HOT STORIES OF THE WEEK

Inamin ni Atty. Oliver Lozano na siya lamang ang gumawa ng draft proposal kaugnay sa posibleng compromise agreement ng gobyerno at pamilya Marcos.

Sinabi sa DWIZ ni Lozano na hindi na kailangan ang pag-apruba o go signal ng pamilya Marcos kaugnay sa naging hakbang niya na aniya’y bahagi lamang ng tungkulin niya bilang isang concerned citizen para matupad ang kahilingan noon ng dating Pangulong Ferdinand Marcos.

“Itong pagmungkahi natin ay upang makatulong na maipatupad ang huling bilin ni President Marcos, meron siyang hand written legacy noong April 9, 1973 na ang kanyang kayamanan ay para sa taong bayan, para sa tao, regardless of religious and political beliefs, sang-ayon din doon sa public vow ni Mrs. Marcos na kanyang ipatupad ang nasabing huling bilin.” Ani Lozano

Malacañang

Hindi maituturing na isang proposal ang lumulutang na compromise agreement na ipinupursige ni Atty. Oliver Lozano sa pagitan ng pamahalaan at ng pamilya Marcos.

Ayon kay Presidential Spokesperson Secretary Harry Roque, nagsalita na rin kasi ang mga Marcoses na nagsabing wala silang ibinigay na kapahintulutan kay Atty. Lozano para pumasok sa isang kasunduan sa pamahalaan.

Lumalabas tuloy na wala talagang awtoridad si Lozano na makipag-usap sa pamahalaan at kumatawan sa pamilya Marcos para sa isang compromise agreement.

Bunsod nito’y hindi talaga uubra ayon kay Roque na maikunsiderang isang proposal ang inisyatibo ni Atty. Lozano gayung lumalabas na walang basbas ang aksyon nito mula sa pamilya ng dating Pangulo ng Republika.

Una nang inamin ni Chief Presidential Legal Counsel Atty. Salvador Panelo na nakatatanggap siya ng sulat mula kay Lozano pero walang consent mula sa kinauukulang pamilya.

(Balitang Todong Lakas Interview / with report from Jopel Pelenio)

January 3, 2018 0 comment

HEADLINES HOT STORIES OF THE WEEK

Paghahanda para sa traslacion ng Itim na Nazareno plantsado na

written by Judith Estrada-Larino

Handang-handa na ang Manila Police District o MPD sa traslacion kaugnay sa pista ng Itim na Nazareno sa Enero 9, araw ng Martes.

Tiniyak ito sa DWIZ ni MPD Spokesman Supt. Erwin Margarejo na nagsabi ring wala silang babaguhin sa naikasa nilang contingency measures noong isang taon bagamat dadagdagan nila ang tropa ng mga pulis na magbabantay sa takbo ng traslacion.

Hihingi aniya sila ng dagdag-puwersa sa NCRPO para mapalakas ang kanilang tropa at maging maayos ang pagpapatupad ng seguridad dito.

Ipinabatid ni Margarejo na nabuo na nila ang tatlong task groups para sa kapistahan ng itim na Nazareno at kabilang dito ang tututok sa seguridad, emergency preparedness at peace and order.

“Ang mga magagandang ipinatupad natin noong nakaraang taon ay ime-maintain lang po natin sa ngayon pero mas daragdagan natin yung pulis na gagamitin considering na sa aming evaluation, ang estimated crowd ay nadaragdagan annually ng 15 to 20 percent increase kaya gagamit tayo ng mahigit 5,000 pulis, wala pa diyan ang augmentation mula sa NCRPO at regional offices.” Pahayag ni Margarejo

Kaugnay nito, ininspeksyon na ng mga opisyal ng MPD at Quiapo Church ang rutang dadaanan ng Itim na Nazareno sa traslacion sa January 9.

Pinangunahan nina MPD Director Joel Coronel at Monsignor Hernando Ding Coronel, Rector ng Quiapo Church ang inspeksyon kasama ang mga opisyal ng DPWH mula Quirino Grandstand sa Rizal Park haggang P. Burgos Street.

