HOT STORIES OF THE WEEK

Iginiit ng kumpaniyang NutriAsia na hindi kailanman sila gumagamit ng marahas na taktika para itaboy ang mga rallyista mula sa hanay ng mga sinibak nilang manggagawa at militanteng grupo.

Ayon kay NutriAsia Spokesperson Thelma Meneses, itinanggi nito ang paggamit nila ng goons para buwagin ang hanay ng mga nagpoprotesta sa labas ng kanilang pabrika sa Meycauayan, Bulacan.

Paliwanag ni Meneses, pawang nagmula sa mga pinagkakatiwalaan at propesyunal na security agencies ang kanilang mga guwardiya kaya’t hindi totoo ang paratang na nagbabayad sila ng mga goons.

Pinabulaanan din ni Meneses na sila ang naglabas ng video na kumakalat ngayon sa social media na nagpapakita umano sa tunay na nangyari nang sumiklab ang gulo noong Hulyo 30.

Magugunitang hindi bababa sa 19 ang inaresto ng Meycauayan Police subalit kalauna’y pinalaya rin ng prosecutor’s office para isailalim sa prelimenary investigation.

Posibleng dumoble pa ang isang milyong pisong alok na pabuya para sa pagkaka-aresto ng apat na dating Makabayan Bloc congressmen na ipinagharap sa kasong pagpatay.

Ito ang naging tugon ni Citizens Crime Watch Member Atty. Ferdinand Topacio matapos namang tawagin ng ilang militanteng lider na cheap political stunt ang alok nilang reward money.

Ayon kay Topacio, susubukan nilang doblehin pa at gawing dalawang milyong piso ang nakapatong na pabuya laban sa apat na dating mambabatas dahil tinawag aniya ni Bayan Muna Dec. Gen. Renato Reyes na cheap ang isang milyong piso.

Kanila aniyang hihintayin kung may magdodonate pa ng karagdagang pabuya.

Una nang sinabi ni Topacio na ang naunang isang milyong pisong patong sa ulo nina Anti Poverty Chairman Liza Maza, Dating Agrarian Reform Rafael Mariano at Dating Bayan Muna Representatives Satur Ocampo at Teddy Casinio ay donasyon ng ilang concerned citizens.

Ginawaran ni Pangulong Rodrigo Duterte ng Order of Lapu-Lapu ang mga sugatang biktima sa pagsabog sa Lamitan City, Basilan na ikinasawi naman ng sampu katao.

Personal na binisita ni Pangulong Duterte ang anim na sundalo at tatlong miyembro ng civilian active auxiliary na kasalukuyang nagpapagaling sa Camp Navarro General Hospital.

Ang Order of Lapu-Lapu ay ibinibigay para sa hindi matatawarang serbisyo ng mga kawani ng pamahalaan na nasugatan habang tinutupad ang kanilang tungkulin.

Kasabay nito, binigyan din ni Pangulong Duterte ng pinansyal na tulong ang pamilya ng mga nasugatang sundalo at CAA members.

Pinamamadali na ni Senador Manny Pacquiao ang pag-apruba sa panukala niyang ibalik ang parusang kamatayan.

Ito ang inihayag ni Pacquiao sa DWIZ sa kabila ng deklarasyon ni Pope Francis na hindi katanggap-tanggap at dapat ng wakasan  ang death penalty batay sa binagong turo ng Simbahang Katolika.

Ayon sa senador, mananawagan siya ng pagdinig upang lubusang matalakay ang nabanggit na panukala.

Yes biblically andiyan ‘yan sa Bible kung Bible ang pag-uusapan binibigyan ng karapatan ang authority to impose death penalty to those who commit heinous crime even in our constitution, andiyan ‘yan. It’s not sa sarili ko, o kagustuhan ko andiyan naman ‘yan sa Bible at constitution wala naman sigurong problema, pagdedebatehan naman ‘yan. Magko-conduct ako ng hearing para mapag-usapan para maliwanagan ang lahat.

Kasabay ng paglilinaw na limitado lamang dapat ang death penalty sa ilang heinous crime, kampante naman  ang Pambansang Kamao na susuportahan ng kanyang mga kasamahan ang hirit na ibalik ang parusang kamatayan.

Sa akin ‘yung heinous crime ‘yung drug trafficking, ‘yung mga pusher na ‘yan saka rape with murder saka kidnap for ransom and then robbery with murder. Kung drugs lang wala akong problema marami okay pagdating sa drugs. Tingin ko makakuha naman ng suporta ito sa [Senado] basta drugs lang.

(Usapang Senado Interview)

Nanatili pa ring nakataas ang heightened alert status ng NCRPO o National Capital Region Police Office.

Ayon kay NCRPO Director Chief Supt. Guillermo Eleazar, hindi pa rin inaalis ang heightened alert status sa Metro Manila kahit walang natatanggap na anumang banta sa seguridad.

