Judith Estrada-Larino

Pormal nang kinasuhan ang sugo ng bansa sa Brazil na nakunan ng video na nananakit sa kaniyang Pilipinang kasambahay.

Ipinabatid ito ni Foreign Affairs Secretary Teodoro Locsin, Jr. kasunod na rin nang pagbalik sa bansa ni Marichu Mauro na isang career diplomat.

Sinabi ni locsin na nagpadala na siya ng memo sa Pangulong Rodrigo Duterte hinggil sa isinampang kaso laban kay Mauro.

Maaari aniyang aprubahan o ibasura ng Board of Foreign Service Administration ang report ng hearing panel sa kaso ni Mauro at siya ang pinal na magpapasya sa resulta ng imbestigasyon ng panel.

Hindi na tinukoy ni Locsin ang rekomendasyon ng panelo at ang partikular na asuntong isinampa laban kay Mauro.

Nakiisa si Senador Panfilo Lacson sa panawagan ni Senate President Vicente Sotto III na panatilihin ang P16. 4-billion na alokasyon sa National Task Force to End Local Communist Armed Conflicts (NTL-ELCAC)’s.

Sinabi ni Lacson na wala sa kamay ng security sector ang paggamit ng nasabing pondo na aniya’y bahagi ng special purpose fund sa ilalim ng ALGU o Assistance to Local Government Units  kung saan para ito sa pagpapaunlad sa mga barangays na malinis na sa New People’s Army.

Ayon kay Lacson mapupunta anito ang naturang pondo sa development programs tulad ng farm to market road at livelihood at bahagi ng confidence building measure para mapigilan ang problema sa insurgency o rebeldeng komunista.

Sa pamamagitan nito aniya ang mga barangay lalo na ang indigenous people na tatangkain ng npa na himuking sumanib sa kanilang kilusan ay hindi na mahihikayat sumama at pagkakataon na ito ng npa na magbagong buhay.

Iginiit pa ni Lacson na mahigit limampung taon na ang problema ng insurgency sa bansa kayat panahon na para gumawa ng mga hakbang para mawakasan na ito. —ulat mula kay Cely Ortega-Bueno (Patrol 19)

Muling sumiklab ang riot sa loob ng New Bilibid Prison (NBP) —isang buwan matapos ang madugong karahasan dito sa pagitan ng Sputnik at Commando gangs na ikinasawi ng siyam na preso.

Ayon sa Bureau of Corrections (BuCor) Public Information Office, pasado alas-8 ng umaga nang magsimula ang riot sa pagitan ng magkalabang grupo sa Maximum Security Compound, dahilan kaya’t inilikas din ang mga empleyado ng BuCor dito.

Kaagad namang kumilos ang BuCor, PNP Special Action Force, PNP NCRPO SWAT (National Capital Region Office’s Special Weapons and Tactics) at maging ang Bureau of Fire Protection para mapigilan ang nasabing riot.

Wala pang maibigay na detalye sa nasabing riot bagamat tiniyak ni BuCor Chief Gerald Bantag na kontrolado na nila ang sitwasyon sa loob ng NBP.

Pina-iimbestigahan na ni Bantag ang nasabing insidente para mapanagot ang responsable sa riot.

Magbababa ng singil sa kuryente ang Meralco sa buwang ito.

Ipinabatid ng Meralco na P3.95 kada kilowatt hour ang bawas sa singil sa kuryente o ito ay P8 sa kabuuang bill ng mga kumukunsumo ng 200 kilowatt hour.

Dahil dito, nasa P1.35 na kada kilowatt hour ang net rate reduction sa year-to-date adjustment.

Ayon sa Meralco, bumaba ang generation charge sa buwang ito ng P2.15 kada kilowatt hour hanggang P4.2018 dahil sa rin sa pagbaba ng singil ng wholesale electricity spot market.

Kasabay nito, iginiit ng Meralco na hindi ito magpuputol ng suplay ng kuryente sa mga customers na hindi nakabayad sa konsumong 200 kilowatt hour pababa hanggang sa katapusan ng taong ito.

May 30-day grace period naman ang ibinibigay ng Meralco sa mga hindi pa nakabayad ng bill na may konsumong mahigit 200 kilowatt hour ng walang interest, multa at iba pang charges.

Pinag-iinhibit ni dating senador Ferdinand “Bongbong” Marcos si Supreme Court Associate Justice Marvic Leonen sa pagtalakay sa kaniyang election protest laban kay Vice President Leni Robredo.

Sa kaniyang isinampang manifestation at motion, hiniling ni Marcos sa Korte Suprema na tumatayong  presidential electoral tribunal na ipag-utos ang re-raffle sa kanyang election protest sa ibang mahistrado at maresolba ang lahat ng nakabinbing usapin kaugnay sa naturang kaso.

Iginiit ni Marcos sa pamamagitan ng kaniyang mga abogado na bias si Leonen sa Pamilya Marcos na una nitong ipinakita sa ipinalabas na dissenting opinion sa isyu ng paglilibing sa dating pangulong Ferdinand Marcos sa Libingan ng mga Bayani.

Tinukoy din ng kampo ni Marcos ang prejudgment ni Leonen sa election protest ng dating senador laban kay Robredo. —ulat mula kay Bert Mozo (Patrol 3)

Magpapatuloy na ang scheduled weekend shutdown ng MRT-3 sa magkasunod na weekend.

Ayon sa pamunuan ng MRT-3, isasagawa sa ika-14 at 15 ng Nobyembre at ika-28 hanggang ika-30 ng Nobyembre ang massive rehabilitation and maintenance sa buong linya ng MRT-3 ng Sumitomo  Mitsubishi Heavy Industries.

Magpapatupad din ang pamunuan ng rail line ng temporary shutdown sa operasyon ng mga tren nito sa mga naturang petsa para bigyang daan ang gagawing bushing replacement sa depot at turnout activity sa Taft Avenue Station ng Sumitomo-MHI-TESP.

Magugunitang pansamantalang iniurong ang weekend shutdown noong ika-31 ng Oktubre hanggang ika-2 ng Nobyembre bilang pag-iingat sa pagtama ng Bagyong Rolly.

Bahagi ng gagawing bushing replacement ng 34.5 kilovolt alternating current switch gear ay ang pagsasaayos ng bus tie na nagbibigay ng suplay ng kuryente sa depot mula sa Meralco power source nito sa Balintawak at Diliman at pagkukumpuni ng isang panel na mayroong 12 bushing unit.

Sa kabilang bansa, itutuloy din ang pagsasaayos at pagpapalit ng 2A at 2B turn outs sections sa Taft Avenue Station.

Ang mga turnouts ay ginagamit para makalipat ang isang tren mula sa isang track patungo sa ibang track.

Nabawi na ng mga pulis ang cellphone ni Labor Secretary Silvestre Bello III.

Ang Iphone 11 cellphone ni Bello na nagkakahalaga ng halos P38,000 ay una nang hinablot ng mga kabataan habang binubuksan ng kalihim ang bintana ng kaniyang sasakyan sa vicinity ng Manila City Hall at Meihan Garden sa Lungsod ng Maynila.

Naaresto na rin ng mga tauhan ng Manila Police District (MPD) ang apat na kabataang may edad 15 hanggang 18 na pawang nang-snatch ng cellphone ni Bello.

Nakilala ang dalawa sa mga ito na sina Clarence Arevalo at John Paul Sunga.

Naibenta na ng mga suspek ang cellphone ni Bello sa halagang P25,000 subalit nabawi ito at dinakip ang lalaking nakabili nito na nahaharap sa paglabag sa anti-fencing law.