HOT STORIES OF THE WEEK

Ibinasura ng Court of Appeals (CA) ang motion for reconsideration para sa 2-billion-dollar compensation claim ng mga umano’y human rights victim noong panahon ng martial law sa ilalim ni dating Pangulong Ferdinand Marcos o Grupong MDL 840.

Kinontra ng Court of Appeals na isakatuparaan sa bansa ang naging desisyon ng United States Court noong 1995 na nagkakaloob ng dalawang (2) bilyong dolyar sa mga umano’y human rights victim.

Batay sa tatlong (3) pahinang desisyon na pinonente ni Court of Appeals Associate Justice Normandi Pizzaro, hindi maaaring ipatupad sa Pilipinas ang pasya dahil sa kabiguan ng Hawaii Court na bigyang pagkakataon ang mga hindi pa tukoy na mga claimant.

Ito’y para sa ‘full rehabilitative potential litigation’ at hindi nabigyan ng pagkakataon ang Marcos estate na makompronta ang bawat claimant.

Hindi din aniya ‘binding’ ang desisyon ng Hawaii Court o maaaring ipatupad sa Pilipinas dahil nalabag ang ‘right to due process’ ng magkabilang panig.

Ang desisyon ng CA ay alinsunod na din ng pagpapatibay sa naunang pasya ng Makati Regional Trial Court (RTC) na nagsasaad na hindi maaaring pairalin sa Pilipinas ang Hawaii Court judgement dahil sa kawalan ng hurisdiksyon at paglabag sa due process.

(Ulat ni Patrol 3 Bert Mozo)

Iginiit ni National Economic and Development Authority o NEDA Director General Ernesto Pernia na walang dapat ikabahala ang publiko sa pagpapatupad ng Tax Reform for Acceleration and Inclusion o TRAIN Law.

Kasabay nito, kinondena ni Pernia ang mga nagsasamantala na at nagtaas na ng presyo ng mga produkto nila gayung sa susunod na dalawang linggo pa makikita ang tunay na epekto ng TRAIN bagamat January 1 ito epektibo.

Dapat aniyang magkaisa para mapalago ang ekonomiya ng bansa at mabura nang tuluyan ang kahirapan.

“Dapat magkaisa tayo sa layunin natin na palaguin ang ekonomiya para matanggal ang kahirapan at masaya ang lahat, yun naman talaga ang objective ng tax reform. Ang overall effect ng tax reform ay progressive, it will benefit the poor more than the rich.” Ani Pernia

Gayunman, inamin ni Pernia ang maliit na porsyentong epekto ng TRAIN.

“Magkaroon siguro ng kaunti pero mga 1 percent lang at sa mga mahirap naman bibigyan sila ng cash transfer na tinatawag at share term effect.” Dagdag ni Pernia

Next 5 years

Mas higit na dapat pagtuunan ng pansin ang epekto ng TRAIN sa susunod na limang taon o higit pa.

Binigyang diin sa DWIZ ni Pernia na mararamdaman ang epekto ng TRAIN makalipas ang limang taon o tinatawag na medium term kung kailan maunlad na ang mga imprastruktura sa bansa gayundin ang kalidad ng edukasyon at malawakang access sa health care.

“Kung mas maraming makuhang revenue ang gobyerno natin, ma-iimprove natin ang mga imprastraktura, ang edukasyon ng mga mahihirap, health care para madaling maka-access, dapat ang tingin natin ay hindi lang ngayon or bukas kundi what’s going to happen 2 or 3 years from now, 5 years or even longer than 5 years doon talaga mararamdaman ng tao ang benepisyo ng tax reform.” Pahayag ni Pernia

(Ratsada Balita Interview)

Tuluyan nang naging ganap na base militar ng China ang Fiery Cross o Kagitingan Reef na bahagi ng mga pinagtatalunang teritoryo sa West Philippine Sea.

Ayon sa ulat ng China Central Television, mayroon itong runway para sa mga Chinese military war planes na may sukat na 3,125 metro.

