HOT STORIES OF THE WEEK

(As of 5PM)

Ganap nang tropical depression ang pumasok na low pressure area (LPA) sa loob ng Philippine Area of Responsibility (PAR) bago ang pagsalubong sa bagong taong 2018, at pinangalanang ‘Agaton’.

Huling namataan ang sentro ng tropical depression Agaton sa layong 175 kilometro ng East Northeast ng Hinatuan, Surigao del Sur.

Taglay nito ang lakas ng hanging umaabot sa 45 kilometro kada oras malapit sa gitna at may pagbugso na umaabot sa 60 kilometro kada oras.

Ang tropical depression Agaton ay kumikilos papuntang kanluran sa bilis na 19 kilometro kada oras.

Isinailalim sa tropical cyclone warning Signal No. 1 ang Southern Leyte Surigao del Norte including Siargao Island, Surigao del Sur, Dinagat Island, Agusan del Norte, Agusan del Sur, Davao Oriental, Davao del Norte, Davao del Sur, North Cotabato, Compostela Valley, Misamis Oriental, Misamis Occidental, Lanao del Norte, Lanao del Sur, Camiguin, at Bukidnon.

Ipinabatid ng Philippine Atmospheric Geophysical and Astronomical Services Administration (PAGASA) na inaasahang magla-landfall ang tropical depression Agaton sa Caraga area ngayong gabi o bukas ng umaga.

Paglaganap ng pag – ibig at pag – asa sa isa’t isa ang hiling ni vice President Leni Robredo ngayong bagong taong 2018.

Sa kanyang New Year message, sinabi ng Pangalawang Pangulo na tanglaw pa rin ng pag – asa ang mga Pilipino sa kabila ng hinaharap na pagsubog.

Nariyan na aniya ang pagkalat ng negatibismo at galit gayundin ang paglaganap ng takot at karahasan sa lipunan.

Kasunod nito, nangako si Robredo na paiigtingin pa ng kanyang tanggapan ang adhikaing maiangat ang bawat Pilipino mula sa kahirapan lalo na ang mga nasa laylayan ng lipunan.

Epektibo na ngayong unang araw ng 2018 ang ipinasang Tax Reform Acceleration and Inclusion (TRAIN) Law na inaasahang magiging susi sa pag – unlad ng bansa gayundin sa buhay ng bawat Pilipino.

Simula ngayong Enero 1, hindi na dapat patawan ng buwis ang mga manggagawang sumusuweldo ng dalawangdaan at limangpung libong piso (P250,000.00) pababa kada taon.

Gayunman, asahan na ang otomatikong pagtataas sa presyo ng mga produktong petrolyo maliban sa malikot na presyuhan ng langis sa world market.

Batay sa kuwenta ng pamahalaan, nasa dalawang piso at limangpung sentimos (P2.50) ang otomatikong dagdag sa presyo ng kada litro ng diesel at auto LPG.

Aabot naman sa dalawang piso at animnapo’t limang sentimos (P2.65) ang otomatikong dagdag presyo ng gasolina habang nasa tatlong piso (P3.00) naman sa kerosene at piso (P1.00) ang otomatikong dagdag sa presyo ng LPG o cooking gas.

Asahan din ang pagtaas sa presyo ng mga pangunahing bilihin partikular na ang mga matatamis na inumin at mga sasakyan dahil sa dagdag buwis na ipapataw dito.

Nagpaabot ng pagbati si Pangulong Rodrigo Duterte sa bawat Pilipino na nasa loob at labas ng bansa.

Ayon kay Pangulong Duterte, sa pagpasok ng taong 2018 nawa’y magkaisa ang bawat pamilyang Pilipino sa pagbubukas ng panibagong yugto ng kasaysayan at sama – samang harapin ang hamon ng buhay tungo sa tagumpay at pag – unlad ng bayan.

Giit ng Punong Ehekutibo, sa ngayon, nasa panahon ng matinding pagsubok ang bansa, dahil sa patuloy na hinahadlangan ng katiwalian, kriminalidad, iligal na droga at terorismo ang pag – used ng Pilipinas.

