Posibleng magkaroon ng epekto sa ekonomiya ang patuloy na political issues, kabilang ang impeachment hearings, dahil nagdudulot ito ng pangamba sa mga negosyante at foreign investors.
Ayon kay dating Bangko Sentral ng Pilipinas (BSP) Deputy Governor Diwa Guinigundo, maaaring kuwestiyunin ng investors kung may aasahang policy continuity at consistency habang abala ang Senado at Kamara sa mga usaping pampulitika.
Kapag tumaas ang risk perception sa bansa, maaari ring tumaas ang tinatawag na risk premium, na maaaring magpamahal sa pangungutang ng gobyerno at pribadong sektor.
Gayunman, sinabi ni Guinigundo na makatutulong kung makikita ng investors na nagpapatuloy ang mga reporma, malinaw ang plano para sa fiscal sustainability at nagsusumikap ang Bureau of Internal Revenue (BIR) at Bureau of Customs (BOC) na palakasin ang revenue collection.
Aniya, maaaring maging positive o magandang signal sa investors ang pagkakaroon ng malinaw na plano para mapataas ang revenues at mabawasan ang pangangailangan ng gobyerno na mangutang.
