HOT STORIES OF THE WEEK

Nasabat ng pinagsanib na puwersa ng Bureau of Customs o BOC, Philippine Drug Enforcement Agency o PDEA at Philippine National Police ang halos kalahating toneladang shabu sa Manila International Container Port (MICP), sa Tondo.

Ayon kay Philippine Drug Enforcement Agency Director General Aaron Aquino, nagkakahalaga ang mga iligal na droga ng tinatayang 4.3 bilyong piso.

Nadiskubre ang kontrabando sa isang abandonadong container van sa designation examination area ng MICP, kahapon.

Nakasilid aniya sa loob ng mga magnetic scrap lifter ang mga shabu nang buksan ang container van na napag-alamang dumating mula sa Malaysia, noong Hunyo 28.

Naka-consign sa Vecaba Trading ng isang Vedasto Cabral Baraquel na naka-base sa Barangay Lalud, Calapan City, Oriental Mindoro ang shipment.

Ang naturang shipment na pinakamalaking bulto at halaga ng illegal drugs na nasabat ngayong taon ay may kaugnayan sa malaking sindikato ng droga na pitong taon nang sinusubaybayan ng PDEA.

(Ulat ni Gilbert Perdez)

Sinibak ni Pangulong Rodrigo Duterte ang lahat ng opisyal ng NPF o Nayong Pilipino Foundation.

Nag-ugat ito sa di umano’y pag-apruba ng board sa kasunduang ipa upa sa lupain ng Nayong Pilipino sa halagang talo ang pamahalaan.

Tinukoy ni Presidential Spokesman Harry Roque ang mahigit sa 9 na ektaryang lupain ng NPF na ipinarenta sa Landing International Development Limited ng Hongkong sa loob ng 70 taon.

Ang pagsibak sa mga opisyal ng Nayong Pilipino ay inihayag ng Malacañang kasabay ng pagpapasinaya sa isa at kalahating bilyong dolyar na theme park ng Landing International at Nayong Pilipino Foundation.

Ayon kay Patricia Ocampo, chairperson ng NPF, isusulong ng landing pamanang kultura ng mga Pilipino sa pamamagitan ng isang theme park.

Nakapaloob sa isa at kalahating bilyong pisong investment ang Nayong Pilipno Theme Park, convention center, hotel, mga tanggapan, at commercial facilities.

—-

Posibleng bumuhos ang malakas na ulan sa Metro Manila, Cavite, Pampanga, Bulacan, Bataan, Zambales, Laguna at Batangas sa susunod na tatlong oras.

Ayon sa PAGASA, ang mga nabanggit na lugar ay makakaranas ng malakas na ulan na may kasamang malakas na hangin dahil sa thunderstorms.

Dahil dito, pinag-iingat ang lahat sa posibleng epekto ng halos tatlong oras na malakas na ulan tulad ng pagbaha, flashfloods at landslides.

Samantala, ganap nang isang bagyo ang low pressure area o LPA na namataan sa Silangang Luzon.

Ang bagyo na tinawag na Karding ang unang bagyo na nakapasok sa bansa ngayong Agosto at ang ika-labing apat ngayong 2018.

Ayon sa PAGASA, posibleng hindi lumapag sa kalupaan ang bagyong Karding.

May isa pang sama ng panahon ang binabantayan ng PAGASA sa kanlurang bahagi ng Subic Zambales na posible ring maging bagyo.

—-

Muling pinawi ni House Committee on Population and Family Relations Chairperson Sol Aragones ang pangamba ng publiko na malabag ang kanilang right to privacy matapos na lagdaan kahapon bilang batas ang Philippine Identification System.

Sa panayam ng DWIZ, sinabi ni Aragones tanging mga pangunahing impormasyon lamang ang laman ng Phil-ID gaya ng larawan, pangalan, tirahan, araw at lugar ng kapanganakan, edad, civil status at finger print.

Sa data base naman aniya ay optional ang paglalagay ng phone number at e-mail address.