Ngunit, naniniwala ang Pangulo, na sa pagpasok ng taong 2018, mananatili paring matatag ang bawat isa upang mapaglabanan at mapagtagumpayan ang mga kinakaharap na problema ng bansa.

Mensahe pa ni Pangulong Duterte, yakapin ang hinaharap nang may pag – asa at paninindigang tuparin ang mga pangarap para sa isang mas maayos at maunlad na bukas.

Tatlongpung porsyento (30%) na ng lungsod ng Marawi ang nalinis sa mga pampasabog.

Ayon kay Major General Arnold Rafael Depakakibo, ang chief engineer ng Armed Forces of the Philippines (AF), na sa kabila ng progreso ng kanilang operasyon sa naturang lungsod ay patuloy pa rin ang rehabilitasyon ditto.

Batay sa datos ng AFP, nasa kabuuang dalawang libo walong daan at limangpo’t tatlo (1,853) na iba’t ibang klase mga hindi nagamit na pampasabog at apatnaraan at labing limang (415) improvised explosive devices (IED) ang narekober hanggang nitong Disyembre 15.

Naayos na din ng Joint Engineering Task Group o JETG ang nasa dalawangpung (20) kilometrong primary at secondary roads, tatlong (3) mga pangunahing tulay, eskwelahan at tatlong bahay sambahan.

Sa kasalukuyan, mayroon nang limangdaang (500) military engineers ang naipakalat sa Marawi City para tumulong sa recovery, reconstruction at rehabilitation operations.

Patuloy na binabantayan ng PAGASA ang namataang low pressure area (LPA) na posibleng pumasok sa Philippine Area of Responsibility (PAR) ngayong Sabado, Disyembre 30.

Ang nasabing sama ng panahon ay huling namataan sa layong 1,245 kilometro ng silangan ng Mindanao.

Ayon sa PAGASA, nasa 50% ang tiyansa na tuluyang mabuo ito bilang isang ganap na bagyo na papangalanang ‘Agaton’, na unang magiging bagyo sa papasok sa taong 2018.

Kung sakaling maging ganap bagyo ang naturang LPA, tinatayang magla-landfall ito sa Eastern Mindanao sa Lunes, Enero 1, ng hapon o Martes, Enero 2, ng hapon.

Samantala, dalawang (2) weather system naman ang umiiral sa bansa ngayong Sabado, Rizal Day.

Magdadala ng maulap na kalangitan na may kasamang pag-uulan, pagkidlat at pagkulog ang buntot ng cold front sa bahagi ng Bicol at Caraga Region.

Habang naaapektuhan ng hanging amihan ang bahagi ng Cagayan Valley at Administrative Region, kabilang na ang Metro Manila, Ilocos Region, ilang bahagi ng Central Luzon, at CALABARZON.

Magdadala naman ito ng bahagyang maulap hanggang sa maulap na papawirin na may kasamang kalat-kalat na pag-ulan.

Itinanghal na ‘Person of the Year’ ng isang anti – organized crime group ang Pangulong Rodrigo Duterte.

Gayunman, negatibo ang kahulugan ng nasabing titulo ng Pangulo dahil ibinibigay lamang ito ng Organized Crime and Corruption Reporting Project o OCCRP sa mapipiling indibidwal na may pinakamaraming nagawa para mas maisulong ang organized criminal activity.

Sinabi ni OCCRP Editor Drew Sullivan na ginawang katawa – tawa ni Pangulong Duterte ang Rule of Law ng Pilipinas dahil sa kampanya kontra iligal na droga ng gobyerno.

Subalit hindi man tipikal na corrupt leader, inihayag ni Sullivan na sinuportahan naman ng Pangulo ang katiwalian sa bagong pamamaraan.

Binatikos ni Sullivan ang aniya’y death squad ng Pangulo na nakatuon sa mga kriminal at isinulong nito ang ‘bull run system of survival of the fiercest’.

Nakalaban ng Pangulo sa nasabing titulo sina dating South African President Jacob Zuma at pinatalsik na Zimbabwean President Robert Mugabe.