HOT STORIES OF THE WEEK

Nilinaw ng National Food Authority o NFA na walang magiging epekto sa suplay ng NFA rice ang pagkakabasa sa mga sako-sakong bigas na kanilang inangkat.

Ayon kay NFA Spokesperson Rex Estoperez, kung susumahin aniya ay nasa .001 o wala pa sa isang porsyento ng kabuuang bilang ng mga inangkat ang mga nabasang bigas.

Dagdag pa ni Estoperez, hindi rin babayaran ng ahensiya ang mga nabasang bigas dahil sagutin pa ito ng importer.

Nakahanda rin aniya ang importer na palitan ang mga nabasang bigas.

Sa kasalukuyan nasa limampung libong (50,000) sako ng bigas na ang naibaba habang meron pang dalawang daan ang limampung libong (250,000) sako ang hinihintay pang madiskarga sa Subic Free Port.

—-

Hindi nababahala ang Malacañang sa pagbagal ng gross domestic prodcuct o GDP sa ikalawang bahagi ng taon.

Ito ay kasunod ng inanusyo ng Philippine Statistics Authority o PSA na pagpalo lamang sa 6 percent ng GDP kumpara sa 6.7 noong 2017.

Ayon kay Presidential Spokesperson Harry Roque, mataas pa rin kung tutuusin ang 6 percent na naitalang GDP ng bansa.

Gayunman tiniyak ni Roque na gagawin ng pamahalaan ang lahat upang makabawi at makamit ang target ng bansa pagdating sa ekonomiya.

Nabatid na 7.7 percent growth ang target ng pamahalaan na makamit sa mga susunod na buwan upang maaabot ang inaasam na 7 hanggang 8 percent na GDP para sa buong taon.

—-

Posibleng nang malagdaan anumang oras ang joint exploration sa West Philippine Sea sa pagitan ng Pilipinas at China.

Ito ang inihayag ni Presidential Spokesperson Harry Roque kung saan maaaring maganap aniya ang lagdaan bago pa ang pagbisita ni Chinese President Xi Jinping sa Pilipinas bago matapos ang taon.

Paliwanag ni Roque, magsisilbing daan ang pagpasok ng Pilipinas sa bilateral agreement sa China patungong joint exploration.

Kaugnay nito, muli ring iginiit ng kalihim na ang naturang joint exploration ay constitution at alinsunod sa interes ng bansa.

—-

Muling binuhay ni Senador Tito Sotto III ang kaniyang isinusulong na panukalang batas kaugnay sa pagkakaloob ng 14th month pay sa mga empleyado sa pribadong sektor.

Batay sa Senate Bill 2, inaatasan ang mga private employers na bigyan ang kanilang rank and file workers ng 14th month pay na katumbas ng kanilang isang buwang sahod.

Ito ay bukod pa sa ipagkakaloob na 13th month pay ng mga employers.

Nakasaad sa panukala na dapat ibigay tuwing June 14 ang 13th month pay habang tuwing December 24 naman dapat ipagkaloob ang 14th month pay.

Ayon kay Sotto, ang huling sampung pisong (P10) dagdag sa sahod ng mga manggagawa ay hindi sapat dahil sa patuloy na pagtaas ngayon ng presyo ng mga bilihin.

—-

Hindi na magkakaloob ng permit si Pangulong Rodrigo Duterte para sa konstruksyon ng mga bagong casino.

Ito ang binigyang diin ni Pangulong Duterte, dalawang araw matapos i-anunsyo ang pagkakasibak niya sa buong management ng Nayong Pilipino Foundation.

Dahil ito sa pagpapa-renta ng Nayong Pilipino sa property nito sa Parañaque City upang pagtayuan ng casino resort sa halagang 5 billion pesos kung saan lugi ang gobyerno.

Sa kanyang talumpati sa 117th anniversary ng Philippine National Police sa Camp Crame, Quezon City kahapon, iginiit ng Pangulo na kailanman ay hindi niya papayagang mamayagpag ang sugal.

“I will not allow it. I hate gambling. I do not want it. There will be no casinos outside of what are existing here.”

“You do not give gambling licenses or franchise for 75 years. Mean to say that a child is born today and 75 years later, he is that old. There will still be gambling in the city.” Pahayag ni Pangulong Duterte

—-

Mayorya ng mga Filipino ang pabor sa Philippine System Identification Act o PhilSys Act na isinabatas ni Pangulong Rodrigo Duterte noon lamang Lunes.

Batay sa survey ng Social Weather Stations o SWS sa isanlibo dalawandaang (1,200) respondents noong Hunyo 27 hanggang 30, 73 percent ang pabor sa PhilSys Act, 18 percent kontra at 9 percent ang walang opinyon.

Lumabas din sa survey na 61 percent ang nagtitiwala sa gobyerno na po-protektahan ang kanilang impormasyon sa ID, 8 percent ang walang tiwala habang 30 percent ang “undecided.”

Naitala ang pinakamataas na suporta para sa national ID mula sa Metro Manila na positive 60; sinundan ng Balance Luzon na positive 58, visayas, positive 53 at Mindanao, positive 48.

Samantala, 49 percent naman ang nagsabing kampante silang hindi gagamitin ng pamahalaan ang national ID Laban sa mga kumokontra sa administrasyon, 13 percent ang may maliit na tiwala habang 39 percent ang “undecided.”

—-