Samantala, sinabi ni Aragones na hindi naman nakalagay sa batas na mandatory ang pagkuha ng Phil-ID.

Gayunman, mabibigo ang mga hindi kukuha nito na makuha ang serbisyong hatid ng gobyerno.

“Isang ID na lang gagamitin sa SSS, PhilHealth, GSIS, nandito na rin ‘yung sa mga senior citizen, hindi na nila kailangan na mag-present pa ng senior citizen’s ID, automatic na ito, kapag nag-apply ka ng passport sa DFA, hindi mo na kailangang mag-presinta ng authenticated birth certificate, ipapakita mo lang ito at makakapag-apply ka na, sa mga bangko na ngayon ay hinihingan tayo ng 2 valid IDs, hindi na natin kailangan mag-presinta ng 2 valid IDs, ito lang ay sapat na para makapag-transact.” Pahayag ni Aragones

---

Implementing Rules and Regulations

Inaasahang mailalatag na sa Oktubre ang Implementing Rules and Regulations o IRR para sa national ID system.

Ayon kay Dr. Liza Grace Bersales, National Statistician ng Philippine Statistics Authority o PSA, mayroon silang animnapung (60) araw para tapusin ang IRR upang masimulan agad ang pagpapatupad ng national ID System.

Sinabi ni Bersales na base sa kanilang pagtaya, posibleng gumastos ng tatlumpung (30) bilyong piso ang pamahalaan para mai-enroll ang humigit kumulang isandaang (100) milyong mga Pilipino kasama na ang mga dual citizens na nasa ibayong dagat.

Upang matiyak aniya na mabibigyan ng national ID ang lahat ng Pilipino, isinasaad ng batas na kailangang ang pamahalaan ang lumapit sa tao sa pamamagitan ng mobile registration.

“Ang plano dito eventually hindi kailangan ng card, kailangan maalal mo lang ang number mo at kapag pumunta ka sa isang government agency o sa bangko bigay mo lang ang number, i-scan ang biometrics mo, ‘yun na ‘yun.” Ani Bersales

---

 

National Privacy Commission

Aminado ang National Privacy Commission na hindi isandaang porsyentong hindi mananakaw ang mga personal na impormasyon ng isang tao sa ilalim ng national ID system.

Ayon kay Raymond Liboro, Chairman ng National Privacy Commission, kahit naman ang mga pinaka-sopistikadong teknolohiya ay puwedeng maging biktima ng hacking.

Isa aniya sa posibleng mangyari sa national ID ay identity theft o pagnanakaw sa personalidad ng isang tao.

Gayunman, may mga ginagawa na aniya silang hakbang kasama ang iba pang ahensya ng pamahalaan upang matiyak ang kaligtasan ng mga impormasyong maiimbak sa Philippine Statistics Authority para sa national ID.

Maliban dito, ibinabala ni Liboro na hindi simple o magaan ang mga parusang isinasaad ng batas para sa mga magkakasala sa batas.

“Marami na rin tayong mga kaparaanan, tinitignan mo rin ano ba ang maaaring maging impact ng pagpoproseso nito at ano ang mga mairerekomendang solusyon o measures, sabi ko nga ‘yung pangamba nang iba ‘yun din ang pangamba namin.” Dagdag ni Liboro

 (By Len Aguirre / Ratsada Balita Interviews)

Nanawagan si Pangulong Rodrigo Duterte sa lahat ng mga Pilipino na bigyan ng tiyansa o pagkakataon ang Bangsamoro Organic Law o BOL para makamit ang adhikain ng mga Bangsamoro na magkaroon ng sariling autonomiya.

Sa kanyang talumpati sa “ceremonial signing” ng BOL kahapon sa Malacañang, hinikayat ng Pangulo ang mga kapatid na Bangsamoro, maging ang mga indigenous communities at Christian settlers sa loob ng Bangsamoro areas na aktibong makibahagi sa diskusyon ukol sa bagong batas.

Hinimok din ni Pangulong Duterte ang lahat ng mga ‘stakeholders’ na makibahagi sa gaganaping plebisito para ihayag ang saloobin sa pamamagitan ng balota.

