HOT STORIES OF THE WEEK

Magtatalaga ng isang batalyon o katumbas ng limang daang (500) sundalo ang Armed Forces of the Philippines o AFP para sa traslacion ng Itim na Nazareno sa Enero 9.

Ayon kay AFP Joint Task Force National Capital Region Commander Brigadier General Allan Arrojado, ang mga ide-deploy na sundalo ay magsisilbing augmentation force para sa Philippine National Police o PNP na lead agency sa paghahanda sa okasyon.

Dagdag ni Arrojado, kasado na rin kanilang ipatutupad na seguridad bilang suporta sa PNP sa pagtiyak ng maayos at mapayapang traslacion.

Wala rin aniyang namomonitor ang AFP na anumang banta sa traslacion sa Martes.

MMDA enforcers

Isang libo’t tatlong daang (1,300) mga traffic enforcers ang itatalaga ng Metropolitan Manila Development Authority o MMDA para sa traslacion ng Itim na Nazareno sa Enero 9.

Ayon kay MMDA Spokesperson Celine Pialago, partikular na tututukan ng kanilang mga traffic enforcers ang pagbibigay ng first aid sa mga masusugatan o masasaktang deboto at ang pagbabantay sa pahalik sa Enero 8.

Dagdag ni Pialago, sisimulan na ang paged-deploy sa mga tauhan ng MMDA sa Quirino Grandstand simula bukas, Enero 5.

Nakahanda rin aniya ang MMDA na magbigay ayuda at suporta sa mga tauhan ng Manila Police District o MPD.

Class suspensions

Sinuspinde na ng Manila City Government ang klase sa lahat ng lebel sa pampubliko at pribadong paaralan bunsod ng traslacion ng Itim na Nazareno, sa Martes, Enero 9.

Alinsunod din sa Executive Order 1 ni Manila Mayor Joseph Estrada, suspendido rin ang trabaho sa lahat ng departamento at tanggapan sa city government ng Maynila.

Gayunman, hindi saklaw ng naturang kautusan ang mga police officer, traffic enforcer at disaster and risk reduction management personnel.

Nasa diskresyon naman ng kani-kanilang head ang work suspension sa national government offices at lahat ng private offices sa Maynila.

Samantala, naganunsyo na rin ang Korte Suprema ng suspensyon sa kanilang trabaho maging sa Court of Appeals at lahat ng korte sa Maynila.

—-

Inaasahang magpapalabas ng isang joint resolution ang dalawang kapulungan ng Kongreso ngayong taon para isulong ang malawakang pagbabago sa Saligang Batas.

Ito ang ibinabala ng political analyst at miyembro ng 1987 Constitutional Commission na si Atty. Christian Monsod kaugnay ng isinusulong na Charter Change ng administrasyong Duterte.

Sa eklusibong panayam ng DWIZ kay Monsod, sinabi nito na posibleng isabay ang pagsasagawa ng referendum kaugnay ng nilulutong pagbabago sa Saligang Batas sa darating na barangay at Sangguniang Kabataan o SK elections sa Mayo.

“Abangan ninyo yung lalabas sa House of Representatives kasi meron daw silang niluluto na tinatawag na Resolution No.8, I don’t know kung ano ang nasa loob nun, ang aking pinipintasan yung PDP-Laban Draft Federal Constitution, pero ang mahalaga ay yung Resolution No.8 na ipa-pass daw ng House at Senate na yun ang complete constitution that’s going to be proposed by the government but nobody has seen it.” Ani Monsod

Kasabay nito, nangangamba si Monsod na tuluyan nang mabubura ang probisyon hinggil sa social justice na nasa kasalukuyang konstitusyon na hindi pa rin naipatutupad mula nang balangkasin ito noong 1987.

“Sinulat namin yung Constitution na yan, ang 1987, ang center, yung puso, the heart ng ating konstitusyon ay yung social justice, na dapat ang center of development natin are the poor, babaguhin nila yan, sabi nila yung mga social justice provisions kagaya ng agrarian reforms, urban reforms at housing, ancestral domain, at yung fisheries reforms ay aalisin na sa Constitution at ibibigay na lang sa parliament.” Pahayag ni Monsod

Mas mahabang termino ni PDuterte?

Samantala, posibleng palawigin ang anim (6) na taong termino ni Pangulong Rodrigo Duterte ‘kung kinakailangan’.

Ayon kay Senate President Koko Pimentel ito ay sa sandaling magkaroon ng ‘transitory period’ sa ilalim ng pagpapalit ng sistema ng gobyerno patungo sa pederalismo.

Gayunman, nakadepende aniya ang term extension sa ‘transitory provisions’ at kung kailan aaprubahan ang bagong konstitusyon.

Kung sa taong 2019 pa aaprubahan ang bagong saligang batas, sa susunod na tatlong taon ang transitory period.

Maaari aniyang palawigin ang termino kung pabor dito ang Pangulo lalo’t kung magiging bahagi naman ang extension ng bagong konstitusyon na aprubado ng taumbayan.

—Drew Nacino / Jaymark Dagala / IZ Interview

Asahan na ang mas mataas na singil sa kuryente kasunod ng pag – iral ng Tax Reform for Acceleration and Inclusion (TRAIN) Law simula ngayong taon.

Babala ni Energy Spokesman Undersecretary Wimpy Fuentebella, tiyak na magiging pass – on charge o ipapasa lamang ang dagdag singil sa mga konsyumer lalo na iyong sa mga end – user ng kuryente.

Gayunman, nilinaw ni Fuentebella na magiging mababa o maliit lamang ang magiging pagtaas sa singil sa kuryente dahil hindi naman lahat ng planta ay pinatatakbo ng mga produktong petrolyo.

