HOT STORIES OF THE WEEK

Inako na ng grupong Islamic State ang suicide bombing sa Lamitan, Basilan.

Batay sa official news agency ng Islamic State na Amaq, ang Moroccan national na si Abu Kathir Al-Maghribi ang nagsagawa ng “martyrdom operation.”

Labing-isa (11) ang nasawi kabilang na ang limang sundalo at apat na sibilyan habang pito ang sugatan sa pagsabog na hinihinalang kagagawan ng Abu Sayyaf, na kapanalig ng ISIS.

Una ng inihayag ng militar na minamaneho ng pinaniniwalaang suicide bomber ang van na kargado ng pampasabog at i-detonate malapit sa isang checkpoint.

Ito ang kauna-unahang suicide at car bombing na inilunsad ng teroristang grupo sa Pilipinas.

Mga nasawi kinilala na

Kinilala na ng militar ang sampu (10) sa labing-isang (11) nasawi sa hinihinalang suicide bombing sa Lamitan City, Basilan.

Ang mga ito ay sina Corporal Samad Jumah, CAFGU Active Auxiliaries na sina Adzlan Abdullah, Muid Manda, Hermilito Gapo Junior, Jerry Inso, Titing Omar; mga sibilyang sina Hadja Radia Manda na asawa ni Omar, kanilang anak na si Garry, 10-taon; Rosa Inso at Rosida Titing.

Nakilala naman ang mga nasugatang sina CAFGU Active Auxiliary Wilbert Garcia, Corp. Romeo Tabon Jr., 1st Lt. Rojean Rodriguez, Sgts. Mike Elumba at Renante Escañan; Privates First Class Romeo Frias at Jeffrey Martecio at sibilyang si Angelina Inso.

Samantala, hindi pa matukoy ng mga awtoridad ang pagkaka-kilalanlan ng suicide bomber na isa umanong dayuhan.

Photo Credit: AFP

Pangungunahan ni Pangulong Rodrigo Duterte ang ceremonial signing ng Bangsamoro Organic Law o BOL sa Lunes, Agosto 6.

Ayon kay Presidential Spokesman Harry Roque, isasagawa ang seremonya sa Malacañang.

Bagaman hindi aniya mahilig sa seremonya si Pangulong Duterte, nararapat lamang na bigyang halaga ang makasaysayang paglagda.

Layunin ng BOL na magtatag ng bagong Bangsamoro political entity na papalit sa Autonomous Region in Muslim Mindanao upang makamit ang matagal ng inaasam na kapayapaan sa Mindanao.

—-

Kumpirmadong si Davao City Mayor Sara Duterte-Carpio ang nasa likod ng pagpapatalsik kay dating House Speaker Pantaleon Alvarez.

Kasunod ito ng idinaos na ‘thank you lunch’ na inorganisa ng alkalde para sa mga mambabatas na bumoto at sumuporta para maluklok sa bagong House Speaker Gloria Macapagal Arroyo.

Ayon kay Minority Leader Danilo Suarez, si Inday Sara ang siyang nangampanya sa mga kongresista para bumoto pabor kay Arroyo.

Matatandaang nagkairingan si Alvarez at Duterte-Carpio dahil sa regional party na itinayo ng alkalde ang Hugpong ng Pagbabago.

‘Thank You Lunch’

Naghanda ng ‘thank you lunch’ si Davao City Mayor Sara Duterte para sa mga mambabatas na sumuporta kay House Speaker Gloria Macapagal kahapon.

Isinagawa sa isang hotel sa Quezon City ang pananghalian na dinaluhan ng mga kongresistang bumoto at sumuporta sa speakership ni Arroyo.

Ayon kay Arroyo, isa lamang itong pribadong pananghalian at walang halong ibang agenda.

Kabilang sa mga dumalo sina ang mga kongresista na sina Carlo Nograles, L-Ray Villafuerte, Arjay Belmonte, Antonio Florendo at iba pa.

Dumating din sa naturang event si Ilocos Norte Representative at dating First Lady Imelda Marcos, anak nitong si Ilocos Governor Imee Marcos at dating Leyte Representative Martin Romualdez.

Sa nasabing okasyon ay nakipag-meeting din si Mayor Sara sa ilang lider ng mga political parties at mga party-list congressman at ilang opisyal ng lokal na pamahalaan.

—-

Tiniyak ng BTC o Bangsamoro Transition Comission na iba ang nilagdaang BOL o Bangsamoro Organic Law sa umiiral na ARMM o Autonomous Region in Muslim Mindanao.