Nabatid na mag-iiba ng ruta ang traslacion ngayong taon kung saan sa halip na sa eastbound lane ng P. Burgos at Lagusnilad ang prusisyon ay tutungo sa Westbound Lane ng P. Burgos.

Sinabi ni Coronel na dahil sa inaasahan nilang malaking bilang ng devotees mas ligtas kung ang prusisyon ay hindi na dadaan sa Lagusnilad.

Clearing ops

Lilinisin ang lahat ng mga obstructions o harang sa mga lansangan para sa traslacion kaugnay sa kapistahan ng Itim na Nazareno.

Ipinabatid ito ni MPD Director Chief Supt. Joel Coronel matapos ang isinagawang inspeksyon sa dadaanan ng prusisyon.

Sinabi ni Coronel na maglalabas sila ng final advisory kabilang ang rerouting plan para sa mga sasakyan sa Biyernes, Enero 5.

Ayon pa kay Coronel, wala namang banta sa kasalukuyan kaugnay sa pista ng Itim na Nazareno.

Samantala, pinayuhan naman ni Monsignor Hernando Ding Coronel, rector ng Quiapo Church ang mga buntis at may mga sakit lalo na sa puso na huwag nang sumama sa traslacion para na rin sa kanilang kaligtasan.

(Balitang Todong Lakas Interview)

January 3, 2018 0 comment

HEADLINES HOT STORIES OF THE WEEK NATIONAL NEWS

Pag-anunsyo sa sisibaking Presidential appointee ipinagpaliban

written by DWIZ 882

Ipinagpaliban na ng Malacañang ang pag-anunsyo sa sisibaking opisyal ni Pangulong Rodrigo Duterte.

Ayon kay Presidential Spokesperson Harry Roque, may natanggap siyang utos na huwag munang isiwalat ang naturang impormasyon.

Hindi naman nilinaw ni Roque kung kay Pangulong Rodrigo Duterte galing ang naturang utos.

Matatandaang una nang nasibak sa ilalim ng Duterte administration sina Department of Interior and Local Government o DILG Secretary Mike Sueno, Dangerous Drugs Board o DDB Chairman Dionisio Santiago at Presidential Commission for the Urban Poor Chairman Terry Ridon.

(Ulat ni Jopel Pelenio)

January 3, 2018 0 comment

HEADLINES HOT STORIES OF THE WEEK NATIONAL NEWS RONDA PROBINSYA

PDuterte isa sa mga naging dahilan kaya’t pumangatlo ang PH sa pinakamasayang bansa sa mundo – Palasyo

written by DWIZ 882

Naniniwala ang Malakanyang na isa si Pangulong Rodrigo Duterte sa dahilan kung bakit pumangatlo ang Pilipinas sa pinakamasayang bansa sa buong mundo.

Kasunod ito ng resulta ng 41st Annual Global End of the Year survey ng Gallup International kung saan naitala ang iskor na 84 sa net happiness score ng Pilipinas at kilalaning pangatlo sa pinakamasayang bansa kasunod ng Fiji at Colombia.

Ayon kay Presidential Spokesperson Harry Roque, isang magandang balita para sa Pilipinas ngayong bagong taon ang pagiging pangatlo sa pinakasamasayang bansa sa buong mundo.

Dagdag ni Roque, bagama’t kilala na ang Pilipino sa pagiging masayahin at matatag, malinaw pa rin na tanggap ng publiko ang mga pagbabagong nararamdaman sa bansa sa ilalim ng pamumuno ni Pangulong Duterte.

Maituturing naman aniyang hamon sa pamahalaan ang panatilihin ang takbo at momentum sa paglago ng ekonomiya ng bansa at maramdaman ito ng lahat ng Pilipino.

January 3, 2018 0 comment

HEADLINES HOT STORIES OF THE WEEK NATIONAL NEWS RONDA PROBINSYA

DOLE: Mas maraming trabaho magbubukas ngayong 2018

written by DWIZ 882

Magiging in demand sa kasalukuyang taon ang mga trabahong may kinalaman sa Information Technology (IT), business process management, turismo at konstruksyon.

