HOT STORIES OF THE WEEK

Nagbabala ang Philippine Atmospheric Geophysical and Astronomical Services Administration o PAGASA sa posibleng pagtama ng El Niño bago matapos ang taon.

Ayon sa PAGASA, ang pagtama ng malalakas na bagyo at maraming ulan ay malinaw na indikasyon na mararanasan ang matinding tagtuyot.

Inihalimbawa ng PAGASA ang naranasan noong taong 2009 nang manalasa ang bagyong Ondoy.

Sa tala ng ahensya, noon palamang Hulyo ay above normal level na ang naranasang na ulan sa bansa.

Sa ginagawang El Niño watch ng PAGASA, nasa animnapung (60) porsyento na ang tiyansang mabuo ang El Niño.

—-

Posibleng nagkaroon ng conflict of interest ang pinasok na memorandum of agreement ng Department of Tourism at People’s Television Network.

Ito ay kaugnay ng kontrobersyal na paglalagay ng ad ng DOT na nagkakahalaga ng animnapung (60) milyong piso.

Ayon kay Norma Aquino ng Commission on Audit o COA, lumitaw sa kanilang report na pitumpu’t limang (75) porsyento ng ads ng DOT ay inilagay sa Kilos Pronto na programa ng kapatid ni dating Tourism Secretary Wanda Teo na si Ben Tulfo ng Bitag Media.

Sinabi ni Aquino na dalawampu’t limang (25) porsyento lamang ng kabuuang ads ng DOT sa PTV ang ikinalat sa news programs ng naturang istasyon.

Teo, itinangging alam niyang sa kanyang kapatid ang programang Kilos Pronto

Itinanggi ni dating Tourism Secretary Wanda Teo na alam niyang mapupunta sa programa ng kanyang kapatid na si Ben Tulfo ang malaking TV ad ng Department of Tourism o DOT.

Sa pagdinig ng Senate Blue Ribbon Committee, iginiit ni Teo na hindi niya alam na programa pala ng kapatid niyang si Ben ang Kilos Pronto.

Binigyang diin nito na kung nabatid niya lang, tiyak aniyang hindi niya pipirmahan ang kontrata para sa paglalagay ng DOT ad sa naturang programa.

Nanindigan din si Teo na dumaan sa tamang proseso at sa kanilang mga abogado ang ad placement ng DOT sa People’s Television.

Dahil dito, nasermunan ni Senate Blue Ribbon Committee Chair Richard Gordon si Teo dahil sa posibleng conflict of interest.

—-

Umani ng papuri ang paghahanda at pagtugon ng pamahalaang lokal ng Marikina sa mga kalamidad gaya ng nagdaang paghagupit ng habagat.

Ayon kay National Disaster Risk Reduction and Management Council o NDRRMC Spokesman Edgar Posadas epektibo ang early warning system na ipinatutupad sa Marikina maging ang pagkakaroon nito ng mga modular tents sa mga evacuation centers.

Sinabi ni Posadas na ang ganitong paghahanda sa sakuna ng Marikina ay maaari aniyang tularan ng iba pang mga lokal na pamahalaan.

“’Yung template po kasi nila, napakaganda nung early warning system nila, ‘yung pag-alarma ng pagtaas ng tubig, hindi lang ang pamahalaan ang nakakaalam nito kundi pati ang mga mamamayan, alam nila ang gagawin, siguro dapat tingnan na napaka-epektibo ng early warning system.” Ani Posadas

Samantala, pinaalalahanan din ni posadas ang mismong mga mamamayan na maging responsible sa kanilang kaligtasan lalo na sa panahon ng kalamidad.

“Makinig po tayo sa mga kinauukulan, tuloy po ang pakikipag-ugnayan sa publiko para ma-emphasize ‘yung point na dapat hanada tayo lagi, maiwasan ang mga sakuna, at manatili tayong ligtas.” Pahayag ni Posadas

---

(Balitang Todong Lakas Interview)

Pinaiimbestigahan sa Mababang Kapulungan ng Kongreso ang pagkakalusot ng 6.8 na bilyong pisong halaga ng iligal na droga sa bansa.

Sa House Resolution 2068 na inihain ni Marikina Representative Miro Quimbo sa Kamara, nais nitong ipasiyasat ang pagkakapuslit ng naturang  halaga ng illegal na droga gayundin ang posibleng pananagutan ng Bureau of Customs o BOC dito.

Naniniwala si Quimbo na patuloy ang korapsyon at “incompetence” sa loob ng BOC dahil hindi aniya mangyayari ito kung walang sabwatan sa mga opisyal at tauhan nito.

