Sumabog ang isang improvised explosive device o IED sa pier ng Masbate.
Ayon kay Masbate PNP-Provincial Director Senior Superintendent Froilan Navarozza, dalawang salarin na sakay ng banka ang namataang nag-iwan ng isang kahon sa hagdan ng pier na daungan ng mga bangka bago ito sumabog.
Wala namang napaulat na casualty sa insidente at tanging isang bangka ang nasira sa nangyaring pagsabog.
Narekober naman sa lugar ang nagkalat na PVC pipes, paper box at isang sim card.
Kasalukuyan nang iniimbestigahan ng mga awtoridad naturang pagsabog at tinutugis ang mga taong nasa likod nito.
PCG iniimbestigahan na ang pagsabog sa Masbate
Iniimbestigahan na ng Philippine Coast Guard ang nangyaring pambobomba sa pier ng Masbate.
Ayon kay PCG-Bicol acting Commander Captain Danilo Enopia, patuloy ang kanilang pakikipag-ugnayan at pakikipagtulungan sa iba pang ahensya ng pamahalaan para matukoy ang mga nasa likod ng naturang pagpapasabog.
Samantala, pinagpapaliwanag naman ang mga tauhan ng PCG na naka-duty nang mangyari ang insidente kung papaano naihagis ang bomba sa pier gayong nakataas na ang kanilang alerto kaugnay naman ng nangyaring pagsabog sa Lamitan, Basilan.
(Aya Yupangco)