Dumating na sa Davao City kaninang madaling-araw, June 12 ang labi ng Ateneo basketball player na si Rene Baterbonia, sakay ng isang pribadong eroplano.
Sinalubong siya ng kanyang pamilya, mga kaibigan, at iba pang malalapit na kakilala sa Davao International Airport at agad namang dinala sa isang punerarya bago inihatid sa ateneo de Davao University Senior High School–Bangkal Campus, kung saan isasagawa ang burol.
Ayon sa unibersidad, magkakaroon ng pampublikong pagbisita mula ala-una hanggang alas-singko ng hapon ngayong Biyernes.
Habang sa Sabado at Linggo naman, bukas ang viewing mula alas-10 ng umaga hanggang alas-10 ng gabi, kasabay ng gabi-gabing misa bilang pagpupugay sa yumaong student-athlete.
Matatandaang nasawi si baterbonia kasama ang kapwa Ateneo student-athlete na si Divine Adili matapos malunod sa isang team-building activity sa Dipaculao, Aurora noong Lunes, June 8.
Samantala, patuloy naman ang imbestigasyon ng mga otoridad, kabilang ang National Bureau of Investigation, sa posibilidad ng criminal negligence kaugnay ng insidente. | Sa panulat ni Reabelle Medina.
