HOT STORIES OF THE WEEK

Magiging epektibo na ang pagpapatupad ng PhilSys o Philippine Identification o ID system sa Agosto 25.

Iyan ang inihayag ng PSA o Philippine Statistics Authority makaraang lagdaan na ito ni Pangulong Rodrigo Duterte bilang isang batas noong Agosto 9.

Paliwanag ni Lisa Grace Bersales, national statistician, nakasaad sa naturang batas na magiging epektibo ang nasabing batas labing limang araw matapos itong mailathala sa mga pahayagan.

Nasa isang milyong ID ang unang ipalalabas ng psa kung saan, unang makikinabang dito ang mga benepisyaryo ng PPP o Pantawid Pamilyang Pilipino Program.

Nakalagay sa naturang id ang pangalan, tirahan, petsa at lugar ng kapanganakan, kasarian, blood type, larawan ng may-ari at biometrics nito.

Pinalagan ang hepe ng Philippine Drug Enforcement Agency o PDEA sa Bicol ang naging pahayag ni Pangulong Rodrigo Duterte na ang Naga City ay ang maituturing na “hotbed ng shabu”.

Ayon kay PDEA Southern Luzon Chief Christian Frivaldo, hindi hamak naman na mas malala ang kalakalan ng iligal na droga sa Maynila na isang highly urbanized city kumpara sa mga lugar na kanyang nasasakupan.

Maging si Naga City Mayor John Bongat ay pumalag din sa naging pahayag ng Pangulo.

Aniya, hindi totoo na kinukunsinti at walang ginagawa ang lokal na pamahalaan para matigil ang operasyon ng illegal drugs sa syudad.

Matatandaang tinawag ng Pangulo na hotbed ng shabu ang Naga City matapos nitong sabihin na hindi siya bilib sa kakayanan ni Vice President Leni Robredo para humalili sa kanya sa puwesto.

Si Robredo ay nagmula sa Naga City kung saan naging alkalde naman ang kanyang asawang si dating DILG Secretary Jesse Robredo.

—-

Sumadsad sa runway ng Ninoy Aquino International Airport (NAIA) ang flight MF8667 ng Xiamen Air sa gitna ng malakas na buhos ng ulan kaninang hatinggabi.

Sa inilabas na pahayag ng Manila International Airport Authority (MIAA) at Civil Aviation Authority of the Philippines (CAAP) inihayag na ligtas naman ang 157 na mga pasahero at crew na sakay ng nasabing eroplano.

Ayon sa airport authorities maayos na naisagawa ang emergency protocol sa pagsagip sa mga pasahero.

TINGNAN:

Xiamen Air flight na sumadsad sa NAIA runway kaninang hatinggabi. Ligtas naman ang 157 na mga pasahero at flight crews ng eroplano. | via @raoulesperas https://t.co/TtUTtJfdRe pic.twitter.com/RafHbdlc2O

— DWIZ Newscenter (@dwiz882) August 16, 2018

Sa ngayon ay patuloy na nagsasagawa ng imbestigasyon ang CAAP upang malaman ang naging sanhi ng insidente.

Dahil dito sarado ang international runway 06-24 sa NAIA hanggang alas-4:00 ng hapon ngayong araw dahil sa nagpapatuloy na clearing ar recovering operations sa lugar.

Pinayuhan naman ang mga pasaherong apektado ng runway closure na makipag-ugnayan sa kani-kanilang mga airline para sa mga anunsyo ng kanseladong biyahe.

(Story and Photo By Raoul Esperas)

Isinulong sa Senado na ideklarang national day of remembrance ang August 16 para sa mga biktima ng EJK o extrajudicial killings.

Sa resolusyong inihain ni Senador Risa Hontiveros, ang araw ng kamatayan ng binatilyong si Kian delos Santos ang nagpatindi ng galit at bumuhay sa kamalayan ng mamamayan sa nagaganap na paglabag sa karapatang pantao sa giyera kontra droga ng Pangulong Rodrigo Duterte kahit pa sa mga kabataan.

Ang pag-alala aniya sa mga biktima ng EJK ay pagpapahayag ng pagtutol sa kultura ng pagpatay, pagkunsinti at pagpapawalang bahala sa due process.

August 16 nang maganap ang kontrobersyal na pagpatay ng mga pulis-Caloocan kay Delos Santos sa isang anti-drug operations dahil sa alegasyong nagtutulak ito ng bawal na gamot na hindi naman napatunayan.

Unang anibersaryo ng kamatayan ng binatilyong si Kian Loyd Delos Santos inalala

Ginugunita ngayon ang unang anibersaryo ng pagkamatay ni Kian delos Santos, ang binatilyong napatay ng mga pulis-Caloocan sa kanilang anti-drug war.

