Iniimbestigahan na ng Department of Information and Communications Technology (DICT) ang napaulat na defacement o cyberattack sa official website ng Senado.
Ayon sa DICT, agad na nakikipag-ugnayan ang National Computer Emergency Response Team (NCERT) sa Senate Electronic Data Processing-Management Information System Service para maayos ang kanilang website.
Maliban dito, nagsasagawa rin ng forensic analysis ang ahensya, katuwang ang Cybercrime Investigation and Coordinating Center, iba pang law enforcement agencies, at mismong Senado para matukoy ang mga nasa likod ng insidente.
Sa ngayon, nananatiling under maintenance ang website habang nagpapatuloy ang isinasagawang security validation at restoration efforts dito.
Gayunman, batay sa mga naunang assessment, nilinaw ng kagawaran na wala pang anumang indikasyon na nakompromiso ang mga confidential at sensitive data ng website.—sa panulat ni Mark Terrence Molave