Iyan ang inihayag ni BTC Chairman at MILF Vice Chairman for Political Affairs Ghadzali Jaafar makaraang ihayag nito na may itinakda nang petsa ang Malakaniyang kaugnay ng gagawing ceremonial signing ng BOL.

Subalit tumanggi si Jaafar na ibigay ang petsa ng nasabing okasyon sa halip, sinabi nito na makabubuting hintayin na lamang ang Malakaniyang na siyang maghayag nito sa publiko.

Tumanggi ring idetalye ni Jaafar kung paano matitiyak sa publiko na kakaiba ang BOL sa ARMM dahil hindi aniya ito isang materyal na bagay na kinakailangang ipakita ang ebidensya.

Nangangamba ang Moro Islamic Liberation Front o MILF sa posibleng pagkabalam ng implementasyon ng bagong batas na Bangsamoro Organic Law o BOL.

Ayon kay Mohagher Iqbal, chairman ng implementing committee ng 2014 MILF peace agreement, maari kasing dumulog sa Korte Suprema ang mga kritiko ng BOL para humingi ng Temporary Restraining Order o TRO.

Ginawa ni Iqbal ang pahayag sa harap ng halos 100,000 Moro people na dumalo sa isang aktibidad na ginanap sa kampo ng MILF sa Camp Darapanan, Maguindanao

Samantala, sinabi pa ng MILF official na 85% good at 15% less ang Bangsamoro Organic Law dahil hindi naman aniya nito maibibigay ang lahat ng kanilang kahilingan.

Ngunit, igiiniit ni Iqbal na aabot naman sa 55 ang kapangyarihan na ipinagkaloob sa ilalim ng BOL at magkakaroon rin sila ng otomatikong annual block grant na 70 hanggang 80 bilyong piso.

Maliban pa aniya ito sa kanilang matatanggap na 75% na kita mula sa tax at 10-year special development fund na nagkakahalaga ng 50 billion pesos na ilalaan para sa rehabilitasyon ng mga nasirang lugar dahil sa mga bakbakan.

MILF, susuyuin ang Cotabato City para mapabilang sa bagong Bangsamoro region

Samantala, sisikapin ng BTC o Bangsamoro Transition Commission na makumbinsi ang mga residente ng Cotabato City na sumali sa gagawing plebesito para sa binubuong bagong rehiyon ng Bangsamoro sa Mindanao.

Ito’y ayon kay MILF o Moro Islamic Liberation Front Peace Panel Chief Mohaguer Iqbal bilang reaksyon sa pahayag ni Cotabato Mayor Cynthia Guiani na hindi sila lalahok sa gagawing plebesito.

Kumpiyansa si Iqbal na malalampasan nila ang lahat ng mga pagsubok na hinaharap ng MILF at umaasa sila na magbabago ang paninindigan ng mga taga-Cotabato City na itinuturing na crown jewel.

Una nang inihayag ni Mayor Guiani na iginagalang naman nila ang nilagdaang BOL o Bangsamoro Organic Law ni Pangulong Rodrigo Duterte subalit iginiit niyang hindi sila magpapasakop sa bagong Bangsamoro Region.

(Jaymark Dagala)

Kumpiyansa ang Department of National Defense na abot kamay na ang pangmatagalang kapayapaan sa rehiyon ng Mindanao.

Ito’y makaraang lagdaan na ni Pangulong Rodrigo Duterte ang Bangsamoro Organic Law dalawang araw matapos ang kaniyang SONA o State of the Nation Address.

Ayon kay Defense Spokesman Arsenio Andolong, handa silang tumulong sa mga kapwa Pilipino sa Bangsamoro na simulang muli ang kanilang buhay, paghilumin ang sugat ng digmaan at pag-isahin ang mga mamamayan matapos ang ilang dekadang bakbakan.

Kasunod nito, nanawagan si Andolong sa iba pang mga grupong kumakalaban sa pamahalaan na sumunod na sa naging hakbang ng MILF o Moro Islamic Liberation Front at MNLF o Moro National Liberation Front na piniling umupo at makipag-usap sa halip na magmatigas sa pakikipaglaban.

Sa katunayan, libu-libong mga dating komunista na ang nagbalik loob sa pamahalaan at ngayo’y tahimik nang namumuhay kasama ang pamilya at nakikinabang sa mga ayudang ibinibigay ng pamahalaan.

Sa huli, nanindigan si Andolong na mas makabubuti sa ngayon ang mga localized peacetalks partikular na sa NPA o New People’s Army dahil mas mararamdaman ng mga ito ang presensya ng pamahalaan.