Iginiit pa ni Eleazar, hindi maaaring maipagsawalang bahala ang nangyaring pagsabog sa Basilan at mas makabubuti aniya kung nakahanda ang pulisya.

Dagdag ni Eleazar, partikular na tinututukan ng NCRPO ang mga matataong lugar tulad ng mall at mga daanan papasok at palabas ng

Metro Manila tulad ng mga pantalan, paliparan at bus terminal.

Bukod dito, hindi rin isinasantabi ng NCRPO ang espekulasyon ng Armed Forces of the Philippines na posibleng kaso ng suicide bombing ang nangyari sa Basilan.

Mananatili ang hurisdiksyon ng hukuman sa isang akusado maliban na lamang kung tuluyan nang mabasura ang kaso laban dito.

Iyan ang ipinaliwanag ni Sandiganbayan Presiding Judge Amparo Cabotaje – Tang makaraang ihayag nito na hindi nila hahayaang ma-extradite si Napoles sa Amerika.

Ayon kay Cabotaje Tang, hindi maaaring paharapin sa korte sa ibang bansa si Napoles dahil kasalukuyang dinidinig ang kaso nito.

Magugunitang nahaharap sa limang patong ng kasong plunder si Napoles maliban pa sa kasong graft dahil sa multi-bilyong pisong pork barrel fund scam.

Una nang inihayag ni Justice Secretary Menardo Guevarra na maaaring ma-extradite si Napoles sa Amerika na nahaharap naman sa kasong money laundering.

Nanawagan ang Chamber of Mines of the Philippines sa pamahalaan na magsagawa ng konsultasyon mula sa kanilang hanay bago aprubahan ang ilang probisyon ng panukalang package 2 ng TRAIN o Tax Reform for Acceleration and Inclusion Law.

Ito’y ayon kay Chamber of Mines Executive Director Ronald Recidoro ay kasunod ng pangambang patawan ng 5% royalty tax ang operasyon ng lahat ng mga minahan sa ilalim ng nasabing panukala.

Giit ni Recidoro, lubhang maaapektuhan ang sektor ng pagmimina kung isasali ang nasabing probisyon sa panukala dahil madadagdagan pa ang kanilang bayarin.

Maliban pa ito sa ibinibigay na corporate income tax, business tax at ayuda ng mga mining companies sa mga apektadong katutubo o indigenous peoples sa mga mining sites.

Aminado ang mga senador na maraming negosyante ang aalma kung isusulong ang rationalization sa tax incentives na ibinibigay ng gobyerno sa mga ito.

Iyan ang pananaw nila Senate President Vicente “Tito” Sotto at Senate Ways and Means Committee Chairman Sonny Angara kaugnay sa panukalang package 2 ng TRAIN o Tax Reform for Acceleration and Inclusion Law.

Ayon kay Sotto na siyang may-akda ng panukala, mali ang pangamba ng marami hinggil sa rationalization na ipatutupad sakaling maisabatas na ito.

“Pag sinabi kasing rationalization, ako, as the filer of the TRAIN 2 version ng senate at the moment, naniniwala ako na ang rationalization ay straight doon sa salitang ‘’ira-rationalize natin’’…yung mga incentives, at yung mga dapat maiwan na tax incentives at hindi ang ibig sabihin nun ay yung kinakatakot ng iba na removal ng tax incentives.”

Sa panig naman ni Angara, kailangan ang masusing pag-aaral sa nasabing panukala dahil nakatulong din naman kahit papaano ang pagbibigay ng tax incentives para makalikha ng maraming trabaho.

“Yan ang pag-aaralan natin dahil marami naman ang sang ayon at sinasabing ‘’sige, I phase out na natin pero wag naman masyadong biglaan’’ dahil pinangako yan at dahil sa pangako, naglabas ng investment itong mga ibang kompanya which created jobs. Kung bibiglain mo naman, sabihin mo ‘’oh, 5 years ago sinabi mo, I will enjoy these incentives for this period tapos ngayon binabago mo yung usapan natin’’, yun ang mag iingat ho tayo siguro, kung ano yung magiging kondisyon ng reform natin ng incentives.”

Gayunman, sinabi ni Sotto sa kailangan niya munang makita ang pakinabang ng TRAIN 2 sa ordinaryong mga Pilipino dahil dito nakasalalay kung papasa ito o hindi sa senado.

“Kung maganda talaga ang mga laban at tama yung mga suspetsa ko na makikinabang yung mga malilliit maski micro, medium and small enterprises, may pag-asa yan. Pero kung yung mga parte don na hindi pa namin masyadong ika nga’y nakikita, biglang may lilitaw na makakasama ay mahihirapan.”

(From Usapang Senado interview)