Judith Estrada-Larino

Inirekomenda ng NBI Special Action Unit (SAU) sa Ombudsman na kasuhan ng kriminal at administratibo ang 86 na personalidad na umano’y sangkot sa pastillas scheme.

Sa kanilang reklamo tinukoy ng NBI SAU ang walong mataas na opisyal ng Bureau of Immigration (BI) bilang bahagi ng pastillas group at idinawit si dating Chief of Port Operations Division na si Marc Red Marinias na Immigration Officer 2 bilang mastermind.

Isinama ng NBI ang lahat ng terminal head ng terminal control and enforcement unit sa NAIA 1, 2 at 3 at over all head ng BI border control and intelligence unit bilang bahagi ng umano’y sindikato.

Batay pa sa reklamo maliban sa bribe money ilang miyembro ng grupo ang nakatanggap ng mga regalo at iba pang benepisyo kabilang ang sexual favors mula sa mga dayuhang kababaihan na dawit sa human trafficking.

Ayon kay NBI SAU Chief Atty. Jun Donggallo Jr. malakas ang nasabing kaso laban sa mga naturang personalidad dahil may mga ibinunyag at ebidensyang inilabas si Immigration Officer Dale Ignacio na ikalawang whistle blower ng NBI.

Si Ignacio aniya ay maituturing na “insider”, bahagi ng exclusive viber group ng sindikato at may mahalagang papel bilang tagapangalaga ng listahan ng Chinese nationals na pinaboran ng grupo.

Haharap sa Pangulong Rodrigo Duterte sa Lunes, November 9 ang lahat ng nasuspindeng opisyal ng Bureau of Immigration (BI).

Ayon ito kay Senador Bong Go sa gitna na rin nang patuloy na paglilinis ng Pangulo sa problema ng korapsyon sa bansa.

Sinabi ni Go na ang mga nasabing opisyal na sangkot umano sa systemic corruption sa BI ay personal na kakausapin ng Pangulo.

Kasabay nito ipinabatid ni Go na magiging regular na ang gagawing pag-aanunsyo ng Pangulong Duterte sa publiko ng mga pangalan ng mga tiwaling opisyal ng gobyerno para huwag pamarisan ng iba pang nagtatrabaho sa gobyerno.

Una nang inisa-isa ng Pangulo nitong Lunes ang mga aniya’y tiwaling opisyal mula sa immigration, Bureau of Customs at PhilHealth.

Posibleng masimulan ang pagbabakuna kontra coronavirus disease 2019 (COVID-19) sa Mayo ng taong 2021.

Ito, ayon kay Vaccine Czar Carlito Galvez Jr., ay kung maisasagawa ang kanilang plano para makapagturok ng bakuna kontra COVID-19 sa paunang 24-milyon katao.

Sinabi ni Galvez na nakadepende sa world market at development ng bakunang aaprubahan ng Food and Drug Administration (FDA), ang pagsisimula nang pagbabakuna sa mga Pilipino.

Kasabay nito, binigyang diin ni Galvez na dapat matutukan sa vaccine roadmap ang pagtukoy kung saan maaaring ilagak ang mga bakuna na napakasensitibo kaya’t kailangang magkaroon ng magandang logistics plan hinggil dito.

Lumarga na sa mainline ang general overhauled light rail vehicles o bagon ng MRT-3.

Ito, ayon sa pamunuan ng MRT-3, ay dagdag sa 22 train sets kabilang ang 19 CKD train sets at tatlong Dalian train sets na operation at tumatakbo na.

MAGANDANG BALITA!

Nagsimula nang tumakbo sa mainline ang general overhauled light rail vehicles (LRVs) o bagon ng MRT-3, na binubuo ng isang train set na may tatlong bagon, ngayon, ika-05 ng Nobyembre 2020. pic.twitter.com/ZF3JzMfvFy

— DOTr MRT-3 (@dotrmrt3) November 5, 2020

Magugunitang nagsagawa ng simulation run ang pamunuan ng MRT-3 para sa mga bagong overhaul na mga bagon na sinubukan ding patakbuhin sa bilis na 50 kilometers per hour (kph) nitong ika-29 ng Oktubre.

Ito ay para matiyak na ligtas na gamitin ang mga bagon at maaari nang idagdag sa mga operational train sets na tumatakbo sa linya.

Dahil sa mas mabilis na takbo ng tren, nabawasan na ang average passenger waiting time para sa pagdating sa istasyon ng mga tren sa 4-minuto hanggang 6.5-minuto sa bilis na 40 kph.

Target na mas mapabilis pa ang takbo ng mga tren hanggang 60 kph pagsapit ng Disyembre ngayong taon.

Sa kasalukuyan,  ang kada train set ay maaaring magsakay ng 372 passengers o 124 passengers kada train car o 30% ng kapasidad nito.

Target ng gobyerno na bumili ng paunang 24-milyong vaccines kontra coronavirus disease 2019 (COVID-19).

Ayon ito kay Vaccine Czar Secretary Carlito Galvez, Jr. dahil nais aniya ng Pangulong Rodrigo Duterte na matiyak na magiging accessible ang bakuna sa mga mahihirap at vulnerable individuals.

Sinabi ni Galvez na ang 24-milyong bakuna ay para sa indigents, mahihirap na komunidad at vulnerable sectors.

Una nang inihayag ng Malacañang na maaaring Enero hanggang Marso ay masimulan na ang procurement process para sa COVID-19 vaccines.

‘No comment’ ang tugon ni Philippine National Police (PNP) Chief Camilo Cascolan sa posibleng pagpapalawig ng kaniyang termino, matapos ang kaniyang mandatory retirement sa ika-10 ng Nobyembre.

Sinabi ni Cascolan na hindi pa sila nagkakausap ng Pangulong Rodrigo Duterte kaugnay sa kaniyang retirement, subalit susundin niya anuman ang maging pasya ng pangulo.

Kasabay nito, inihayag ni Cascolan na kuwalipikado lahat ang kaniyang ‘dream team’ para maging susunod na PNP chief.

Tiwala aniya siyang sinuman sa tinagurian niyang ‘dream team’ na kinabibilangan nina PNP Deputy Chief for Administration Police Lt. Gen. Guillermo Eleazar, PNP Deputy Chief for Operations Police Lt. Gen. Cesar Hawthorn Binag at PNP Chief of Directorial Staff Police Major General Joselito Vera Cruz, ang maging PNP chief ay itutuloy ang mga programa ng PNP.