Umalma ang ilang faculty ng Ateneo de Manila University sa naging pahayag ng pangulo nito na si Fr. Roberto Yap tungkol sa pagkasawi ng dalawang student-athletes nito na sina Rene Baterbonia at Divine Adili.
Ayon sa mga propesor, bagaman kaisa nila ang unibersidad sa pagluluksa sa dalawang naturang atleta, nananawagan ang mga ito ng kasagutan sa kanilang mga tanong tungkol sa insidenteng kinasasangkutan ng Ateneo Blue Eagles sa Dipaculao, Aurora.
Kabilang sa mga ito ay: kung nasunod ba ang due process sa pagsasagawa sa nasabing aktibidad; kung naipaalam sa mga magulang ng mga atleta ang aktibidad; kung may mga safety measure bang sinunod ang mga coach at staff ng koponan upang maiwasang malunod ang mga manlalaro; kung anong mga hakbang ang nagawa nito upang suportahan ang mga naulilang pamilya nina Baterbonia at Adili; at kung bakit hindi kaagad naka-responde ang unibersidad matapos ang insidente.
Nais ding malaman ng mga propesor kung maituturing nang preventive suspension ang leave of absence nina Ateneo Head Coach Tab Baldwin at Team Manager nitong si Christopher Quimpo.
Umapela rin ang mga faculty sa pamunuan ng Ateneo na humarap sa publiko atpersonal na magpakumbaba at humingi ng paumanhin sa pamilya ng mga nasawing basketbolista.
Nabatid na kabilang sa mga lumagda sa naturang liham si Aika Robredo, panganay na anak ni Naga City Mayor at dating Vice President Leni Robredo, na kasalukuyang nagtuturo sa Department of Political Science ng Ateneo. — sa panulat ni Anjo Riñon
