HOT STORIES OF THE WEEK

Pabagsakin sa taong 2018 ang Pangulong Rodrigo Duterte.

Ito umano ang target ng Communist Party of the Philippines o CPP sa pagdiriwang ng ika – 49 na anibersaryo nito.

Pinakilos ng CPP ang New People’s Army (NPA) na paigtingin ang opensiba laban sa Armed Forces of the Philippines (AFP) at Philippine National Police (PNP).

Pinatutugis din ng komunistang grupo ang mga tiwaling opisyal at umano’y death squad ng rehimeng Duterte.

Bukod dito, target din ng CPP na maitayo ang pinakamalawak na unyon para maialis ang US – Duterte regime at umano’y fascist terror nito.

Kasabay nito, ibinabala ng CPP ang mas marami pang kilos – protesta at ang mga pagkilos anito na isinasagawa ng mga manggagawa, jeepney drivers at iba pang sektor sa taong ito ay dress rehearsal lamang.

Inaasahang matutuloy na ngayong katapusan ng linggo ang muling pagbisita ni Pangulong Rodrigo Duterte sa Marawi City.

Ito ang inihayag ni Pangulong Duterte matapos maudlot ang kanyang nakatakda sanang pagbisita sa Marawi para pangunahan ang pagbibigay ng limangdaang (500) pansamantalang tirahan ng mga pamilyang naapektuhan ng limang (5) buwang digmaan.

Kinansela ang pagbiyahe ng Pangulo sa Marawi dahil sa masamang panahon noong Miyerkules.

Nais ng Pangulo na bago sumapit ang pagsalubong ng Bagong Taon ay maipamahagi na sa mga pamilyang naapektuhan ng Marawi Seige ang mga temporary shelter.

Magugunitang limampung (50) temporary shelters ang una nang naipamahagi ng Pangulo noong Oktubre na nakatirik sa 1.2 ektaryang lupain sa Barangay Bito Buadi Itowa sa nasabing lungsod.

Kung sakali, ito na ang ika – 7 beses na bumisita ang Punong Ehekutibo sa Marawi mula nang sumiklab ang gulo sa pagitan ng militar at ng teroristang Maute noong Mayo ng kasalukuyang taon.

Personal na binisita ni Pangulong Rodrigo Duterte ang mga lugar na nasalanta ng bagyong Vinta, ilang araw matapos humagupit ang kalamidad sa malaking bahagi ng Mindanao.

Hindi muna pinuntahan ni Pangulong Duterte ang ilang biktima ng kalamidad sa bayan ng Tubod, Lanao del Norte, sa halip ay kanyang pinangunahan ang meeting ng National Disaster Risk Reduction and Management Council (NDRRMC).

Dito kanyang tiniyak sa mga local government official na nasa likod lamang nila ang national government sa gitna ng recovery stage kasabay ng pagpaabot ng pakikiramay sa mga biktima.

I’d like to does extend my condolences to those who have died in this unfortunate event and of course to those who have suffered both in property and lives.

I dunno of the climate change that they have been talking about has really… have something to do with the greater or more or less than before.

Aminado ang Punong Ehekutibo na sadyang hindi maiiwasan ang mga kalamidad at ito ang reyalidad na dapat harapin lalo’t nasa Pacific Ocean ang bansa kung saan madalas tumama ang mga bagyo.

CPP – NPA sinupalpal

Muling sinupalpal ni Pangulong Rodrigo Duterte ang National Democratic Front – Communist Party of the Philippines – New People’s Army (NDF – CPP – NPA) sa gitna ng pag – atake nito sa mga tropa ng gobyerno matapos ang idineklarang holiday ceasefire.

Sa kanyang pagbisita sa mga lugar na nasalanta ng bagyo sa Tubod, Lanao del Norte, hindi naiwasan ni Pangulong Duterte na muling uminit ang ulo sa panibagong pagsalakay ng NPA sa Army Depot sa Compostela Valley, noong Pasko.

Muling binigyang – diin ng Pangulo na mga terorista at walang dangal ang mga rebeldeng komunista.

Wala aniyang kasunduan sa pagitan ng pamahalaan at NPA at malaya naman ang mga tropa ng gobyerno na magkaroon ng operasyon kahit saan dahil tungkulin nilang magbigay seguridad sa mga mamamayan.

Apat (4) na item sa 2018 National Budget ang ibineto ng Pangulong Rodrigo Duterte.

Binigyang – diin ng Pangulo na base sa kanyang pag aaral ay hindi makatuwiran ang ilang items na makakabawas pa sa pondo ng gobyerno.

Kabilang sa mga inalis ng Pangulo sa budget ang grant para sa monitoring at pondo sa ilang executive offices ng Movie and Television Review and Classification Board (MTRCB).

Sinabi ng Pangulo na batay sa Salary Standardization Law, ang lahat ng mga opisyal ng MTRCB ay tumatanggap na ng honoraria at per diem para sa pagtupad ng kanilang tungkulin.

Kasama din sa ibineto ng Pangulo ang probisyon sa batas na nagbabawal sa koleksyon ng bayad ara sa retention o reacquisition ng Philippine citizenship.

Mayroon aniyang mga kinauukulang ahensya ng gobyerno ang may otoridad para maningil ng minimal fee sa mga katulad na serbisyo.

Ibinasura din ng Pangulo ang probisyon na pinagtibay ng Department of Education (DepEd) para gamitin ang school maintenance sa kanilang mga operating expenses sa ilang mga proyekto na magsisilbing bahagi ng capital outlay.

Ika–4 na ibineto ng Pangulo ang pagbabawal sa paggamit ng kita ng Energy Regulatory Commission o ERC sa kanilang operating requirements.

Itinalaga ng Pangulong Rodrigo Duterte si dating Customs Chief Nicanor Faeldon sa Office of Civil Defense (OCD) na nasa ilalim ng Department of National Defense (DND).

Papalitan ni Faeldon bilang Deputy Administrator ng OCD si Rodolfo Santillan.

Magugunitang tinanggap ng Pangulo ang resignation ni Faeldon noong Agosto bilang pinuno ng Customs matapos masangkot sa naipuslit na mahigit anim na bilyong pisong (P6-B) halaga ng shabu shipment mula sa China.

Si Faeldon ay nakulong pa sa Senado matapos tumangging tumestigo sa hearing hinggil sa nasabing usapin.

Sen. Lacson at Defense Sec. Lorenzana sa pagkakatalaga kay Faeldon

Mananatiling nakakulong sa Senado si dating Customs Commissioner Nicanor Faeldon.

Ayon ito kay Senador Panfilo Lacson sa kabila nang pagkakatalaga dito ng Pangulong Rodrigo Duterte bilang Deputy Administrator ng Office of Civil Defense.

Sinabi ni Lacson na hindi madidiktahan ang Senado para palayain si Faeldon, bagamat kinikilala nila ang prerogative ng Pangulo na italaga ang dating Customs Chief.

Uubra naman aniyang mag–trabaho si Faeldon habang nakakulong sa Senado hanggang mapawalang – sala ito sa kasong contempt.

Samantaka, welcome kay Defense Secretary Delfin Lorenzana ang appointment ni dating Customs Commissioner Nicanor Faeldon.

Ayon kay Lorenzana, hindi na nila hiniling si Faeldon na isang honest, dedicate at competent official kaya’t tiyak na magiging asset ito sa Team OCD.

Sinabi ni Lorenzana na hindi sila nasabihan sa appointment ni Faeldon subalit welcome naman sa kanila si Faeldon.