo, lagnat, pananakit ng ipin at ng katawan.

Gayunman, sinabi ng PRC na wala namang naiulat na nagtamo ng malalang sugat.

Iloilo at CDO ‘traslacion’

Naging maayos ang traslacion sa Cagayan de Oro at Iloilo.

Ayon kay Chief Inspector Mardy Hortillosa, Spokesperson ng Cagayan de Oro PNP, halos dalawang oras lamang inabot ang traslacion mula sa St. Augustine Cathedral pabalik sa Shrine of the Black Nazarene.

Tinatayang nasa 100,000 katao ang dumalo sa traslacion sa CDO, mas marami kumpara sa tinatayang 80,000 noong nakaraang taon.

Samantala, nasa 500 deboto naman ang sumama sa prusisyon ng Itim na Nazareno sa Maddurriao Iloilo.

Mula sa Mandurriao Parish Church, inilibot muna ang Itim na Nazareno bago ibinalik muli sa simbahan.

Ilan mga deboto naman sa Bohol ang hindi nakasama sa taunang traslacion ng Itim na Nazareno dahil dinayo nila ang Puting Nazareno na nasa bayan ng Talibon.

Sinasabing 50-taon na ang edad ng White Nazarene na dati ay gawa sa kahoy subalit ngayon ay gawa na sa semento.

(Ulat ni Aya Yupangco)

Target ng Philippine Drug Enforcement Agency o PDEA na tapusin ang problema sa ilegal na droga sa bansa kasabay sa taong 2022, kasabay ng pagtatapos ng termino ni Pangulong Rodrigo Duterte.

Ayon kay PDEA Chief Aaron Aquino, puspusan ang ginagawang hakbang ng ahensya para malinis sa iligal na droga ang may 5,000 mga barangay kada taon.

Sinabi ni Aquino na kanya nang inatasan ang mga regional director ng PDEA na magsagawa ng tatlumpu (30) hanggang apatnapung (40) anti-drugs operation kada buwan.

Sa kasalukuyan, nasa 5,100 ang drug free na mga barangay sa buong bansa.

—-