Judith Estrada-Larino

Patay ang 2 katao sa ikinasang anti-carnapping operations ng mga tauhan ng PNP-HPG Highway Patrol Group sa Manila – Cavite Road.

Nakilala ang mga nasawi na sina Chief Master Sergeant Julius Arcalas ng Cavite Highway Patrol Team at Methusael Cebrian, isang negosyante at kalaunan ay nakumpirmang asawa ng isang opisyal ng Philippine Navy na may ranggong Lieutenant Senior Grade na nakatalaga sa Sangley Point sa Cavite City.

Una nang sinita ang kulay green na SUV ni Cebrian na bigong makapagpakita ng mga dokumentong magpapatunay na pag-aari niya ang sasakyan kasabay nang pagpapakilalang miyembro ng Philippine Navy bagamat wala ring mailabas na ID.

Sa pagmamatigas ni Cebrian isinara ng driver nito ang bintana ng sasakyan at makalipas ang ilang minuto ay bumaba ito at nagpaputok bitbit ang isang bushmaster rifle na nakapatay kay Arcalas.

Una pang nagtago sa likod ng Suv si Arcalas at team leader ng grupo na si Capt. Eduardo Joy Guadamor dahil sa patuloy na pagpapaputok ni Cebrian sa direksyon ng mga otoridad habang nakuha pa nitong magpalit ng magazine.

Kaagad namang naka responde ang iba pang tauhan ng HPG  kaya’t napatay din ang suspek habang nasawi naman si Arcalas habang isinusugod sa Cavite Medical Center.

Ang street sweeper namang nakilalang si Eduardo Magbana ay tinamaan ng bala sa hita.

Mabilis namang tumakas ang driver ng SUV na na si Raymond Zuniga.

Sisimulan na sa Miyerkules ng senado ang deliberasyon sa plenaryo ng P4.5-T general appropriations bill.

Ayon ito kay Senate Finance Commitee Chair Juan Edgardo Angara na nagsabi ring isinasapinal na ang committee report hinggil sa panukalang 2021 National Budget.

Inamin ni Angara na kakain ng mahaba habang oras ang buong proseso sa pagtalakay nila sa budget dahil karamihan sa mga senador ay nais magkasa ng kani-kaniyang amiyenda.

Hindi aniya niya masabi kung kailan maaaprubahan ang budget dahil tinututukan din nila ang mga amendments ng kamara lalo na yung mga dinagdag nito na naka-focus sa kalusugan  tulad ng COVID-19 at health facilities.

Ibinasura ni Senate President Vicente Sotto III ang panukalang ilipat sa calamity fund ang P19-B para sa susunod na taon ng National Task Force to End Local Communist Armed Conflicts (NTF-ELCAC’s).

Sinabi ni Sotto na maging ang Department of Budget and Management (DBM) ay hindi papayagang maidagdag ang nasabing budget ng NTF-ELCAC’s bilang calamity fund.

Payag naman aniya silang dagdagan ang calamity fund subalit hindi dapat kunin ang anti insurgency fund at mayroong ibang maaaring paghugutan ng dagdag pondo para sa kalamidad.

Binigyang diin ni Sotto na krusyal ang nasabing pondo sa anti-insurgency campaign ng gobyerno partikular sa community development projects sa mga lugar na una nang nakontrol ng New People’s Army, kayat hindi ito aniya dapat galawin.

Nakapili na ang Pangulong Rodrigo Duterte ng bagong PNP chief.

Ito ay magiging kapalit ni General Camilo Cascolan na nakatakdang mag retiro bukas,  Nobyembre 10.

Gayunman, sinabi ni Presidential Spokesman Harry Roque na hihintayin muna ang appointment papers ng nasabing bagong PNP chief bago ito anunsyo sa publiko kung sino ito.

Nabiktima ng cellphone snatching sa lungsod ng Maynila si Labor Secretary Silvestre Bello III.

Sa ginawang follow-up operation sa Quiapo, Manila kaagad namang naaresto ng Manila Police District Theft and robbery section ang 2 sa 4 na snatchers na nang-agaw sa cellphone ni Bello.

Hindi naman muna inilabas ng MPD ang pangalan ng mga suspek na pawang menor de edad na una nang nakorner sa Elisondo St. sa Quiapo.

Hinablot ng mga binatilyo ang iPhone 11 ni Bello habang binubuksan nito ang salamin ng kaniyang sasakyan sa vicinity ng Manila City Hall at Mehan garden.

Nabigo naman ang mga otoridad na mabawi pa ang cellphone ni Bello at posibleng naibenta na ito kaagad ng mga suspek.

Suportado ng Pangulong Rodrigo Duterte ang gender equality bagamat ipinauubaya niya sa kongreso ang kapalaran ng Sexual Orientation and Gender Identity or expression equality bill (SOGIE).

Kabilang sa mga probisyon ng SOGIE bill ang pagbabawal sa pag-discriminate o pagtatangi-tangi laban sa Lesbians, Gays, Bisexual, Transgender and Queer (LGBTQ) people sa workplace at educational institutions.

Sinabi ni Presidential Spokesman Harry Roque na malinaw ang paninindigan ng Pangulong Duterte na lahat ng mga Pilipino ay dapat na pantay-pantay anuman ang kanilang kasarian subalit bahala na ang kongreso sa magiging pasya sa SOGIE Bill.

Ang pahayag ng Palasyo ay bilang reaksyon sa naging posisyon ng kinatawan ng Coalition of Concerned Families of the Philippines sa pagdinig ng kamara na layon ng SOGIE bill na mai-transform ang LGBTQ community bilang super special elite class.

Nagpasalamat ang Malakaniyang sa tiwala ng taumbayan sa Pangulong Rodrigo Duterte.

Ito ay matapos malagay ang Pilipinas sa ika-12 puwesto sa 144 na bansa na itinuturing na pinakaligtas tirhan base na rin sa 2020 Global Law and Order survey ng US company na Gallup.

Ayon kay Presidential Spokesman Harry Roque ang resulta ng survey ay patunay na kinikilala ng taumbayan na priority ng Pangulong Duterte na panatilihin ang peace and order sa bansa.

Tiniyak ni Roque na pagsusumikapan pa ng administrasyon na maibalik talaga ang kapayapaan at kaayusan sa bansa.