Pinaiimbestigahan sa Senado in aid of legislation ni Senador Robin Padilla ang pagkamatay ng dalawang atleta ng Ateneo de Manila University basketball team.
Sa ihahaing resolusyon ni Padilla sa Lunes, isinusulong niya ang motu proprio investigation para siyasatin ang tunay na pangyayari sa pagkamatay nina Rene Clert Baterbonia at Divine Adili ng Ateneo Blue Eagles.
Ito ay para ma-review at palakasin ang safety protocols ng mga school-related activities tulad ng palakasan.
Nilinaw ng senador na hindi para maghanap ng sisihin sa trahedya ang imbestigasyon, kundi upang tukuyin ang mga repormang kailangan upang hindi maulit ang kahalintulad na insidente.
Susuriin din sa ikakasang imbestigasyon kung sapat ang mga umiiral na pamantayan sa risk assessment, supervision, emergency preparedness, at crisis response para sa mga aktibidad na inorganisa ng mga paaralan partikular na ang mga outdoor, athletic, adventure-based, at iba pang gawaing may kaakibat na panganib.—sa panulat ni Anjo Riñon
