HOT STORIES OF THE WEEK

Naglagay na ng karagdagang tauhan ang PNP-Aviation Security Group sa mga paliparan sa bansa.

Ito ay matapos na magpatupad ng heightened alert ang Department of Transportation o DOTr kasunod ng nangyaring pagsabog sa Lamitan, Basilan na ikinasawi ng sampung (10) indibiduwal.

Ayon kay PNP Aviation Security Group Director Police Chief Superintendent Dionardo Carlos, pawang mga counter hi-jack trained ang karagdagang puwersa na kanilang idineploy sa mga paliparan lalo na sa Ninoy Aquino International Airport o NAIA.

Sa kabila nito, nilinaw ni Carlos na nananatiling payapa ang sitwasyon sa mga paliparan sa bansa at wala pa naman silang namomonitor na anumang bantang pan-seguridad.

Kaugnay nito, pinayuhan naman ni Manila International Airport Authority o MIAA General Manager Ed Monreal ang mga pasahero na huwag ika-alarma ang pinahigpit na seguridad at sundin lamang ang nakagawian nitong airport procedure.

Pinadalas din ng NAIA ang inspeksyon at random check ng mga sasakyan gamit ang bago nilang hybrid explosive detection equipment.

Dadagdagan din ang foot patrol at perimeter surveillance at dadalasan ang K-9 paneling.

—-

Isinailalim na sa heightened alert status ang buong Metro Manila kasunod ng pagsabog na naganap sa Lamitan, Basilan noong Martes na ikinasawi ng 10 katao.

Pagtitiyak ni National Capital Region Police Office o NCRPO Director Police Chief Superintendent Guillermo Eleazar, handa ang buong puwersa ng Kapulisan sa Metro Manila upang siguruhing hindi magkakaroon ng spill over sa NCR ang nangyaring pag-atake sa Basilan.

Hinikayat din ni Eleazar ang publiko na maging mapagmatyag at agad isumbong sa mga awtoridad ang mga makikitang kahina-hinalang kilos o bagay.

Kinalma naman ni Eleazar ang publiko at sinabing sa ngayon ay wala silang namomonitor na anumang banta ng terorismo sa Metro Manila.

Kasabay nito, pinaigting na rin ang mga isinasagawang checkpoints sa Kamaynilaan.—AR

—-

Aabot sa sampu (10) katao ang nasawi sa magkakahiwalay na operasyon ng pulisya sa iba’t ibang bayan sa Bulacan sa magdamag.

Patay matapos umanong manlaban ang isang drug suspect na kinilalang si alyas Alden sa ikinasang buy bust operations ng pulisya sa barangay Santisima Trinidad Malolos City.

Napatay naman ng mga rumesrespondeng pulis ang hindi pa nakikilalang lalaki matapos naman nitong pagnakawan ang isang bahay sa barangay Longon.

Dalawang hinihinilang carnapper naman ang napatay sa opersyon ng Highway Patrol Group sa San Jose del Monte.

Habang tatlong hinihinalang holdaper ang napatay din matapos makipagbarilan sa mga pulis sa barangay Caingin sa San Rafael.

Patay din ang dalawang drug suspect sa magkahiwalay na anti-drug operation ng pulisya sa Baliuag at Pulilan.

Samantala dalawang hindi pa nakikilalang lalaking sakay ng motorsiklo ang nakipagbarilan at napatay ng pulisya sa isang buy bust operations sa barangay Tawiran.

—-

Kumambiyo si Senate President Vicente Sotto III sa kanyang pag-aalinlangan sa pag-usad ng Tax Reform for Acceleration and Inclusion package 2 o TRAIN 2 sa Senado.

Ngayon, mismong si Sotto pa ang nagpahayag ng kanyang kahandaang i- endorso ang naturang panukalang batas.

Ayon kay Sotto, naipaliwanag na nang maayos ng Department of Finance na hindi maaepektuhan ang mahihirap dahil malaking negosyo lang ang siyang puntiryang singilin ng malaking buwis.

Ikinagalak naman ng Palasyo ang naging pahayag ni Sotto.

Ayon kay Presidential Spokesman Harry Roque, matapos ang naging pahayag ng lider ng Senado ay malaki ang kanilang kumpiyansa na sasang-ayon na rin ang iba pang mambabatas sa ikalawang bugso ng TRAIN.

Ihahain na ngayong araw ni Senate President Vicente Sotto III ang panukalang TRAIN 2 sa Senado.

Ito ayon kay Sotto ay upang agad nang masimulan ng Senate Committee on Ways and Means ang pag-aaral at masusing pagsusuri sa panukalang TRAIN 2.

Tiwala rin si Sotto na makakakuha na ng suporta mula sa iba pang mga senador ang panukalang TRAIN 2 oras na maipaliwanag na nang husto ng Department of Finance ang nilalaman at benipisyong maidudulot nito.

Paliwanag pa ni Sotto, matapos niyang maintihan ang nilalaman at layunin ng nasabing panukala, nakumbinse siyang maging sponsor nito sa Sotto.

Ilan aniya sa kanyang nagustuhan sa nilalaman ng panukalang TRAIN 2 ang pagbibigay ng tulong sa mga maliliit na negosyo at ang pagsasaayos na sa maraming tax incentives na ibinibigay sa mga korpoprasyon sa bansa.—Krista de Dios 

(Ulat ni Cely Bueno)

—-