Kayang makapagpalapag ng nasabing runway ng nasa 6,000 mga strategic bombers at mayroon din itong ospital at warning radar system.

Tinatayang nasa 200 sundalo rin ang nakahimpil sa nasabing isla at mayroon din itong malawak na telecommunication facilities.

5 PH special envoy sa China

Limang (5) special envoy ang muling itinalaga ni Pangulong Rodrigo Duterte.

Ang mga ito ay sina Fernando Selim Borja, Wallie Lee, Carlos Chan, Cheng Yong at William De Jesus Lima na kapwa itinalagang muli sa China noong Enero 3.

Ipinaliwanag ni Presidential Spokesman Harry Roque na mas nais ng Punong Ehekutibo na mapalalim ang ugnayan ng Pilipinas at Tsina kaya’t limang (5) envoy ang kanyang muling itinalaga.

Magugunitang dalawang (2) beses nang bumisita sa China si Pangulong Duterte.

Ito ay upang mapalalim ang ugnayan ng dalawang (2) bansa sa kabila ng pagkakapanalo ng Pilipinas sa Arbitration Court hinggil sa territorial dispute sa South China Sea.

Jaymark Dagala / Drew Nacino

Naniniwala si Pangulong Rodrigo Duterte na malaki ang maitutulong ng pagpapaigting sa relasyon sa pagitan ng Pilipinas at Indonesia sa isinasagawang rehabilitasyon sa Marawi City.

Ito ang dahilan ayon sa Pangulo kaya’t nais niyang lalo pang paigtingin ang ugnayan ng dalawang bansa sa isyu ng maritime security.

Dagdag pa ng Pangulo, ito ay upang mapigilan din ang paglalabas – masok ng mga lokal at dayuhang terorista sa bansa.

Maliban sa maritime security, sinabi ng Pangulo na nais din niyang ipagpatuloy ang Indo-Philippine route na tiyak makatutulong lalo sa dalawang bansa sa aspeto naman ng ekonomiya at kalakalan.

Ginawa ng Pangulo ang naturang pahayag nang humarap sa kanya si Indonesian Foreign Minister Retno Marsudi sa isang courtesy call sa Presidential Guest House sa Davao City kamakalawa.

Sinibak sa puwesto ni Pangulong Rodrigo Duterte si Maritime Industry Authority o MARINA Administrator Marcial Quirico Amaro III.

Ito ang inanunsyo ni Presidential Spokesperson Harry Roque sa isang press briefing sa Davao City ngayong hapon.

Ayon kay Roque, tinanggal sa puwesto si Amaro dahil sa sobra-sobrang biyahe nito sa ibang bansa kung saan umabot ito sa 24 foreign trips sa loob lamang ng 13 buwan.

Nag-ugat ang imbestigasyon ng Department of Transportation o DOTr laban kay Amaro dahil sa isinumiteng reklamo ng Alliance of MARINA Employees laban dito sa Office of the President.

Binigyang diin ni Roque na lahat ng biyahe sa ibang bansa ng isang empleyado ng gobyerno, opisyal man o personal ay kinakailangang ihingi ng pahintulot at dapat ito’y aprubado.

“Walang kaduda-duda na seryoso ang ating Presidente sa kampanya laban sa korupsyon, muli po kung gusto ninyong yumaman at bumiyahe ay huwag na po kayong magtrabaho sa gobyerno, andiyan naman po ang pribadong sektor.” Pahayag ni Roque

Sa ngayon ani Roque ay wala pang napipisil ang Pangulo na papalit sa puwesto ni Amaro sa MARINA.

Matatandaang kahapon ay naunsyami ang pag-anunsyo nito matapos umanong makatanggap ng utos si Roque na pansamantalang ipagpaliban ang pagbibigay ng impormasyon ukol sa bagong sibak na opisyal ng pamahalaan.

Una nang nasibak sa ilalim ng Duterte administration sina Department of Interior and Local Government o DILG Secretary Mike Sueno, Dangerous Drugs Board o DDB Chairman Dionisio Santiago at Presidential Commission for the Urban Poor Chairman Terry Ridon.

—-