Tatlong pulis-Caloocan ang isinakdal sa pagkamatay ni Delos Santos matapos umamin ang mga ito sa hearing ng Senado na sila ang bumaril kay Delos Santos sa kabila ng kawalang ebidensya na sangkot ito sa illegal drugs.

Sa ngayon ay nagsimula nang mag-prisenta ng kanilang depensa ang tatlong pulis matapos ang presentasyon ng mga ebidensya at testigo ng panig ng biktima.

Gayunman, dismayado si Atty. Persida Acosta ng Public Attorney’s Office (PAO) dahil hindi ginamit ng prosecution ang findings ng kanilang forensic expert na si Dr. Erwin Erfe na tatlong beses binaril si Delos Santos.

Dahil dito, sinabi ni Acosta na nagpaalam na siya sa judge na kakalas o mag-li-leave na lamang muna siya sa kaso.

Isang araw bago ang anibersaryo ng kamatayan ni Delos Santos ay nagbigay pugay na sa kanyang puntod ang kanyang mga mahal sa buhay.

 (Ulat ni Cely Bueno)

Tuloy ang dry run ng Metropolitan Manila Development Authority o MMDA sa high occupancy vehicle o HOV lane kung saan bawal sa EDSA ang sasakyan na driver lamang ang sakay.

Ayon kay Colonel Bong Nebrija, Special Operations Task Force Commander ng MMDA, ang Metro Manila Council na binubuo ng mga alkalde sa Metro Manila ang magpapasya sa resolusyon ng Senado na ihinto ang HOV.

Sinabi ni Nebrija na naniniwala silang mas makikita kung masama o hindi ang resulta ng HOV kung itutuloy ang isang linggong dry run.

Habang hinihintay aniya ang desisyon ng Metro Manila Council ay bukas pa rin naman ang MMDA sa mga suhestyon o pagbabago para mapabilis ang daloy ng trapiko sa EDSA.

“I think we need to do more dry run so that we could justify kasi there’s a wrong conception of the policy eh and we are not promoting alternate routes it’s either pumasok ka ng maaga before 7 diba? or if not kung wala ka talagang kasama then take alternate routes.” Pahayag ni Nebrija

 (Balitang Todong Lakas Interview)

Sinimulan nang isalang sa pagbusisi ng Judicial and Bar Council o JBC ang mga nominadong maging Supreme Court Chief Justice kapalit ni dating Chief Justice Maria Lourdes Sereno.

Lima ang nomado sa pagka-punong mahistrado, apat rito ay mga mahistrado ng Korte Suprema na bumoto para mapatalsik si Sereno sa pamamagitan ng quo warranto petition.

Ang mga nominado ay sina Associate Justices Teresita Leonardo de Castro, Diosdado Peralta, Lucas Bersamin, Andres Reyes Jr. at ang kaisa-isang nagmula sa labas ng Korte Suprema, si judge Virginia Tejano-Ang, Presiding Judge ng Tagum City Davao del Norte RTC Branch 1.

Ang unang isinalang sa public interview ay si Bersamin na nagpahayag ng kanilang mga plano para mapatatag ang Philippine Judicial Academy, mapalawak ang publication ng judicial judicions at maisaayos ang infrastructure ng trial courts.

Sakaling maitalaga sa puwesto, labing tatlong (13) buwan lamang manunungkulan bilang Chief Justice si Bersamin.

Batay sa kanyang information sheet, umaabot sa mahigit isang libo limandaan (1,500) ang kasong nabinbin sa sala ni Bersamin.

—-

Nanawagan ang Senado ng agarang pagsuspendi at pagbawi sa pagbabawal sa solo driver sa kahabaan ng EDSA tuwing rush hour.

Sa isinumiteng Senate Resolution 845 nina Senate President Vicente Sotto III, Senate President Pro-Tempore Ralph Recto, Majority Leader Migz Zubiri at Minority Leader Franklin Drilon, kanilang mariing hinimok ang Metro Manila Council na bawiin ang MMDA regulation sa HOV o high occupancy vehicle scheme sa EDSA.

Itinaon naman ng liderato ng Senado ang paghahain ng resolusyon sa pagsisimula ng dry run ng MMDA para sa HOV scheme.

Samantala, tiwala naman si Sotto na susuportahan ng lahat ng senador ang kanilang inihaing resolusyon.

“I am sure that the entire senate will be supporting the resolution. Ang tingin namin yun ay isa sa mga hindi magandang idea para ma-resolba ang traffic,” Pahayag ni Sotto.

(Ulat ni Cely O. Bueno)