Patuloy ang rescue operations sa mga liblib na lugar sa Davao Occidental matapos ang magnitude 7.8 na lindol na tumama noong Lunes, June 8.
Ayon sa Provincial Disaster Risk Reduction and Management Office, umabot na sa labing-isa ang nasawi habang labintatlo pa ang nawawala sa naturang lugar.
Giit ng PDRRMO, patuloy namang nahihirapan ang mga otoridad na maabot ang ilang barangay sa Jose Abad Santos at Sarangani o Balut Island dahil sa mga pagguho ng lupa, nasirang pantalan, at pagkawala ng komunikasyon at kuryente.
Sa ngayon, nakikipag-ugnayan na ang pamahalaang panlalawigan sa Armed Forces of the Philippines at Philippine Coast Guard upang maihatid sa pamamagitan ng helicopter at barko ang pagkain, tubig, at iba pang suplay sa mga komunidad na hindi pa naaabot ng ayuda. —sa panulat ni Reabelle Medina
