Sinabi ni Senate Deputy Majority Leader JV Ejercito na nakatulong ang mga naging pahayag ng mga legal expert at dating mahistrado sa impeachment court kaugnay ng usapin sa voting threshold.
Ayon kay Ejercito, mahalaga ang naging pagdinig sa mga amici curiae, lalo na’t hindi lahat ng senador ay abogado. Aniya, nakatulong ang mga paliwanag ng mga dating chief justice at associate justice upang mas maunawaan ng mga senador kung ano ang maaari at hindi maaaring gawin sa proseso.
Gayunman, sinabi ni Ejercito na kailangan pa nilang pag-aralan kung ano ang magiging batayan sa pagtukoy ng kinakailangang bilang ng boto para sa impeachment case.
Inaasahan din na magkakaroon ng caucus ang mga senator-judge upang pag-usapan kung idadaan sa botohan o ipaubaya sa presiding officer ang magiging desisyon sa usapin ng voting threshold sa impeachment trial
Binigyang-diin ni Ejercito na higit sa magiging resulta, mahalagang matiyak na magiging patas, transparent at naaayon sa Konstitusyon ang proseso.
