Hinamon ni House trial spokesman at Lanao del Sur Rep. Zia Alonto Adiong ang kampo ni Vice President Sara Duterte na ilantad si “Mary Grace Piattos” kung balak nila itong iharap bilang saksi sa impeachment trial.
Ayon kay Adiong, inaasahang tatalakayin sa nakatakdang pre-trial conference sa Hunyo a-disi-otso ang mga ebidensya, mga saksi o testigo at iba pang detalye ng paglilitis na ihaharap ng magkabilang panig.
Dapat maisama anya si “Mary Grace Piattos” sa listahan ng mga testigo sa pre-trial, at dapat matukoy ang magiging daloy ng paglilitis, maging ang paglalatag ng mga dokumento, pagmamarka ng mga ebidensya, at pagresolba sa mga posibleng pagtutol bago magsimula ang aktwal na presentasyon upang maliwanagan ang publiko.
Kaugnay ito ng kontrobersiya sa confidential funds kung saan kinuwestiyon ng mga mambabatas ang mga pangalan at acknowledgment receipts na ginamit umano sa liquidation documents.
Binanggit din niya ang kaso ni “Kokoy Villamin,” na umano’y may magkaibang pirma sa dalawang acknowledgment receipts, dahilan upang posibleng kailanganin ang forensic examination ng mga eksperto.
Samantala, patuloy na inihahanda ng House prosecution panel ang kanilang mga ebidensya at mga saksi para sa nalalapit na pre-trial conference bago ang pormal na paglilitis.—sa panulat ni Anjo Riñon