Subalit aminado si Fuentebella na posibleng sumabay pa dito ang pagsipa ng universal charge dahil sa malikot na palitan ng piso kontra dolyar bukod pa sa presyuhan ng langis sa world market.

Mariing itinanggi ng Malakanyang na pinopondohan ng administrasyon o mismong ni Pangulong Rodrigo Duterte ang mga umano’y ‘online trolls’ sa social media.

Kasunod ito ng akusasyon ng mga kritiko na ginagamit umano ang trolls ng administrasyon para patahimikin ang mga kumokontra sa kanilang mga layunin.

Ayon kay Presidential Spokesman Harry Roque, walang nakalatag na pondo para sa online trolls at hindi aniya ginagamit ng gobyerno ang social media para mamulitika.

Kagaya na lamang aniya ang tinanggap niyang mga pag – atake ng mga trolls na patunay lamang na hindi ito nagmula sa administrasyon kung hindi nagmula sa oposisyon.

Magugunitang inakusahan ni MSNBC Anchor na si Ari Melber ng Amerika si Pangulong Duterte na ginamit umano ang social media para sa kaniyang political agenda na siyang nag – upo sa kaniya sa puwesto noong 2016 Elections.

Bumuwelta si Senate President Aquilino ‘Koko’ Pimentel III sa pasaring ni House Speaker Pantaleon Alvarez na ‘mabagal na Kapulungan’ ang Senado dahil kakaunting nagagawang batas nito.

Ayon kay Pimentel walang kumpetensiyang nagaganap sa pagitan ng Senado at Kamara sa pagpapatupad ng batas dahil kalidad ang kanilang mas pinahahalagahan.

Paliwanag pa ni Pimentel, kaya natatagalan ang Senado sa mga panukalang batas ay dahil dumadaan ito sa masusing pag – aaral upang matiyak na ito’y para sa kapakinabangan ng nakararami.

Depensa pa ng senador, natural lamang na maraming panukalang batas sa Kamara dahil binubuo ito ng maraming Kongresista kung saan nanggagaling ang ‘local bills’.

Magugunitang sinabi ni Alvarez sa isang panayam na mabagal umusad sa Senado ang mga panukalang batas.

Nasa kustodiya na ni Mandaluyong City Officer – in – Charge (OIC) Chief Senior Superintendent Enrique Antarap ang team leader ng mga pulis na nasasangkot sa mistaken identity at shootout incident sa lungsod na ikinasawi ng dalawa (2) katao.

Kasunod ito ng pagsuko ni Inspector Maria Cristina Vasquez, Mobile Patrol Unit Chief at team leader ng Mandaluyong City police, matapos ang limang (5) araw na pagtatago.

Ayon kay Eastern Police District SITG Head Superintendent Florendo Quibayen, nagreport muna si Vasquez sa National Capital Region Police Office (NCRPO) bago ito tuluyang sumuko nitong Miyerkules, 3:30 ng hapon.

Nangako din aniya si Vasquez na nakahanda itong harapin ang mga kasong isasampa laban sa kanya kaugnay ng insidente ng pamamaril.

Samantala, sinabi naman ni Mandaluyong City PIO Chief Jimmy Isidro na nagpadala na ng surrender feeler ang isang pang pinaghahanap na barangay tanod na si Jorge Gulpo.

Ayon kay Isidro, posibleng ngayong Huwebes ng gabi o Biyernes ng umaga ay sumuko na si Hulpo.

Ibinabala ni House Speaker Pantaleon Alvarez ang No Election o No–El scenario sa pagsapit ng taong 2019 kasabay ng midterm elections.

Ito aniya’y kung tatanggapin ng taumbayan ang kanilang binabalangkas sa mababang kapulungan ng Kongreso na bagong saligang batas upang magbago na ng sistema ng gobyerno mula sa presidential patungong federalism.

Paliwanag ni Alvarez, may isasama aniyang ‘transitory provisions’ sa bagong konstitusyon na magtatakda kung kailan matatapos ang termino ng kasalukuyang mga opisyal ng pamahalaan.

Sinegundahan naman ito ni Senate President Aquilino ‘Koko’ Pimentel III na nagsabing posibleng mangyari rin ang No–El scenario sa pagpili ng hahalili kay Pangulong Rodrigo Duterte sa 2022.

Ngunit, nang tanungin si Pimentel hinggil sa posibilidad ng term extension o pagpapalawig sa termino ni Pangulong Duterte, sinabi niyang posible ito kung lubhang hihingin ng pagkakataon.

Subalit nakadepende aniya ito sa kagustuhan ng Pangulo at kung ito’y itinatadhana ng bagong saligang batas na tanggap aniya ng taumbayan.

Apat (4) na bansa ang nakatakdang bisitahin ni Pangulong Rodrigo Duterte ngayong taon.

Ayon kay Presidential Spokesperson Harry Roque, kabilang sa mga bansang pupuntahan ng Pangulo ang India, South Korea, Australia at Israel.

Aniya, unang magtutungo ang Pangulo sa Delhi para dumalo sa India – Association of Southeast Asian Nations Commerative Summit na gaganapin ngayong Enero.

Posibleng paunlakan ni Pangulong Duterte ang imbitasyon ng India sa sampung (10) mga ASEAN head of state para sa Republic Day Parade ng nasabing bansa sa Enero 26.

Sinabi naman ni Roque na wala pang detalye ang nakalatag para naman sa pagbisita ng Pangulo sa South Korea, Australia at israel.

Bukod dito, inaasahan din ang pagdalo ni Pangulong Duterte sa 2018 Asia Pacific Economic Cooperation Leaders Summit sa Papua New Guinea at ASEAN Summit and Related Meetings sa Singgapore.