Batay ito sa labor market signaling system ng Department of Labor and Employment (DOLE) kung saan inaasahan ang pagbubukas ng mga trabaho sa mga nasabing sektor ngayong 2018.

Sinabi pa ni DOLE Bureau of Local Employment Director Dominique Rubia – Tutay, magbubukas din ang trabaho para sa social media analysts at chat box operators dahil sa gaganaping midterm elections sa susunod na taon.

Aniya, ito ang mga trabahong humahawak sa social media accounts ng isang personalidad tulad ng mga artista at politiko o mga nagpaplanong tumakbo sa eleksyon.

Kasabay nito, pinaalalahanan namang ni Tutay ang mga naghahanap ng trabaho na suriin pa ring mabuti ang validity ng mga iniaalok na trabaho.

January 3, 2018 0 comment

HEADLINES HOT STORIES OF THE WEEK NATIONAL NEWS RONDA PROBINSYA

Militar balik – operasyon na vs NPA

written by DWIZ 882

Balik na ang operasyon ng militar laban sa rebeldeng grupong New People’s Army (NPA) 12:00 ng hating gabi ng Miyerkules, Enero 3.

Kasabay ito ng pagtatapos ng ipinatupad na unilateral ceasefire ng pamahalaan dakong 11:59 ng gabi ng Martes, Enero 2.

Ayon kay Defense Spokesperson Arsenio Andolong, kung pagbabatayan ang rules of engagement, otomatikong magbabalik ang offensive combat operations ng militar oras na mapaso ang idineklarang tigil putukan.

Maliban na lamang aniya kung may ibang ipag – uutos si Pangulong Rodrigo Duterte.

Inihayag naman ni Andolong na naging pangkalahatang matagumpay ang ipinatupad na unilateral ceasefire ng pamahalaan bagama’t nagkaroon ng maliliit na labanan at paglabag ang NPA.

Nagkaroon aniya ng pagkakataon ang mga sundalo na makapagpahinga.

January 3, 2018 0 comment

HEADLINES HOT STORIES OF THE WEEK NATIONAL NEWS

BIR nakatakdang magpalabas ng IRR sa TRAIN Law

written by DWIZ 882

Nakatakdang magpalabas ng Implementing Rules and Regulation (IRR) ang Bureau of Internal Revenue o BIR kaugnay ng Tax Reform for Acceleration and Inclusion (TRAIN) Law na epektibo na simula Enero 1, 2018.

Kabilang dito ang revenue regulations hinggil sa income tax, withholding tax, value added tax, excise tax on petroleum, excise tax on automobiles, excise tax on mineral products, excise tax on tobacco, excise tax on sweetened beverage, cosmetic procedures, estate at donor’s tax, percentage tax, at documentary stamp tax.

Gayundin ang Revenue Memorandum Order o RMO tungkol sa value added tax (VAT) refund system at sistema sa eSales at eReporting.

Habang isang public consultations naman ang isasagawa ng BIR sa Enero 11 at 12, at internal briefing sa Enero 24 hanggang 26 hinggil sa TRAIN Law.

Kasabay nito, hinikayat ng BIR ang lahat ng mga tax payer na unawaing mabuti ang bagong batas sa pagbubuwis at makiisa sa mga gagawing public consultations ng BIR para sa maayos na pagpapatupad ng TRAIN Law.

January 2, 2018 0 comment

HEADLINES HOT STORIES OF THE WEEK NATIONAL NEWS RONDA PROBINSYA

Listahan ng pangalan ng mga bagyo inilabas na ng PAGASA

written by DWIZ 882

Inilabas na ng PAGASA ang listahan ng mga pangalan ng bagyo na kanilang ipapangalan sakaling pumasok na ang mga ito sa Philippine Area of Responsibility (PAR).

Kabilang sa mga nasa listahan para sa taong ito ay ang mga pangalang Basyang, Caloy, Domeng, Ester, Florita, Gardo, Henry, Inday, Josie, Karding, Luis, Maymay, Neneng at Ompong.