Pinasalamatan din ng Pangulo ang Bangsamoro Transition Commission, Moro Islamic Liberation Front (MILF) at Moro National Liberation Front (MNLF) dahil sa pagiging determinado ng mga ito na maisabatas ang BOL.

“May this serve as the final trajectory for the attainment of genuine peace, stability, [and] good governance in Muslim Mindanao.”

“But more importantly, I encourage you to take part in the upcoming plebiscite so that you may express your sovereign will through the ballot.”

“Let us work together as we continue the healing and reconciliation process. Let us give this law a chance to address the Bangsamoro people’s aspiration for genuine autonomy, while preserving our bond as a single nation and affirming the sovereignty of the indivisible Republic of the Philippines.” Pahayag ni Pangulong Duterte

—-

Isa nang ganap na batas ang Philippine Identification System Act.

Kahapon ay nilagdaan ni Pangulong Rodrigo Duterte ang batas na layong magkaroon ng iisang ID para sa lahat ng mamamayan at banyagang nakatira sa Pilipinas.

Ayon sa Pangulo, malaki ang maitutulong ng “single national identification system” para magkaroon ng maayos at mapadali ang transaksyon sa mga pampubliko at pribadong tanggapan.

Tinatayang nasa dalawang (2) bilyong piso ang inilaan na pondo sa nasabing batas na nakapaloob sa 2018 national budget.

Samantala, pinawi naman ni Pangulong duterte ang takot ng publiko na nangangamba sa posibilidad na baka malabag ang kanilang “right to privacy” dahil sa mga impormasyon sa nakalagay sa national ID.

“Let me be very clear about this, the information that will be included in the Phil-ID will not be any different from the information already in the possession of the Philippine Statistics Authority or the former NSO (National Statistics Office), GSIS (Government Service Insurance System), PhilHealth, Pag-IBIG Fund, COMELEC (Commission on Elections), and other agencies that gather personal data.”

“There is therefore no basis at all for the apprehensions about the Phil-ID, unless of course that fear is based on anything that borders to illegal.” Pahayag ng Pangulong Duterte

—-

Pangungunahan ni Pangulong Rodrigo Duterte ang ceremonial signing ng Bangsamoro Organic Law o BOL ngayong araw.

Ayon kay Presidential Peace Adviser Jesus Dureza, magaganap ang seremonya isang linggo matapos lagdaan ni Pangulong Duterte ang nabanggit na batas.

Sisimulan anya ang implementasyon ng BOL sa Agosto 10.

Ang naturang batas na kilala noon bilang Bangsamoro Basic Law ay ibinatay sa nilagdaang peace deal na Comprehensive Agreement on the Bangsamoro.

Bahagi ito ng agenda ng Duterte administration upang makamit ang kapayapaan at magkaroon ng pagkakaisa ang gobyerno at mga rebeldeng Moro sa Mindanao.

—-

Ikinakasa na ng Social Security System o SSS na gawing compulsory ang pagpapa-miyembro sa kanila ng mga Overseas Filipino Workers o OFW.

Ito’y kasunod na rin ng isinusulong na batas sa Senado na Social Security Law ni Senator Richard Gordon.

Ayon kay SSS President at Chief Executive Officer Emmanuel Dooc, nakikipag-ugnayan na sila sa Department of Foreign Affairs o DFA para sa pagsasakatuparan ng nasabing hakbang.

Sinabi ni Dooc na malaking bagay kung makakapaghulog ang isang OFW ng isang libo at pitong daan animnapung pisong (P1,760) kontribusyon sa loob ng sampung taon.

Maaari umanong makatanggap ang OFW ng anim na libo apatnaraan (P6,400) kada buwang basic monthly pension kapag nag-retiro, disability o death benefits at iba pa.

Bukod dito, pinag-aaralan na rin ng SSS ang tinatawag na flexi fund kung saan maaaring magkaroon ng dagdag ipon ang mga OFW.

—-