Nagpakita ng pagkakaisa at magandang samahan ang liderato ng Senado at Kamara matapos magsanib-puwersa sa kanilang pagbisita sa Alabel, Sarangani Province.
Sina House Speaker Faustino Dy III at Acting Senate President Sherwin Gatchalian ang nanguna para kumustahin ang kalagayan ng mga residenteng naapektuhan ng magnitude 7.8 na lindol sa Mindanao.
Kasama nina Speaker Dy at Acting Senate President Gatchalian ang ilan pang senators kabilang sina JV Ejercito, Erwin Tulfo, at Migz Zubiri, na nakipag-ugnayan din sa mga lokal na opisyal para tiyaking mabilis at maayos ang pagtugon ng pamahalaan sa mga apektadong komunidad.
Sa kanilang maikling pag-uusap, nagpakita ng pananabik si Gatchalian na makatrabaho si Speaker Dy at ang iba pang mga mambabatas sa House of Representatives.
Ayon kay Gatchalian, matagal na silang magkaibigan ni Speaker Dy mula pa noong 2001.
Bilang tugon, nginitian naman ni Speaker Dy si Gatchalian at pabirong sinabi na, “Magkita tayo sa SONA.”
Ang palitan ng mensahe ng dalawang lider ng Kongreso ay patunay ng patuloy na kooperasyon sa pagitan ng Senado at Kamara, lalo na sa paghahatid ng tulong, suporta, at serbisyo sa mga Pilipinong naapektuhan ng kalamidad. | via Geli Mendez (Patrol 30)