Kabilang din ang pangalang Paeng, Quennie, Rosita, Samuel, Tomas, Usman, Venus, Waldo, Yayang at Zeny.

Habang nasa auxiliary list naman ang mga pangalang Agila, Bagwis, Chito, Diego, Elena, Felino, Gunding, Harriet, Indang at Jessa.

Bagama’t karaniwang nasa dalawangpu (20) ang bilang ng mga bagyong pumapasok sa bansa kada taon, sinabi ng PAGASA na naghahanda sila ng dalawangpo’t limang (25) pangalan sakaling madagdagan ito batay sa kanilang mga pag – aaral.

Magugunitang pinangalanang Agaton ang kauna – unahang bagyo na pumasok sa bansa sa unang araw ng bagong taon na kasalukuyang nananalasa sa bahagi ng Mindanao at Visayas.

January 2, 2018 0 comment

HEADLINES HOT STORIES OF THE WEEK NATIONAL NEWS RONDA PROBINSYA

Umano’y ‘compromise deal’ sa pagitan ng pamilya Marcos at gobyerno, itinanggi ng Palasyo

written by DWIZ 882

Itinanggi ng Malakanyang na nakabuo na sila ng isang compromise deal sa pagitan ng pamilya Marcos kaugnay ng mga tagong yaman nito.

Kasunod ito ng kumalat online ng sinasabing kopya ng compromise agreement sa pagitan ng pamahalaan at pamilya Marcos na ipinost ng Education Advocate na si Gang Badoy Capati.

Batay sa ipinost ni Capati, ang dokumento ay naka – address sa Department of Justice (DOJ) kung saan iminumungkahi ang pagbibigay ng immunity sa pamilya Marcos at pagbuo ng isang legal team na susuri sa bubuoing compromise deal.

Ayon kay Presidential Spokesperson Harry Roque, tanging kopya lamang ng draft proposal mula sa pamilya Marcos ang natanggap ng Malakanyang subali’t hindi pa ito inaaksyunan at wala pang nabuong kasunduan.

Inamin naman ni Chief Presidential Legal Counsel Salvador Panelo na natanggap na ng kanyang opisina ang proposal para sa isang compromise deal mula kay Attorney Oliver Lozano na kilalang Marcos loyalist.

Gayunman iginiit ni Panelo na bilang pagpapakita ng kortesiya kaya nila tinanggap ang sulat pero hindi pa ito inaaksyunan.

January 2, 2018 0 comment

HEADLINES HOT STORIES OF THE WEEK NATIONAL NEWS

Mataas na gov’t official nais sibakin ni PDuterte sa unang araw ng 2018

written by DWIZ 882

Isang mataas na government official ang nais sibakin sa puwesto ni Pangulong Rodrigo Duterte sa unang araw pa lamang ng taon.

Gayunman, isiniwalat ni Presidential Spokesman Harry Roque na ipinagpaliban ni Pangulong Duterte ang naturang desisyon, sa halip ay sa Miyerklues, Enero 3, na lamang niya ito planong ianunsyo.

Ayon kay Roque, pinayuhan niya ang Pangulo na hayaan munang makapagdiwang ng bagong taon ang sisibaking opisyal.

Hindi naman idinetalye ng tagapagsalita ng Palasyo kung sinong mataas na opisyal ang panibagong sisibakin ni Pangulong Duterte.

Matatandaang una nang tiniyak ng Malakanyang na agad magtatalaga si Pangulong Rodrigo Duterte ng mga bagong commissioner ng Energy Regulatory Commission (ERC).

Ito ay sakaling magpasya na ang Pangulo na tuluyang sibakin ang mga opisyal ng komisyon na unang sinuspinde ng ombudsman.

Batid umano ng sambayanan ang sinseridad ng Pangulo na malinis sa lahat ng uri ng katiwalian ang gobyerno kaya’t hindi nito hahayaang mamayagpag ang lahat ng masasangkot dito.

January 1, 2018 0 comment

Newer Posts

Older Posts