Sa kabila ng resolusyon, tuloy pa rin ang moto propio investigation ngayong araw ng House Committee on Dangerous Drugs sa 6.8 billion pesos shabu smuggling.

NBI iimbestigahan ang P6.8-B drug smuggling sa BOC

Pasok na rin ang NBI o National Bureau of Investigation sa imbestigasyon kaugnay sa pagkakalusot ng 6.8 na bilyong pisong halaga ng illegal na droga sa bansa.

Kasunod ito ng direktiba ni Justice Secretary Menardo Guevarra sa NBI na imbestigahan ang mga opisyal ng BOC o Bureau of Customs gayundin ang iba pang ahensya ng gobyerno at pribadong indibidwal na posibleng sangkot sa pagpupuslit ng illegal na droga.

Ayon kay Guevarra, hindi maaaring palampasin ang nasabing insidente lalo pa’t malaking halaga ng illegal na droga ang naipasok sa bansa.

Matatandaang, nabulilyaso nuong nakaraang Biyernes ang operasyon ng PDEA o Philippine Drug Enforcement Agency matapos madatnan na wala ng laman ang apat na magnetic filters na pinaniniwalaang pinaglagyan ng libu-libong kilo ng shabu sa isang bodega sa Cavite.

—-

Tuluyan nang ibinasura ng Cabanatuan City Regional Trial Court ang kasong double murder laban kina NAP-C Chairman Liza Maza, Dating Agrarian Reform Secretary Rafael Mariano at Bayan Muna Representatives Satur Ocampo at Teddy Casino.

Ito ay matapos katigan ni Cabanatuan City RTC Branch 28 Judge Trese Wenceslao ang inihaing motion for reconsideration ng apat na dating mambabatas.

Batay sa desisyon ni Wenceslao, walang nakitang matibay na batayan sa kasong double murder laban sa apat na dating mambabatas dahilan kaya pinagbigyan ang kanilang mosyon at pinababawi ang warrant of arrest laban sa mga ito.

Kasunod nito, tuluyan na ring ipinawalang saysay ang kasong double murder laban kina Maza, Mariano, Ocampo at Casiño.

Gayunman, tuloy ang pagdinig ng kaso laban sa iba pang mga akusado.

Sinibak ni Pangulong Rodrigo Duterte ang ilang opisyal ng Armed Forces of the Philippines V. Luna Medical Center at Health Service Command.

Ayon kay Presidential Spokesperson Harry Roque kabilang sa sinibak sina AFP Health Service Commander Brig. General Edwin Leto Torrelavega, Col. Antonio Punzalan at 18 pang ibang opisyal.

Aniya, nakarating kay Pangulong Duterte ang ulat na sangkot ang mga nasabing opisyal sa maanomalyang pagbili ng ilang kagamitan sa ospital at mga kwestiyonableng transaksyon.

Sinabi ni Roque, isang whistle blower ang nagsiwalat sa mga nasabing anomalya na agad namang inimbestigahan ng AFP at Presidential Anti Corruption Commission.

Dagdag ni Roque, isasailalim sa court martial ang mga nasabing opisyal.

“President Duterte has ordered the relieve of court martial proceedings against the top military which includes Brigade General Edwin Leo Torelavega, commander of AFP Health Service Command, Col. Antonio Punzalan, commander of V.Luna Medical Center, Chief of Management and Fiscal Office and the logistics office of the AFP-HSC among others. The Chief of Staff Gen. Carlito Galvez has also said that he will immediately relieve Gen. Torelavega and Col. Punzalan immediately and will convene court proceedings against them without prejudice to the investigation to be conducted by the ombudsman for the military.”

Inaasahang magiging makasaysayan ang tatlong araw na pagbisita ni Pangulong Rodrigo Duterte sa Israel na magsisimula sa Setyembre 2.

Ayon kay Israel Ambassador to the Philippines Effie Ben Matityau, ito ang unang pagkakataon na bibisita ang Pangulo ng Pilipinas sa Israel simula nang mag-umpisa ang “diplomatic ties” ng nasabing dalawang bansa noong 1958.

Nakatakdang makipagpulong si Pangulong Duterte kina Prime Minister Benjamin Netanyahu at President Reuven Rivlin at kabilang sa inaasahang tatalakayin ang usapin sa seguridad, economic ties at iba pa.

Posible ring matalakay ang pagkakaroon ng direct flight na Manila to Tel Aviv at pabalik na magpapalakas sa turismo ng dalawang bansa.

—-